Salmu
Pa diretor di múzika. Kántiku. Salmu di Davidi.
66 Pa tudu algen na téra lova Deus ku gritu di vitória.
2 Nhos kanta lovor* pa se nómi gloriozu.
Nhos da-l glória i lovor.
3 Nhos fla Deus: “Fórti bus óbra ta dexa-nu dimiradu!
Pamodi bu grandi puder,
Bus inimigu ta ben treme di medu bu dianti.
4 Tudu algen na téra ta ben inbaxa bu dianti,
Es ta ben kanta lovor pa bo,
Es ta ben kanta lovor pa bu nómi.” (Selá)
5 Nhos ben i nhos odja kes óbra di Deus.
Kes kuza grandi ki el ta faze pa fidjus di ómi ta dexa-nu dimiradu.
6 El poi mar ta bira téra séku.
Nos povu trabesa riu apé.
Nu fika txeu kontenti ku kel ki el faze pa nos la.
7 Ku se puder el ta governa pa tudu ténpu.
Ses odju ta djobe kes nason.
Kes algen temozu ka debe engrandese ses kabésa. (Selá)
8 Ó povu, nhos lova nos Deus,
Pa el lovadu ku vós altu.
9 É el ki ta mante-nu bibu.*
El ka ta dexa nos pé tropesa.
10 Ó Deus, bu izamina-nu.
Bu purifika-nu,* sima ta refinadu prata.
11 Bu pô-nu ta entra na un redi di kasa.
Bu poi un karga pizadu riba di nos.*
12 Bu dexa pa pesoas prende-nu.*
Nu pasa pa lumi i pa agu.
Dipôs, bu traze-nu pa un lugar di diskansu.
13 N ta ben entra na bu kaza ku ofértas kemadu.
N ta ben kunpri kes votu ki N faze-u,
14 Kel ki nha bóka promete,
Ki nha bóka fla kantu N staba na frónta.
15 N ta ben faze oférta kemadu di animal gordu,
Djuntu ku fumu di sakrifisiu di karneru.
N ta ben oferese toru i bódi. (Selá)
16 Tudu nhos ki ten grandi ruspetu pa Deus, nhos ben i nhos obi,
I N ta ben konta nhos kuzê ki dja el faze pa mi.*
17 Ku nha bóka N txoma-l
I ku nha língua N da-l glória.
18 Si N guardaba algun kuza mariadu na korason,
Jeová ka ta obiba mi.
19 Má Deus obi-m,
El presta atenson na nha orason.
20 Pa Deus lovadu pamodi el ka nega obi nha orason
Nen el ka nega-m se amor lial.