Salmu
Pa diretor di múzika. Pa toka na ton di “Kes líriu”. Salmu di Davidi.
69 Ó Deus, salva-m pamodi agu sta ta amiasa nha vida.*
2 N kai na lama fundu, undi ka ten lugar pa N poi pé.
N entra na agu fundu,
I korenti fórti leba-m pa lonji.
3 N sta kansadu di tantu grita.
Nha vós sta roku.
Nha odju sta ta bira fraku timenti N sta spera pa nha Deus.
4 Kes ki ta odia-m sen ninhun motivu
É más txeu di ki kabelu di nha kabésa.
Kes ki krê mata-m,
Ki é nhas inimigu traidor,* bira txeu.
N obrigadu da kuza ki N ka furta.
5 Ó Deus, bu konxe kes tolisi ki N faze,
I nha kulpa ka sta sukundidu di bo.
6 Ó Sinhor Más Grandi, Jeová di izérsitu,
Pa kes ki ta poi ses speransa na bo ka pasa vergónha pamodi mi.
Ó Deus di Israel,
Pa kes ki sta djobe-u ka umilhadu pamodi mi.
7 Pesoas ta pâpia mal di mi pamodi N ta sirbi-u.
Pur isu, N ta xinti txeu vergónha.
8 N bira un stranhu pa nhas irmon,
Un stranjeru pa kes fidju di nha mai.
9 Zelu ki N ten pa bu kaza ta kema déntu di mi sima un lumi,
Insultu di kes algen ki ta insulta-u kai riba di mi.
12 Kes ki ta xinta na porton di sidadi ta pâpia di mi,
I kes ki ta bebe dimás sta pâpia di mi na ses múzika.
13 Ó Jeová, pa nha orason txiga na bo,
Na un ténpu ki bu ta mostra-m bondadi.
Ó Deus, na bu grandi amor lial responde-m,
I mostra-m ma bo é nha Salvador di kunfiansa.
14 Tra-m di lama;
Ka bu dexa-m ba pa fundu.
Libra-m di kes algen ki ta odia-m
I di kes agu fundu.
15 Ka bu dexa kes korenti di agu leba-m pa lonji,
Nen pa kes agu fundu kaba ku mi,
Nen pa posu* ka fitxa se bóka riba di mi.
16 Ó Jeová, responde-m pamodi bu amor lial é bon.
Volta pa mi pamodi bu mizerikórdia é grandi,
17 I ka bu sukundi bu róstu di bu sérvu.
Responde-m faxi, pamodi N sta frontadu.
18 Txiga pértu di mi i libra-m;*
Salva-m pamodi nhas inimigu.
19 Bu konxe kes algen ki ta insulta-m, bu sabe di nha vergónha i di nha umilhason.
Bu ta odja tudu nhas inimigu.
20 Kes insultu kebra-m nha korason, i kel frida ka ta kura.*
N staba ta spera pa konpaxon, má N ka resebe ninhun,
N staba ta spera pa algen konsola-m, má N ka atxa ningen.
21 Envês di kumida es da-m venénu,*
I pa mata nha sedi, es da-m vinagri pa N bebe.
22 Pa ses fésta* bira un armadilha pa es,
I pa ses fartura bira un lasu.
23 Pa ses odju fika sukuru asi pa es ka konsigi odja,
I poi ses pérna* ta treme sen para.
24 Mostra bu raiba* kóntra es,
I pa bu raiba txiga na es.
25 Pa ses ténda fika bandonadu.
Pa ningen ka mora na ses ténda.
26 Pamodi es ta pirsigi kel ki bu kastiga,
I es ta kontinua ta pâpia di dór di kes algen ki bu poi ta sufri.
27 Pa tudu pézu di ses kulpa kai riba di es,
Pa es ka resebe ninhun párti na bu justisa.
28 Pa ses nómi pagadu di livru di vida,
I pa ses nómi ka skrebedu djuntu ku kes justu.
29 N sta sufri i N tene dór.
Ó Deus, salva-m i proteje-m.
30 N ta lova nómi di Deus ku kántiku,
I N ta lova Deus pa N agradese-l.
31 Jeová ta fika más kontenti ku kel-li di ki ku un toru,
Más di ki un toru novu ki ten txifri i pé divididu na meiu.*
32 Kes algen mansu ta ben odja bondadi di Deus i es ta fika kontenti.
Anhos ki ta djobe Deus, pa nhos korason fika animadu.
33 Jeová ta obi kes algen póbri,
I el ka ta dispreza se povu ki sta prézu.
34 Pa séu i téra lova Deus,
Pa mar i tudu kuza ki ten na el lova-l.
35 Pamodi Deus ta ben salva Sion
I el ta torna faze kes sidadi di Judá.
I es ta ba mora la i es ta toma kónta di el.*
36 Kes disendenti i ses sérvu ta ben erda-l,
I kes ki ta ama se nómi ta ben mora na el.