Salmu
Pa diretor di múzika. Un múzika di Davidi.
140 Ó Jeová, libra-m di kes algen mau.
Proteje-m di kes algen violéntu,
2 Di kes algen ki ta faze planu na korason pa faze maldadi
I ki sénpri ta ranja konfuzon.
3 Es ta mola ses língua sima língua di kóbra.
Venénu di kóbra sta déntu ses bóka. (Selá)
4 Ó Jeová, proteje-m di mô di kes algen mau.
Proteje-m di kes ómi violéntu,
Di kes ki ta faze armadilha pa pô-m ta kai.
5 Kes algen orgulhozu ta sukundi un armadilha pa panha-m.
Es ta uza kórda pa stende un redi na bera di kaminhu.
Es ta arma un armadilha pa mi. (Selá)
6 N ta fla Jeová: “Abo é nha Deus.
Ó Jeová, obi nhas pididu di ajuda.”
7 Ó Jeová, kel Sinhor Más Grandi, nha Salvador Poderozu,
Bu ta proteje-m* na dia di géra.
8 Ó Jeová, ka bu realiza dizeju di kes algen mau.
Ka bu dexa ses armadilha da bons rezultadu, asi pa es ka engrandesedu. (Selá)
9 Pa kes kuza mariadu ki kes algen ki ta serka-m
Ta fla di mi, kai riba di es.
10 Pa braza kenti txobe riba di es.
Pa es botadu na lumi,
Na kóba fundu,* i pa es ka labanta nunka más.
11 Pa kel algen ki ta kalúnia ka atxa un lugar na téra.*
Pa maldadi pirsigi kes algen violéntu i kaba ku es.
12 N sabe ma Jeová ta ben difende kes algen koitadu
I el ta ben faze kes algen póbri justisa.
13 Di serteza kes algen justu ta ben lova bu nómi.
Kes algen ki é rétu ta ben mora na bu prezénsa.*