Salmu
71 Ó Jeová, N djobe proteson na bo.
Nunka ka bu dexa-m pasa vergónha.
2 Salva-m i libra-m pamodi bo é justu.
Inbaxa bu obidu* i salva-m.
3 Bira pa mi un lugar di proteson fórti na rótxa,
Undi ki N ta pode entra sénpri.
Da órdi pa N salvadu,
Pamodi bo é nha rótxa i nha proteson.
4 Ó nha Deus, salva-m di mô di kes algen mau,
Libra-m di mô di kes algen injustu ki ta maltrata-m.
5 Pamodi abo é nha speransa, ó Jeová, kel Sinhor Más Grandi.
N ta kunfia na bo* désdi ki mi éra jóven.
6 N ta dipende di bo désdi ki N nase.
É bo ki tra-m di bariga di nha mai.
Sénpri N ta lova-u.
7 Txeu algen fika spantadu kantu es odja kuzê ki kontise ku mi,
Má bo é nha proteson fórti.
8 Dia interu nha bóka ta lova-u,
I el ta pâpia di bu glória.
9 Ka bu nega-m na nha bedjisa,
Ka bu bandona-m óras ki forsa falta-m.
10 Nhas inimigu ta pâpia kóntra mi,
Kes ki krê mata-m ta faze planu kóntra mi,
11 Es ta fla: “Deus dja bandona-l.
Nhos pirsigi-l i nhos pega-l, pamodi ka ten ningen pa salva-l.”
12 Ó Deus, ka bu fika lonji di mi.
Ó nha Deus, ben faxi i djuda-m.
13 Pa kes ki sta kóntra mi
Podu na vergónha i pa kabadu ku es.
Pa kes ki ta djobe nha disgrasa
Fika xeiu di vergónha i pa es umilhadu.
14 Má ami, N ta kontinua ta spera,
N ta ben lova-u kada bês más.
15 Dia interu, nha bóka ta pâpia di bu justisa
I di kes kuza ki bu faze pa salva-m,
Enbóra es é txeu ki N ka ta pode konta-s.*
16 Ó Jeová, kel Sinhor Más Grandi,
N ta bai, N ta konta sobri kes kuza poderozu ki bu faze.
N ta pâpia di bu justisa, sô di bu justisa.
17 Ó Deus, bu inxina-m désdi nha juventudi,
I ti gósi N ta kontinua ta pâpia di kes kuza grandi i bunitu ki bu faze.
18 Ó Deus, mésmu óras ki N bira bédju ku kabelu branku, ka bu bandona-m.
Dexa-m pâpia sobri bu forsa* ku kel jerason ki sta pa ben
I sobri bu puder ku tudu kes ki sta pa ben.
19 Ó Deus, bu justisa ta txiga na séu.
Bu faze kuzas grandi,
Ó Deus, ken ki é sima bo?
20 Enbóra bu pô-m ta pasa pa txeu frónta i disgrasa,
Da-m vida otu bês,
Pô-m ta subi di kes lugar fundu* di téra.
21 Torna da-m nha ónra,
Serka-m ku bu proteson i konsola-m.
22 Ó nha Deus, N ta lova-u ku instrumentus di kórda
Pamodi bu lialdadi.
Ó Deus Santu di Israel,
N ta kanta lovor* pa bo ku arpa
23 Nha bóka ta ben grita di alegria óras ki N ta kanta lovor pa bo,
Pamodi bu salva nha vida.*
24 Dia interu nha bóka ta ben pâpia di* bu justisa,
Pamodi kes ki krê kaba ku mi ta ben pasa vergónha i ta umilhadu.