Salmu

114 Kantu Israel sai di Ijitu,

Kantu kes disendenti di Jakó sai di meiu di un povu ki ta pâpia otu língua,

2 Judá bira santuáriu* di Deus,

Israel bira tiritóriu ki Deus ta governa.

3 Mar odja kel-li i el fuji.

Riu Jurdon volta pa tras.

4 Kes monti salta sima karneru,

I kes monti pikinoti sima korderu.

5 Ó mar, kuzê ki pô-u ta fuji?

Ó riu Jurdon, pamodi ki bu volta pa tras?

6 Ó montis, pamodi ki nhos salta sima karneru?

Ó montis pikinoti, pamodi ki nhos salta sima korderu?

7 Ó téra, treme pamodi Sinhor,

Pamodi Deus di Jakó,

8 Ki ta poi rótxa ta bira un lagoa xeiu di planta,

I el ta poi rótxa ta bira fontis di agu.