4. Deus faze-nu pa nu sufri?

Pamodi ki é inportanti sabe respósta

Respósta di kel pergunta li ta afeta manera ki nu ta nkara vida.

Pensa na kel-li

Pamodi ki Deus, ki faze tudu kuza bunitu, ta dexa sufrimentu kontise?

Pamodi sufrimentu, txeu algen ta atxa ma Deus ka ta preokupa ku nos i ti es ten dúvida si Deus izisti. Es ta atxa ma (1) Deus ka ten puder di kaba ku sufrimentu, (2) Deus ka krê kaba ku sufrimentu, ô (3) Deus ka izisti.

Má é simé?

Kuzê ki Bíblia ta fla

Deus ka faze-nu pa nu sufri.

El krê pa nu ten un vida sábi.

‘N txiga konkluzon ma ka ten nada más sábi pa es di ki fika kontenti i faze kuzas dretu timenti es sta bibu, i tanbê ma tudu algen debe kume i bebe, i goza di rezultadus di tudu ses trabadju duru. Kel-li é prezenti di Deus.’ — ECLESIASTES 3:12, 13.

Deus da primeru ómi ku primeru mudjer tudu kel ki es mesteba pa es tinha un vida sen sufrimentu.

Deus ka faze-s pa es sufri, nen es nen ses fidjus.

‘Deus fla-s: “Nhos ten fidjus i nhos bira txeu; nhos intxi Téra i nhos manda na el”’. — GÉNESIS 1:28.

Primeru ómi ku primeru mudjer skodje ka obi ku Deus.

Pamodi kel-li, es traze txeu sufrimentu pa es i pa tudu ses fidjus.

‘Pekadu entra na mundu pamodi un ómi, i mórti entra pamodi pekadu, di es manera mórti spadja pa mundu interu, pamodi tudu algen peka’. — ROMANOS 5:12.a

Nu ka fazedu pa nu vive sen orientason di Deus.

Ómi ka fazedu pa governa se kabésa, di mésmu manera ki el ka fazedu pa vive baxu di agu.

‘Ómi é ka dónu di se kaminhu. Nen el é ka kapás di gia se kabésa.’ — JEREMIAS 10:23.

Deus ka krê pa nu sufri.

El krê pa nu vive di un manera ki, na kel ki nu pode, nu ta ivita prublémas.

‘Éra bon si bu prestaba atenson na nhas mandamentu. Nton, bu pas ta sérba sima un riu’. — ISAÍAS 48:18.