Salmu
Un kántiku di lovor di Davidi.
א [alefe]
145 Ó nha Deus i Rei, N ta ben da-u glória,
N ta ben lova bu nómi pa tudu ténpu.
ב [bete]
2 N ta ben lova-u dia interu.
N ta ben lova bu nómi pa tudu ténpu.
ג [gimel]
3 Jeová é grandi i el merese tudu lovor.
Ningen ka ta pode intende se grandéza.
ד [dalete]
4 Di jerason pa jerason, pesoas ta ben lova bus óbra.
Es ta ben pâpia di kes kuza grandi ki bu faze.
ה [hê]
5 Es ta ben pâpia di modi ki bu puder é grandi.
I N ta ben midita na kes kuza bunitu ki bu faze.
ו [vau]
6 Es ta ben pâpia di kes kuza ki bu faze,* ki ta poi algen ta ten grandi ruspetu pa bo.
I N ta ben pâpia di bu grandéza.
ז [zaine]
7 Es ta ben pâpia txeu animadu óras ki es lenbra di bu grandi bondadi,
I es ta ben grita di alegria pamodi bu justisa.
ח [ete]
8 Jeová ten konpaxon i mizerikórdia,
El ten paxénxa* i se amor lial é grandi.
ט [tete]
9 Jeová é bon ku tudu kriatura,
I se mizerikórdia ta odjadu na tudu kuza ki el ta faze.
י [iode]
10 Ó Jeová, tudu bus óbra ta ben da-u glória,
I kes ki é lial pa bo ta ben lova-u.
כ [kafe]
11 Es ta ben pâpia di glória di bu reinu
I es ta ben pâpia di bu puder,
ל [lamede]
12 Es ta ben konta pesoas kes kuza poderozu ki bu faze
I modi ki bu reinu é bunitu.
מ [meme]
13 Bu reinu ta dura pa tudu ténpu,
I bu govérnu ta kontinua pa tudu jerason.
ס [sameke]
14 Jeová ta djuda tudu kes algen ki sta ta kai
I el ta labanta tudu kes algen ki sta inbaxadu.
ע [aine]
15 Odju di tudu kriatura ta odja pa bo ku speransa;
Bu ta da-s kumida na ténpu sértu.
פ [pê]
16 Bu ta abri bu mô
I bu ta realiza dizeju di tudu kuza bibu.
צ [tsade]
17 Jeová sénpri ta faze kel ki é justu
I el é lial na tudu kuza ki el ta faze.
ק [kofe]
18 Jeová sta pértu di tudu kes algen ki ta faze orason pa el,
Di tudu kes ki ta faze orason pa el ku sinseridadi.*
ר [rexe]
19 El ta realiza dizeju di kes algen ki ten grandi ruspetu pa el.
El ta obi ses pididu di ajuda i el ta libra-s.
ש [xin]
20 Jeová ta proteje tudu kes algen ki ta ama-l,
Má el ta ben kaba ku tudu kes algen mau.
ת [tau]
21 Nha bóka ta ben lova Jeová.
Pa tudu kuza bibu* lova se nómi santu pa tudu ténpu.