Salmu
91 Ken ki ta mora na kel lugar sukundidu di kel Deus Más Grandi
Ta atxa proteson na sónbra di kel Deus Tudu-Poderozu.
2 N sta ba fla Jeová: “Bo é nha proteson i nha lugar suguru,
Nha Deus, kel ki N ta kunfia na el.”
3 Deus ta libra-u di armadilha di kasador di pasu,
I el ta salva-u di duénsa ki ta distrui.
4 El ta kubri-u* ku ses aza,
I el ta proteje-u dibaxu di ses aza.
Se lialdadi é sima un skudu grandi i sima un paredi fórti.
5 Bu ka ta ten medu di ninhun prigu di noti,
Nen di flexa ki ta bua di dia,
6 Nen di duénsa ki ta spadja na sukuru,
Nen di distruison ki ta kontise meiu-dia.
7 Mil ta ben kai na bu ladu
I 10 mil ta ben kai na bu direita,
Má nada ka ta ben txiga na bo.
8 Sô bu ta ben odja-s ku bu odju
I bu ta ser tistimunha di kastigu* ki kes algen mau ta dadu.
9 Dja ki bu fla: “Jeová é nha proteson”,
Bu dexa kel Deus Más Grandi ser bu lugar di mora.*
10 Ninhun disgrasa ka ta ben txiga na bo,
I ninhun praga ka ta ben txiga pértu di bu ténda.
11 Pamodi el ta manda ses anju,
Pa proteje-u pa undi ki bu bai.
12 Es ta karega-u na ses mô,
Asi pa bu ka da ku pé na ninhun pédra.
13 Bu ta ben piza lion novu i kóbra.
I bu ta ben pila ku pé lion grandi i kóbra grandi.
14 Deus fla: “Dja ki el ta ama-m,* N ta ben libra-l.
N ta ben proteje-l pamodi el konxe* nha nómi.
15 El ta ben txoma-m i N ta responde-l.
N ta ben sta ku el na kes ténpu di frónta.
N ta ben libra-l i onra-l.
16 N ta ben da-l un vida kunpridu,
I N ta ben dexa-l odja kes kuza ki N ta ben faze pa da salvason.”*