Salmu
Pa diretor di múzika. Pa toka na melodia di “Kórsa di palmanhan”.* Un múzika di Davidi.
22 Nha Deus, nha Deus, pamodi ki bu bandona-m?
Pamodi ki bu sta lonji i bu ka sta ben salva-m?
Pamodi ki bu ka sta obi nha gritu di frónta?
2 Nha Deus, N ta kontinua ta txoma-u duránti dia i bu ka ta responde-m,
I duránti noti, N ka ta kala.
3 Má bo é santu,
Israel interu ta lova-u.*
4 Nos pai ta poba ses kunfiansa na bo.
Es ta kunfiaba na bo i sénpri bu ta salvaba es.
5 Es ta txomaba bo i bu ta salvaba es.
Es ta kunfiaba na bo i es ka ta fikaba diziludidu.*
6 Tudu algen ta faze trósa di mi i* ta dispreza-m,
Sima si mi é ka algen, má un bitxu.
7 Tudu kes ki ta odja-m ta faze trósa di mi.
Es ta dispreza-m i es ta balansa kabésa. Es ta fla:
8 “El kunfia na Jeová. Nu ben odja si el ta salva-l!
Dja ki El gosta txeu di el, pa El salva-l!”
9 É bo ki tra-m di déntu di bariga,
Ki pô-m ta xinti suguru na petu di nha mai.
10 Désdi ki N nase bu kuida di mi.*
Désdi bariga di nha mai, abo é nha Deus.
11 Ka bu fika lonji di mi, pamodi prublémas sta serka-m
I N ka ten ningen más pa djuda-m.
12 Txeu toru novu sta serka-m;
Kes toru fórti di Bazan sta na nha vólta.
13 Es ta abri ses bóka kóntra mi,
Sima un lion ki sta ruji i ki sta dispadasa kel animal ki el kasa.
14 Nha forsa sta ta kaba sima agu ki sta bazadu.
Tudu nhas osu dja sai di lugar.
Nha korason bira sima sera,*
Ki ta derete déntu mi.
15 Nha forsa dja seka sima un padás di baru.
Nha língua dja kola na séu di bóka.
Bu sta pô-m ta dixi pa puera di mórti.
16 Nhas inimigu ta serka-m sima katxor.
Es ta serka-m sima un grupu di bandidu,
Sima lion, es ta ataka nha mô ku nha pé.
17 N ta pode konta tudu nhas osu.
Nhas inimigu ta djobe-m i es ta fíksa ses odju na mi.
18 Es ta dividi nhas ropa entri es,
I es ta bota sórti sobri nha ropa.
19 Má abo, ó Jeová, ka bu fika lonji.
Bo é nha forsa. Ben faxi i djuda-m.
20 Salva-m* di spada,
Libra nha vida,* ki ten txeu valor, di mô* di kes katxor.
21 Salva-m di bóka di lion i di txifri di toru brabu.
Responde-m i salva-m.
22 N ta ben pâpia di bu nómi pa nhas irmon;
N ta ben lova-u na meiu di kongregason.
23 Nhos ki ten grandi ruspetu pa Jeová, nhos lova-l!
Tudu nhos ki é disendenti* di Jakó, nhos da-l glória!
Nhos adora-l, tudu nhos ki é disendenti di Israel.
24 Pamodi el ka dispreza nen el ka iginora sufrimentu di algen ki staba frontadu;
Nen el ka sukundi se róstu di el.
Kantu el pidi-l ajuda, el obi-l.
25 N ta ben lova-u na kongregason grandi;
N ta ben kunpri nhas votu dianti di kes ki ten grandi ruspetu pa bo.
26 Kes algen mansu ta ben kume i es ta fika fartu.
Kes ki ta buska Jeová ta ben lova-l.
Pa nhos vive* filís pa tudu ténpu.
27 Algen di tudu párti di téra ta ben lenbra di Jeová i es ta volta pa el.
Tudu família di nasons ta inbaxa se dianti.
28 Jeová é Rei;
l el ta governa nasons.
29 Tudu kes algen riku* di téra ta ben kume i ta ben inbaxa se dianti;
Tudu kes ki ta dixi pa sipultura* ta ben juelha se dianti;
Ninhun di es ka ta pode salva ses vida.*
30 Ses disendenti* ta ben sirbi-l;
Kel jerason ki sta pa ben, ta ben obi ta papiadu di Jeová.
31 Es ta ben pâpia di se justisa.
Es ta ben fla povu ki inda sta pa nase kuzê ki el faze.