Salmu
KINTU LIVRU
(Salmus 107-150)
107 Nhos agradese Jeová, pamodi el é bon.
Se amor lial ta dura pa tudu ténpu.
2 Pa kes algen ki Jeová resgata* fla kel-li,
Kes ki el resgata di mô* di ses inimigu,
3 Kes ki el tra di kes país i el djunta,
Di lésti i di oésti,*
Di nórti i di sul.
4 Es anda atoa na dizértu.
Es ka atxa ninhun kaminhu ki ta lebaba es pa un sidadi pa es mora la.
5 Es staba ku fómi i ku sedi.
Es* staba kansadu dimás.
6 Na ses frónta, es pidi Jeová pa djuda-s,
I el libra-s di ses difikuldadi.
7 El gia-s na kaminhu sértu,
Asi pa es txigaba na un sidadi i pa es moraba la.
8 Pa tudu algen agradese Jeová pamodi se amor lial
I pa kes kuza grandi ki el faze pa fidjus di ómi.
9 Pamodi el da kes algen ki staba ku sedi agu pa es bebe
I kes algen ki staba ku fómi kumida pa es kume.
10 Alguns ta moraba na kes lugar más sukuru,
Es staba prézu ku korenti i ta sufri.
11 Pamodi es rabela kóntra palavra di Deus.
Es ka ruspeta konsedju di kel Más Grandi.
12 Pur isu, el dexa-s pasa difikuldadi, asi pa es bira umildi.
Es tropesa i ka tinha ningen pa djuda-s.
13 Na ses frónta, es pidi Jeová pa djuda-s
I el salva-s di ses difikuldadi.
14 El pô-s ta sai di kel lugar sukuru dimás,
I el kebra ses korenti.
15 Pa tudu algen agradese Jeová pamodi se amor lial
I pa kes kuza grandi ki el faze pa fidjus di ómi.
16 Pamodi el kebra kes pórta di kóbri
I el dispadasa kes tranka di féru.
17 Es éra tolu i es pasa pa frónta
Pamodi ses pekadu i ses éru.
19 Na ses frónta, es pidi Jeová pa djuda-s
I el salva-s di ses difikuldadi.
20 El manda se palavra i el kura-s,
El resgata-s di kes armadilha ki es staba prézu.
21 Pa tudu algen agradese Jeová pamodi se amor lial
I pa kes kuza grandi ki el faze pa fidjus di ómi.
22 Pa es oferese sakrifisiu di agradesimentu
I pa es pâpia di kes kuza ki el faze ta grita di alegria.
23 Kes ki ta viaja na mar na barku,
Ki ta faze nogósiu riba di un monti agu,
24 Ta odja kes kuza ki Jeová faze
I kes kuza bunitu ki el faze na mar.
25 Es ta odja modi ki Deus ta da órdi pa tenporal labanta,
I ta sakudi kes óndia di mar.
26 Kes óndia ta poi kes marinheru ta subi pa altura.
Dipôs es ta dixi pa kes lugar fundu di mar.
Ses koraji ta kaba pamodi kel prigu.
27 Es ta fika tontu i es ta da di ladu, sima algen moku,
I tudu ses kapasidadi ka ta ten ninhun valor.
28 Nton, na ses frónta es ta pidi Jeová pa djuda-s,
I el ta libra-s di ses difikuldadi.
29 El ta kalma tenporal,
I óndias di mar ta fika kalmu.
30 Es ta fika kontenti óras ki óndias sta kalmu,
I Deus ta gia-s ti kel kais ki es krê txiga.
31 Pa tudu algen agradese Jeová pamodi se amor lial
I pa kes kuza grandi ki el faze pa fidjus di ómi.
32 Pa es da Deus glória na meiu di povu ki sta djuntadu,
Pa es lova-l na meiu di kes ansion ki sta djuntadu.
33 Deus ta poi riu ta bira dizértu
I fontis di agu ta bira téra séku,
34 Téra ki ta da txeu kumida na un téra salgadu i bandonadu,
Pamodi maldadi di kes ki ta mora na el.
35 El ta poi dizértu ta bira lagoa xeiu di planta,
I el ta poi téra séku ta bira fontis di agu.
36 El ta poi kes algen ki tene fómi ta mora la,
Asi pa es faze un sidadi pa es vive na el.
37 Es ta símia kanpu i es ta faze plantason di uva
Ki ta da txeu kodjéta.
38 El ta abensua-s i el ta pô-s ta bira txeu.
El ka ta dexa pa ses animal bira poku.
39 Má es ta torna bira poku i es ta umilhadu
Pamodi frónta, disgrasa i sufrimentu.
40 El ta baza disprézu riba di kes ómi inportanti
I el ta pô-s ta anda atoa na dizértu.
41 Má el ta proteje* kes algen póbri di frónta
I el ta poi ses família ta bira txeu sima un ribanhu.
42 Kes algen rétu ta odja kel-li i es ta fika kontenti.
Má tudu kes algen injustu ta kala ses bóka.
43 Ken ki ten sabedoria ta pensa na kes kuza li
I el ta analiza ku atenson kes kuza ki Jeová ta faze pa mostra amor lial.