Salmu
135 Nhos lova Jeová!*
Nhos lova nómi di Jeová.
Nhos ki é sérvu di Jeová, nhos lova-l,
2 Nhos ki sta ta sirbi na kaza di Jeová,
Na kes pátiu di kaza di nos Deus,
3 Nhos lova Jeová, pamodi Jeová é bon.
Nhos kanta lovor* pa se nómi, pamodi é sábi faze kel-li.
4 Jeová skodje Jakó pa ser di sel,
El skodje Israel pa ser se povu spesial.*
5 N sabe dretu ma Jeová é grandi.
Nos Sinhor é más grandi di ki tudu kes otu deus.
6 Jeová ta faze tudu kuza ki el krê
Na séu i na téra, na mar i na tudu kes lugar na fundu di mar.
7 El ta poi núvens* ta subi désdi kes párti más lonji di téra.
El ta manda relánpagu óras ki txuba ta kai.*
El ta poi béntu ta sai di ses armazén.
8 El mata tudu kes primeru fidju di Ijitu,
Di ómi i di animal.
9 El faze txeu milagri i kuzas grandi na Ijitu.
El faze-s dianti di Faraó i di tudu ses sérvu.
10 El vense txeu nason
I el mata kes rei poderozu:
11 Sion, rei di kes amoreu,
I Ogi, rei di Bazan,
I el toma tudu kes reinu di Kanan.
12 El da se povu kes téra di kes nason pa ser ses eransa,
Un eransa pa se povu Israel.
13 Ó Jeová, bu nómi ta dura pa tudu ténpu.
Ó Jeová, bu fama* ta dura pa tudu jerason.
15 Imajen di kes nason é di prata i oru,
É mô di ómi ki faze-s.
16 Es ten bóka, má es ka ta pode pâpia.
Es ten odju, má es ka ta pode odja.
17 Es ten orédja, má es ka ta pode obi.
Ses bóka ka ta respira.
18 Kes algen ki ta faze-s ta ben bira sima es,
I tanbê tudu kes ki ta kunfia na es.
19 Ó povu di Israel, nhos lova Jeová.
Ó disendentis di Aron, nhos lova Jeová.
20 Ó disendentis di Levi, nhos lova Jeová.
Nhos ki ten grandi ruspetu pa Jeová, nhos lova Jeová.
21 Pa Jeová, kel ki ta mora na Jiruzalen,
Lovadu na Sion.
Nhos lova Jeová!