Obadias
1 Kel vizon di Obadias:*
É kel-li ki Jeová, kel Sinhor Más Grandi, fla sobri Edon:
“Nu obi un notísia ki ben di Jeová,
El manda un mensajeru pa fla kes nason:
‘Nhos labanta, nu pripara pa géra kóntra el.’”
2 Deus fla: “Odja! N pô-u ta bira sen valor entri kes nason;
Es ta dispreza-u txeu.
3 Orgulhu di bu korason ingana-u,
Bo ki ta mora na kes lugar suguru na rótxa,
Ki ta mora na altura, i ki ta fla na bu korason,
‘Kenha ki ta pô-m ta dixi pa téra?’
4 Mésmu si bu moraba na un lugar altu* sima ágia,
Ô si bu fazeba bu ninhu na meiu di stréla,
N ta poba bo ta dixi di la”, é Jeová ki fla.
5 “Si ladrons ben furtaba bo di noti,
Es ka ta panhaba sô kel ki es kreba?
Ô si kes algen ki ta panha uva binha na bo,
Es ka ta dexaba un párti di kodjéta?
(Anhos, nhos ta ben distruídu tudu!)*
6 Má odja, bo ki é família di Izaú, bu pirsigidu!
Bu tizoru ki staba sukundidu dja tomadu!
7 Kes ómi ki faze kontratu ku bo tra-u di ses país.
Tudu es ingana-u.
Kes ómi ki staba na pas ku bo vense-u.
Kes ki ta kume pon ku bo ta ben poi un armadilha bu baxu,
Má bu ka ta ben da kónta di kel-li.”
8 Jeová fla: “Na kel dia,
N ta ben kaba ku kes algen di Edon ki ten sabedoria
I ku intendimentu di kes zóna di Izaú ki ten montanha.
9 Ó Teman, bus trópa balenti ta ben fika ku txeu medu,
Dja ki kada un di es ta ben matadu na kes zóna di Izaú ki ten montanha.
10 Pamodi kel violénsia ki bu faze kóntra bu irmon Jakó,
Bu ta ben fika xeiu di vergónha,
I bu ta ben dizaparse pa tudu ténpu.
11 Na dia ki kes algen stranhu leba kes trópa di Jakó prézu,
Na dia ki kes stranjeru entra na se porton i bota sórti pa dividi kes kuza ki es toma di Jiruzalen,
Bu fika paradu i bu ka faze nada.
Bu aji ku maldadi sima es.
12 Bu ka debe fikaba kontenti na dia ki bu irmon sufri,
Bu ka debe fikaba kontenti kantu es distruídu,
I bu ka debe papiaba ku tantu orgulhu na dia ki es fronta.
13 Bu ka debe entraba na porton di nha povu na dia di ses disgrasa,
Bu ka debe fikaba kontenti ku frónta di bu irmon na dia di se disgrasa,
I bu ka debe tomaba se rikéza na dia di se disgrasa.
14 Bu ka debe fikaba na kruzamentu di strada pa mata kes ki skapa,
I bu ka debe intregaba kes ki fika bibu na dia di frónta.
15 Pamodi dia di Jeová kóntra tudu nason sta ta txiga.
Sima bu faze, é si ki bu ta ben fazedu.
Bu ta ben tratadu di mésmu manera ki bu trata otus.
16 Pamodi sima nhos bebe vinhu riba di nha monti santu,
É si ki tudu nason ta ben bebe nha raiba sen para.
Es ta ben bebe i es ta inguli,
I es ta ben fika sima si nunka es ka izistiba.
17 Má na monti Sion ta ben sta kes ki skapa
I el ta ben ser santu;
I família di Jakó ta ben toma tudu kes kuza ki é di ses otu bês.
18 Família di Jakó ta ben bira un lumi,
Família di Juzé ta ben bira un lumi,
I família di Izaú ta ben bira sima padja;
Es ta ben pega na el sima un lumi i es ta kema-l,
I ka ta ben resta ningen di família di Izaú,
Pamodi é própi Jeová ki fla.
19 Es ta ben toma Negebe i kes zóna di Izaú ki ten montanha.
Es ta ben toma Sefelá i téra di kes filisteu.
Es ta ben toma tiritóriu di Efrain i tiritóriu di Samaria,
I Benjamin ta ben toma Jiliade.
20 Kes prézu di kel monti li,
Ki é povu di Israel, ta ben toma téra di kes kananeu ti Sarefá.
I kes prézu di Jiruzalen ki staba na Sefarade, ta ben toma kes sidadi di Negebe.
21 I kes salvador ta ben subi monti Sion
Pa julga kes zóna di Izaú ki ten montanha,
I reinu ta ben bira di Jeová.”