Salmu

72 Ó Deus, dexa rei julga di akordu ku bu lei

I dexa fidju di rei konxe bu justisa.

 2 Pa el difende bu povu ku justisa

I pa el faze kes algen umildi justisa.

 3 Pa kes montanha traze povu pas,

I pa kes monti pikinoti traze justisa.

 4 Pa el difende* kes algen koitadu na meiu di povu,

Pa el salva kes fidju di póbri

I pa el kaba ku kel algen ki ta splora-s.

 5 Ó Deus, timenti sol ta brilha

I timenti lua izisti, bu povu ta ten grandi ruspetu pa bo,

Di jerason pa jerason.

 6 Rei ta ben ser sima txuba ki ta kai riba di rélva kortadu,

Sima txeu txuba ki ta rega téra.

 7 Na se ténpu, algen justu ta ben bira txeu sima rélva,*

I ta ben ten txeu pas ti ki lua dexa di izisti.

 8 Kes algen ki el ta governa ta ben sta di un pónta di mar ti kel otu

I di riu Eufratis* ti kes párti más lonji di téra.

 9 Kes algen ki ta mora na dizértu ta ben inbaxa se dianti,

I ses inimigu ta ben lenbe téra.

11 Tudu rei ta ben inbaxa se dianti

I tudu nason ta ben sirbi-l.

12 El ta ben salva kes algen póbri ki sta ta txora ta pidi ajuda,

I tanbê kes algen koitadu i tudu kes ki ka ten ningen pa djuda-s.

13 El ta ben xinti péna di koitadu i di póbri,

I el ta ben salva vida* di algen póbri.

14 El ta ben libra-s* di abuzu i di violénsia,

I ses vida* ta ben ten txeu valor pa el.

Pa pesoas kontinua ta faze orason pa el,

I pa el abensuadu dia interu.

16 Ta ben ten kumida avontádi na téra,

I riba di montanha ta ben ten un monti kumida.

Kes kanpu di rei ta ben da txeu fruta sima na Líbanu,

I kes algen na sidadi ta ben bira txeu sima padja na txon.

17 Pa se nómi dura pa tudu ténpu,

I pa el kontinua ta ten más fama timenti sol ta brilha.

Pa pesoas konsigi ten un benson através di el.

Pa tudu nason fla-l ma el é filís.

18 Pa Jeová Deus, ki é Deus di Israel, lovadu,

Pamodi é sô el ki ta faze kes kuza grandi i bunitu.

19 Pa se nómi gloriozu lovadu pa tudu ténpu,

I pa se glória intxi téra interu.