Salmu
Orason di un algen ki sta frontadu i dizusperadu,* ki ta lansa ses preokupason dianti di Jeová.
102 Ó Jeová, obi nha orason.
Dexa nha gritu pa ajuda txiga na bo.
2 Ka bu sukundi bu róstu na ténpu ki N sta frontadu.
Inbaxa bu obidu i obi-m.
Responde-m faxi óras ki N ta txoma-u.
3 Nha vida sta ta dizaparse sima fumu,
I nhas osu sta ta kema sima lenha na lumi.
4 Nha korason dja seka sima padja ki kortadu,
Pamodi N ka tene vontadi di kume.
5 Di tantu jeme,
Dja N bira osu ku péli.
6 N sta parse sima un pelikanu na dizértu,
Sima un kuruja na un lugar ki sta tudu distruídu.
7 N ka sta konsigi durmi.*
N sta sima un pasu ki sta el sô riba di tedja.
8 Nhas inimigu sta insulta-m dia interu.
Kes ki sta faze-m trósa* ta uza nha nómi pa maldísua otus algen.
9 N sta ta kume sinza envês di pon,
I nha bebida sta misturadu ku lágua,
10 Pamodi bu sta xatiadu i ku raiba,
Pamodi é sima si bu labanta-m pa dipôs bu pô-m di ladu.
11 Nha vida é sima sónbra ki ta dizaparse óras ki sol ta kanba,
I N sta ta seka sima padja.
12 Má abo, ó Jeová, bu ta kontinua pa tudu ténpu,
I bu fama* ta ben dura pa tudu jerason.
13 Di serteza bu ta ben labanta i bu ta ben mostra mizerikórdia pa Sion,
Pamodi é ténpu di bu mostra-l konpaxon.
Kel ténpu markadu dja txiga.
14 Pamodi bus sérvu ta fika kontenti ku kes pédra di Sion
I es ten amor ti pa kel puera di la.
15 Kes nason ta ben ten grandi ruspetu pa nómi di Jeová,
I tudu kes rei di téra ta ben rekonhese bu glória.
16 Pamodi Jeová ta ben konpo Sion,
El ta ben mostra se glória.
17 El ta ben presta atenson na orason di kes algen ki sta pasa nisisidadi,
El ka ta ben dispreza ses orason.
18 Kes palavra li skrebedu pa un jerason ki sta pa ben,
Asi, un povu ki inda ka izisti* ta ben lova Jeová* na futuru.
19 Pamodi el ta odja pa baxu, la di se lugar santu, na altura.
La di séu, Jeová ta odja pa téra,
20 Pa el obi suspiru di kes algen ki sta prézu,
I pa el liberta kes algen ki kondenadu pa móre,
21 Asi pa papiadu di nómi di Jeová na Sion
I pa el lovadu na Jiruzalen,
22 Óras ki kes povu i kes reinu
Djunta pa sirbi Jeová.
23 Deus tra-m nha forsa antis di ténpu,
El poi nha vida ta fika más kurtu.
24 N fla: “Ó nha Deus,
Ka bu dexa-m móre na metadi di nha vida
Pamodi bu ta izisti pa tudu ténpu.
25 Dja ten txeu ténpu ki bu lansa kes alisérsi di téra,
I séu é trabadju di bu mô.
26 Es ta ben dexa di izisti, má abo bu ta kontinua pa tudu ténpu.
Es ta ben gasta sima un pésa di ropa.
Bu ta ben troka-s sima un ropa, i es ta ben dizaparse.
27 Má abo é kel mê, i bus anu nunka ka ta ben kaba.
28 Kes fidju di bu sérvu ta ben vive na un lugar suguru,
I ses disendenti ta ben fika bu dianti pa tudu ténpu.”