Salmu
Pa diretor di múzika. Pa toka na ton di múzika di “Kes líriu”. Pa pesoas lenbra. Salmu di Azafe.
80 Ó Pastor di Israel, obi-nu,
Bo ki ta gia Juzé sima un ribanhu.
2 Mostra bu puder
Dianti di Efrain, Benjamin i Manasés.
Ben salva-nu.
3 Ó Deus, seta-nu otu bês.
Mostra ma bu sta kontenti ku nos* i salva-nu.
4 Ó Jeová, Deus di izérsitu, ti ki ténpu bu ta fika xatiadu ku* bu povu i bu ta nega obi ses orason?
5 Bu ta poi ses lágua ta bira sima pon di kada dia,
I bu ta pô-s ta bebe lágua sima agu.
6 Bu ta dexa nos vizinhu briga ku kunpanheru pa es pode domina-nu.
Nos inimigu ta kontinua ta goza ku nos sima es krê.
7 Ó Deus di izérsitu, seta-nu otu bês.
Mostra ma bu sta kontenti ku nos i salva-nu.
8 Bu poi bu povu ta sai di Ijitu sima ta rinkadu un pé di uva.
Bu tra kes nason di ses téra i bu planta bu povu la.
9 Bu linpa txon pa el,
I el bota raís i el intxi téra.
10 Se sónbra kubri kes montanha,
I ses ramu kubri kes sédru ki Deus planta.
11 Ses ramu txiga ti mar,
I ses ramu novu ti riu Eufratis.*
12 Pamodi ki bu bota na txon kes paredi di pédra di kel plantason di uva?
Gósi tudu algen ki ta pasa pa la ta rinka ses fruta.
13 Kes porku selvajen* di florésta ta kaba ku el,
I kes animal selvajen di kanpu ta kume-l.
14 Ó Deus di izérsitu, favor, volta.
Djobe la di séu i odja kuzê ki sta kontise!
Kuida di es pé di uva,
15 Di kel ramu* ki bu mô direita planta,
I odja pa kel fidju* ki bu poi ta bira fórti pa bu ónra.
16 El kortadu i el kemadu na lumi.
Es ta móre bu dianti pamodi bu koriji-s.
17 Pa bu mô djuda kel ómi ki sta na bu direita,
Kel fidju di ómi ki bu poi ta bira fórti pa bu ónra.
18 Asi, nu ka ta bandona-u.
Mante-nu bibu pa nu pode lova bu nómi.
19 Ó Jeová, Deus di izérsitu, seta-nu otu bês.
Mostra ma bu sta kontenti ku nos i salva-nu.