Salmu
Salmu di Davidi.
138 N ta ben lova-u di tudu nha korason.
N ta ben kanta lovor pa bo,
Dianti di kes otu deus.*
2 N ta ben inbaxa na direson di bu ténplu santu,*
I lova bu nómi
Pamodi abo é un Deus di amor lial i fiel.
Bu mostra ma bu nómi i bu promésa é más grandi di ki tudu kuza.*
3 Na dia ki N txoma-u, bu responde-m.
Bu da-m koraji* i bu pô-m ta bira fórti.
4 Ó Jeová, tudu kes rei di téra ta ben lova-u,
Pamodi es ta ben obi kes promésa di bu bóka.
5 Es ta ben kanta sobri kes kuza ki Jeová faze,
Pamodi glória di Jeová é grandi.
6 Enbóra Jeová sta na un puzison altu, el ta presta atenson na kes algen umildi,
Má kes algen ki é orgulhozu, el ta konxe-s sô di lonji.
7 Sikrê óras ki N ta anda na meiu di prigu, bu ta mante-m bibu.
Bu ta stende bu mô kóntra nhas inimigu ki sta xatiadu.
Bu ta ben salva-m ku bu mô direita.
8 Jeová ta ben faze tudu kuza pa mi.
Ó Jeová, bu amor lial ta dura pa tudu ténpu.
Ka bu bandona trabadju di bu mô.