Salmu
Un múzika di Azafe.
79 Ó Deus, kes nason invadi bu eransa,
Es kontamina bu ténplu santu.
Es poi Jiruzalen ta bira un monti di pédra.
2 Es da kes pasu di séu korpu di bus sérvu pa kume,
I karni di kes sérvu ki é lial pa bo, pa kes animal selvajen di téra.
3 Es baza ses sangi sima agu na tudu Jiruzalen,
I ka resta ningen pa intera-s.
4 Nos vizinhu ta dispreza-nu.
Kes ki sta na nos vólta ta goza ku nos i es ta ri di nos.
5 Ó Jeová, ti ki ténpu bu ta fika xatiadu? Pa tudu ténpu?
Ti ki ténpu bu raiba ta kema sima lumi?
6 Baza bu raiba riba di kes nason ki ka konxe-u
I riba kes reinu ki ka ta lova bu nómi.
7 Pamodi es mata kes disendenti di Jakó
I es distrui ses téra.
8 Ka bu pô-nu ta paga pa kes éru di nos gentis grandi.
Mostra-nu bu mizerikórdia faxi,
Pamodi nu umilhadu txeu.
9 Ó Deus di nos salvason, djuda-nu,
Pamodi glória di bu nómi.
Libra-nu i púrdua* nos pekadu pamodi bu nómi.
10 Pamodi ki kes nason tinha ki flaba: “Undi ses Deus sta?”
Nu krê odja óras ki nasons fika ta sabe
Ma bu vinga di kel povu ki mata bus sérvu.
11 Favor, obi suspiru di kes ki sta prézu.
Uza bu grandi puder* pa bu salva* kes ki kondenadu pa móre.*
12 Ó Jeová, kastiga nos vizinhu 7 bês más
Pamodi es ka ruspeta-u.
13 Nton, nos ki é bu povu i ribanhu di bu kanpu,
Nu ta ben agradese-u pa tudu ténpu.
I nu ta ben pâpia di bu lovor di jerason pa jerason.