Salmu
Pa diretor di múzika. Un múzika di Davidi.
64 Ó Deus, obi nha orason óras ki N ta pidi-u ajuda.
Proteje nha vida di kes ataki kruel di nhas inimigu.
2 Proteje-m di kes algen mau ki ta faze planu sukundidu,
Di kes monti di algen ki ta faze kuzas mariadu.
3 Ses língua é moladu sima spada.
Es ta ponta palavras kruel sima un flexa,
4 I di undi ki es sta sukundidu, es ta dispara na inosenti.
Es ta dispara kóntra el dirapenti, sen medu.
5 Es ta insisti na ses mau intenson.*
Es ta pâpia sobri modi ki es ta sukundi ses armadilha.
Es ta fla: “Ken ki ta odja-s?”
6 Es ta djobe otus manera di faze kuzas mariadu.
Es ta faze ses planu sukundidu pa faze maldadi.
Ka ta da pa diskubri kuzê ki sta na ses korason.
7 Má Deus ta ben da-s ku un flexa.
Dirapenti un flexa ta fri-s.
8 Ses própi língua ta pô-s ta kai.
Tudu kes ki odja kel-li ta ben sakudi kabésa ku disprézu.
9 Nton, tudu ómi ta ben fika ku medu.
Es ta ben pâpia di kes kuza ki Deus faze
I es ta intende siginifikadu di kes kuza ki el ta faze.