Salmu
Pa diretor di múzika. Pa toka na ton di múzika “Ka bu distrui”. Salmu di Davidi. Mikton.* Kantu el staba ta fuji di Saul i el ba sukundi na un kavérna.
57 Ten péna di mi, ó Deus, ten péna di mi,
Pamodi é na bo ki N ta djobe proteson,
N ta djobe proteson na sónbra di bus aza ti ki kes prubléma pasa.
2 N ta txoma kel Deus Más Grandi,
Kel Deus verdaderu, pa kaba ku es pamodi mi.
3 El ta manda ajuda la di séu i el ta salva-m.
El ta straga planu di kel algen ki sta pirsigi-m. (Selá)
Deus ta djuda-m pamodi se amor lial i pamodi el é fiel.
4 N* sta serkadu di lion,
N ten ki deta na meiu di ómi ki krê kaba ku mi.
Ses denti é sima lansa i flexa
I ses língua é un spada moladu.
5 Ó Deus, mostra modi ki bo é grandi na séu.
Pa bu glória sta riba téra interu.
6 Es pripara un armadilha* pa nha pé.
N sta inbaxadu di tantu frónta.
Es koba un braku nha dianti,
Má es mê ki kai la déntu. (Selá)
7 Ó Deus, nha korason é fiel pa bo,
Nha korason é fiel pa bo.
N ta ben toka i N ta kanta lovor pa bo.
8 N krê toka arpa i otus instrumentu di kórda,
N ta labanta sédu.*
N ta ben labanta sédu antis di sol sai.
9 Ó Jeová, N ta ben lova-u na meiu di povu.
N ta ben kanta pa N lova-u* na meiu di nason.
10 Pamodi bu amor lial é grandi, el ta txiga ti séu,
I bu lialdadi ta txiga ti núvens.
11 Ó Deus, mostra modi ki bo é grandi na séu.
Pa bu glória sta riba téra interu.