Romanus

9 Ami é sigidor di Kristu i N sta ta pâpia verdadi. N ka sta konta mintira, i nha konsénsia, ki é orientadu pa spritu santu, ta fla kel-li: 2 N tene un grandi tristéza i un dór ki ka ta kaba na nha korason. 3 Pamodi N ta kreba pa N siparadu di Kristu sima un ómi maldisuadu, asi pa N djuda nhas irmon, ki é pesoas di nha rasa. 4 Es é israelita i es skodjedu pa ser adotadu sima fidjus di Deus. Deus mostra-s se glória, el da-s kontratu, Lei, promésa i ónra di sirbi-l. 5 Es é disendenti di nos gentis grandi, i é di es ki Kristu ben. Pa kel Deus ki sta riba tudu kuza, lovadu pa tudu ténpu. Amén.

6 Má, é ka pamodi palavra di Deus fadja. Pamodi é ka tudu algen di Israel ki é própi “Israel”. 7 Nen tudu es é ka fidju sô pamodi es é disendenti* di Abraon, má Deus fla Abraon: “Kel ki ta ben txomadu di bu disendenti* ta ben ser através di Izaki.” 8 Kel-li krê fla ma é ka tudu fidju di Abraon ki é própi fidjus di Deus, má kes ki nase pamodi kel promésa, es é própi fidjus* di Abraon. 9 Pamodi Deus faze kel promésa li: “Na kel anu ki ta ben, na kel ténpu li, N ta ben i Sara dja ta tene un fidju.” 10 Kontise mésmu kuza kantu Rebeka fika grávida di jémius, di nos pai Izaki. 11 Antis di ses fidju nase i antis di es fazeba kalker kuza dretu ô mariadu, Deus dja mostraba ma se vontadi ka ta dipendeba di óbras, má di Kel ki ta skodje i ki ta txoma. 12 Deus fla-l: “Kel más bédju ta ben ser skravu di kel más novu.” 13 Sima sta skrebedu: “N ama Jakó, má N ôdia Izaú.”

14 Nton kuzê ki nu ta fla? Ma Deus é injustu? Klaru ki nau! 15 Pamodi el fla Muizés: “N ta mostra mizerikórdia pa ken ki N krê mostra mizerikórdia, i N ta mostra konpaxon pa ken ki N krê mostra konpaxon.” 16 Pur isu, el ka ta dipende di vontadi di un algen nen di se sforsu,* má di Deus, ki ten mizerikórdia. 17 Pamodi na un párti di Skrituras Deus fla Faraó: “É pur isu ki N dexa-u bibu, asi pa N uza-u pa N mostra nha puder i pa papiadu di nha nómi na téra interu.” 18 Nton, el ta mostra mizerikórdia pa ken ki el krê, má el ta dexa otus pa ses korason fika duru.

19 Nton bu ta ben fla-m: “Pamodi ki inda el ta atxa fadja na algen? Kenha ki pode bai kóntra se vontadi?” 20 Ó ómi, abo é kenha pa bu diskuti ku Deus? Un kuza ki moldadu pode fla ken ki molda-l: “Pamodi ki bu faze-m si?” 21 Kuzê? Un oleru ka ten direitu di faze ku kel mésmu masa di baru, un vazu pa uza di manera spesial* i otu pa uza na kalker kuza?* 22 Nton, kuzê ki nu ta fla si mésmu kantu Deus krê mostraba se raiba i poi se puder ta konxedu, el aguenta ku txeu paxénxa kes vazu di raiba ki fazedu pa distruídu? 23 El faze kel-li pa mostra se grandi* glória pa kes ki ta ben resebe* se mizerikórdia.* Dja el priparaba es pa es dadu glória. 24 Nos é kes ki el txoma ka sô di meiu di kes judeu, má tanbê di otus nason. 25 Sta ta kontise sima Deus flaba na Ozeias: “Kes ki ka é nha povu N ta ben txoma-s di ‘nha povu’, i kel mudjer ki ka amadu, N ta ben txoma-l di ‘kretxeu’. 26 I na kel lugar ki es fladu: ‘Nhos é ka nha povu’, la es ta ben txomadu di ‘fidjus di kel Deus bibu’.”

27 Tanbê Izaías fla sobri Israel: “Enbóra nunbru di fidjus di Israel é sima areia di mar, é sô un réstu ki ta ben ser salvu. 28 Pamodi Jeová* ta ben justa kónta ku kes algen ki ta mora na téra, di manera konplétu i faxi.”* 29 I sima Izaías dja flaba: “Si Jeová* di izérsitu ka dexaba nos un disendenti,* nu ta fikaba sima Sudoma, i nu ta biraba sima Gumora.”

30 Nton kuzê ki nu ta fla? Ma kes algen di otus nason enbóra es ka buska justisa, es alkansa justisa, kel justisa ki un algen ta ten pamodi fé. 31 Má Israel, enbóra el inpenha pa un lei di justisa, el ka alkansa kel lei. 32 Pamodi? Pamodi es ka inpenha pa el através di fé, má através di óbras. Es tropesa na kel “pédra di tropesu”, 33 sima sta skrebedu: “Nhos odja! N sta ta poi un pédra di tropesu na Sion i un rótxa ki ta poi pesoas ta kai,* má ken ki poi fé na el, ka ta fika diziludidu.”