Salmu
Pa diretor di múzika. Un múzika di kes fidju di Korá.
85 Ó Jeová, bu tevi péna di povu di bu téra.
Bu torna traze kes disendenti di Jakó ki lebadu prézu.
2 Bu púrdua éru di bu povu,
Bu púrdua* tudu ses pekadu. (Selá)
3 Bu kontrola tudu bu raiba,
Bu ka fika xatiadu más.
4 Ó Deus di nos salvason, seta-nu otu bês,*
I ka bu fika xatiadu ku nos.
5 Bu ta ben fika xatiadu ku nos pa tudu ténpu?
Bu ta ben dexa bu raiba dura di jerason pa jerason?
6 Bu ka ta torna da-nu vida otu bês,
Asi pa bu povu pode fika kontenti pamodi bo?
7 Ó Jeová, mostra-nu bu amor lial
I salva-nu.
8 N ta ben obi kuzê ki Jeová, kel Deus verdaderu, ta ben fla
Pamodi el ta ben pâpia di pas pa se povu, pa kes ki é lial pa el,
Má pa es ka torna kunfia dimás na ses kabésa.
9 Di serteza el ta salva kes ki ten grandi ruspetu pa el,
Asi nos téra ta fika xeiu di se glória.
10 Amor lial i lialdadi ta ben inkontra ku kunpanheru.
Justisa ku pas ta ben da beju.
11 Lialdadi ta ben nase na téra,
I justisa ta ben brilha la di séu.
12 Sin, Jeová ta ben da-nu kuzê ki é bon,*
I nos téra ta ben da se kodjéta.
13 Justisa ta ben anda dianti di Deus
I el ta ben faze un kaminhu pa se pé.