Testus pa lé — Kuzê ki nu pode prende na Bíblia?

KAPÍTLU 1

KEN KI É DEUS?

(Jó 34:10-12 ) Pur isu, ómis ki ta ntende, nhos obi-m. Deus verdaderu nunka ka ta fazeba kel ki é mau, i Tudu-Poderozu nunka ka ta faze kel ki é mariadu. ¹¹ Pamodi el ta rekonpensa un ómi di akordu ku kel ki el faze i el ta poi ta kai riba di el kes rezultadu di se kaminhus. ¹² Pur isu, Deus ka ta faze kel ki é mau; kel Tudu-poderozu ka ta faze justisa mariadu.

(Salmo 37:9-11 ) Pamodi kes algen mau ta ben ser distruídu, má kes ki ta spéra na Jeová ta ben toma kónta di Téra. ¹⁰ I ka ta dura kes algen mau ta ben dexa di izisti; bu ta djobe pa lugar ki es staba, i es ka ta sta la. ¹¹ Má, kes algen mansu ta ben toma kónta di Téra i es ta ben ten txeu alegria ku txeu pas.

(1 Pedro 5:7 ) timenti nhos ta bota tudu nhos preokupason riba di el, pamodi el ta kuida di nhos.

(Atus 17:11, BPK ) Kes genti di Beréia éra más dretu di ki gentis di Tisalónika. Es rasebe Palavra ku tudu interesi, y tudu dia es ta studaba Skritura Sagradu pa es odja si éra si mé.

KAPÍTLU 2

BÍBLIA É UN LIVRU KI BEN DI DEUS

(2 Timóteo 3:16 ) Tudu ki sta na Skritura ben di Deus i el ta sirbi pa inxina, pa koriji, pa poi kuzas na kaminhu, pa disiplina ku justisa,

(Isaías 48:17 ) Jeová, bu Resgatador, Santu di Israel fla si: “Ami, Jeová, mi é bu Deus, kel ki ta inxina-u kuzê ki é midjór pa bo, kel ki ta gia-u na kaminhu ki bu debe anda.

(Isaías 44:27–45:2 ) Kel ki fla kes agu ki sta na lugar fundu: ‘Nhos seka! N ta seka tudu bus riu’; ²⁸ Kel ki ta fla sobri Siru: ‘El é nha pastor i el ta ben faze tudu kel ki N krê’; kel ki ta fla sobri Jiruzalen: ‘El ta torna konpodu’, i sobri ténplu: ‘Bu lisérsi ta ben fazedu.’”

45 É si ki Jeová fla Siru, kel ki el skodje, kel ki N ta pega se mô direita pa vense nasons ki sta se dianti i pa dizarma kes rei, pa abri kes pórta di dôs ladu ki ta sta se dianti, asi pa kes porton ka sta fitxadu: ² “N ta bai bu dianti i N ta poi kes monti tudu na mésmu nível. N ta kebra kes pórta di kóbri i N ta rabenta kes tranka di féru.

(Números 23:19 ) Deus é ka ómi ki ta konta mintira, nen el é ka fidju di ómi pa muda di ideia. Óras ki el fla un kuza, el ka ta faze-l? Óras ki el faze un promésa, el ka ta kunpri-l?

(Hebreus 4:12 ) Pamodi palavra di Deus é bibu i el ten puder, i el é más moladu di ki kalker spada ki ta korta pa dôs ladu, i el ta entra fundu ti dividi alma ku spritu, i osu ku tutanu, i el pode diskubri kuzê ki nu ta pensa i kuzê ki nos korason krê.

KAPÍTLU 3

KUZÊ KI DEUS KRÊ PA NOS?

(Tiago 1:13-15 ) Óras ki algen sta pasa pa provason, el ka debe fla: ‘É Deus ki sta pô-m na próva.’ Pamodi pa kuzas mariadu, Deus ka ta provadu, nen el ka ta poi ningen na próva. ¹⁴ Má, tudu algen ta provadu óras ki se própi dizeju ta tenta-l i ta ngoda-l. ¹⁵ Nton óras ki dizeju bira fórti*, pekadu ta nase, i óras ki fazedu pekadu, rezultadu é mórti.

(Génesis 3:1-5 ) Kóbra éra kel animal brabu más spértu ki Jeová Deus dja fazeba. Nton el fla mudjer: “É si própi ki Deus fla, ma nhos ka debe kume di tudu arvi na jardin?” ² Nton mudjer fla kel kóbra: “Nu pode kume di fruta di arvis di jardin. ³ Má sobri kel frutu di kel arvi ki sta na meiu di jardin, Deus fla: ‘Ka nhos kume-l, nau, nen ka nhos toka na el, sinon nhos ta móre.’” ⁴ Nton kóbra fla mudjer: “É klaru ki nhos ka ta móre. ⁵ Pamodi Deus sabe, ma na kel dia ki nhos kume-l, nhos odju ta abri i nhos ta bira sima Deus, ta sabe kel ki é dretu i kel ki é mariadu.”

(Romanos 5:12 ) É pur isu ki, sima pekadu entra na mundu pamodi un ómi, i mórti entra pamodi pekadu, di es manera mórti spadja pa mundu interu, pamodi tudu algen peka. . .

(Provérbios 27:11 ) Aji ku sabedoria, nha fidju, i poi nha korason ta fika kontenti, pa N pode da un respósta pa kel ki ta dizafia-m.

(Daniel 2:44 ) “Na dia di kes rei, Deus di Séu ta ben traze un reinu ki ka ta kaba nunka más. I kel reinu li ka ta pasa pa mô di ninhun otu povu. El ta ben disfaze i el ta ben kaba ku tudu kes reinu, i sô el ta ben fika pa tudu ténpu,

(João 3:16 ) “Pamodi Deus ama mundu di tal manera ki el da se Fidju unijénitu, pa tudu kenha ki mostra fé na el ka ser distruídu, má pa ten vida pa tudu ténpu.

(João 17:3 ) Vida pa tudu ténpu é kel-li: pa es konxe-u abo, úniku Deus verdaderu, i kel ki bu manda, Jizus Kristu.

(Isaías 32:18 ) Nha povu ta ben mora na un lugar ki ten pas, na kazas suguru i na lugaris di diskansu trankilu.

(Miqueias 4:4 ) I kada un di es ta ben xinta baxu di se pé di uva i baxu di se pé di figu, i ka ta ten ningen pa pô-s ta xinti medu, pamodi é bóka di Jeová di izérsitus ki fla.

(Isaías 65:21-24 ) Es ta ben faze kazas i mora na es; es ta ben planta lugaris xeiu di pé di uva i kume di ses fruta. ²² Es ka ta faze kazas pa otus algen mora, es ka ta planta pa otus algen ba kume. Pamodi ténpu di nha povu ta ser sima ténpu di un arvi, i kes ki N skodje ta ba goza rezultadu di trabadju di ses mô. ²³ Es ka ta ben trabadja duru sen rezultadu, nen es ka ta ben ten fidjus ki ta ben pasa frónta, pamodi es ku ses fidjus é disendentis ki Jeová ta abênsua. ²⁴ Mésmu antis di es txoma, N ta responde; timenti inda es sta ta pâpia, N ta obi.

(Apocalipse 11:18 ) Má nasons fika ku txeu raiba, i bo tanbê bu fika ku raiba, i txiga kel ténpu markadu pa mortus ser julgadu i pa da rekonpénsa pa bus skravu ki é profétas, pa kes santu tanbê i pa kes ki ten ruspetu pa bu nómi, kes pikinoti ku kes grandi, i pa distrui kes ki sta distrui Téra.”

(Isaías 11:6-9 ) Lobu ta ben mora ku korderu, i liopardu ta ben deta djuntu ku kabritu; bixéru, lion i un animal ben alimentadu ta ben sta tudu djuntu; i é un mininu ki ta ben gia-s. ⁷ Baka ku ursu ta ben kume djuntu, i ses fidju ta ben deta djuntu. Lion ta ben kume padja sima boi. ⁸ Mininu ki inda sta ta mama ta brinka riba di braku undi ki naja ta sta, i mininu ki dja tradu mama ta poi se mô riba ninhu di kóbra ki ten venénu. ⁹ Ka ta fazedu ninhun stragu nen distruison na nha monti santu, pamodi Téra ta intxi di konhisimentu di Jeová sima agu ta kubri mar.

(Isaías 65:25 ) Lobu ku korderu ta ben kume djuntu, lion ta ben kume padja sima boi, i kumida di kóbra ta ben ser téra. Es ka ta ben faze mal nen es ka ta ben faze stragu na tudu nha monti santu”, é Jeová ki fla.

(João 5:28, 29 ) Ka nhos fika dimiradu ku kel-li, pamodi ta ben txiga kel óra ki tudu kes ki sta na sipultura mimorial ta ben obi se vós ²⁹ i es ta sai: kes ki faze kuzas dretu, pa un resureison di vida, i kes ki faze kuzas mariadu pa un resureison di julgamentu.

KAPÍTLU 4

BU SABE KEN KI É JIZUS KRISTU?

(João 3:13 ) Tanbê, ninhun ómi ka subi pa Séu, sô kel ki dixi di Séu, ki é Fidju di Ómi.

(João 6:38 ) pamodi N dixi di séu, ka pa faze nha vontadi, má pa faze vontadi di kel ki manda-m.

(João 6:62 ) Nton, kuzê ki ta kontiseba si nhos odjaba Fidju di Ómi ta subi pa undi ki el staba antis?

(João 17:4, 5 ) N glorifika-u na Téra, i N finda kel óbra ki bu da-m pa N faze. ⁵ I gósi, nha Pai, da-m glória na bu ladu, kel glória ki N tinha kantu N staba djuntu ku bo antis di mundu izistiba.

(João 14:28 ) Nhos obi kuzê ki N flaba nhos: ‘N sta bai i N ta torna ben atxa nhos.’ Si nhos ta amaba mi, nhos ta fikaba kontenti pamodi N sta bai pa nha Pai, dja ki Pai é más grandi ki mi.

(Mateus 9:35, 36 ) I Jizus kumesa ta faze un viaji pa tudu sidadis i zónas, ta inxina na ses sinagóga, ta prega notísias sábi di Reinu i ta kura tudu tipu di duénsas i tudu tipu di dór. ³⁶ Kantu el ta odjaba kes monti di algen, el ta xintiba péna di es, pamodi es ta staba sfoladu i botadu di un ladu pa kel otu, sima ovelhas sen pastor.

(Filipenses 2:8 ) Más di ki kel-la, kantu el ben sima un ómi, el rabaxa i el bira obidienti ti mórti, sin, mórti na un staka.

KAPÍTLU 5

RESGATI É MIDJÓR PREZENTI KI DEUS DA-NU

(Mateus 20:28 ) sima Fidju di Ómi ki ben, ka pa ser sirbidu, má pa el sirbi i pa da se vida pa resgata un monti di algen.”

(Romanos 5:19 ) Sima txeu algen bira pekador pamodi sô un ómi ki dizobidese, tanbê txeu algen ta ben bira justu pamodi sô un ki obidese.

(Romanos 3:23, 24 ) Pamodi tudu algen peka i es ka ta alkansa glória di Deus, ²⁴ i é sima un prezenti ki es ta txomadu di justu pamodi Se bondadi ki nu ka merese, através di salvason di resgati ki Kristu Jizus paga.

(Lucas 22:19 ) Tanbê el panha un pon, el agradese Deus, el parti-s el, el da-s i el fla-s: “Kel-li ta reprizenta nha korpu, ki ta ben dadu pa nhos pruvetu. Nhos kontinua ta faze kel-li pa nhos lenbra di mi.”

KAPÍTLU 6

PA UNDI KI NU TA BAI ÓRAS KI NU MÓRE?

(Eclesiastes 9:5, 6 ) Kes ki sta bibu sabe ma es ta móre, má mortus ka sabe di más nada, nen es ka ta ganha más nada, pamodi ta skesedu di es. ⁶ Tanbê ses amor, ses ódiu i ses siumi dja kaba, i es ka ta partisipa más na ninhun kuza ki ta fazedu dibaxu di sól.

(Eclesiastes 9:10 ) Tudu ki bu mô atxa pa faze, faze-l ku tudu bu forsa, pamodi ka ten trabadju, nen planus, nen konhisimentu, nen sabedoria na Sipultura, lugar pa undi bu ta bai.

(Génesis 3:19 ) Na soris di bu tésta bu ta kume pon, ti ki bu bai pa téra otu bês, dja ki é di la ki bu tradu. Pamodi bo é téra i pa téra bu ta bai otu bês.”

(1 João 4:8 ) Ken ki ka ta ama ka konxe Deus, pamodi Deus é amor.

KAPÍTLU 7

ALGEN MORTU TA BEN SER RESUSITADU!

(2 Coríntios 1:3, 4 ) Pa lova Deus i Pai di nos Sinhor Jizus Kristu, kel Pai di mizerikórdia i Deus di tudu konsolu, ⁴ ki ta konsola-nu na tudu nos prubléma, asi ku kel konsolu ki nu ta resebe di Deus, nu ta pode konsola otus na kalker tipu di prubléma.

(João 11:41, 42 ) Nton, es tra pédra. Jizus labanta odju pa séu i el fla: “Nha pai, obrigadu pamodi bu obi-m. ⁴² Na verdadi, N sabe ma sénpri bu ta obi-m, má N fla kel-li pamodi kes monti di algen ki sta na nha bera, pa es pode kridita ma é bo ki manda-m.”

(Isaías 40:26 ) “Nhos labanta odju pa Séu i nhos odja. Ken ki kria kes kuza li? É Kel ki ta pô-s ta sai sima un izérsitu, pa nunbru el ta txoma tudu es pa ses nómi. Pamodi se grandi inerjia i di se puder ki ta da medu, nen un di es ka ta falta.

(Atos 24:15 ) N ten speransa na Deus, speransa ki kes ómi li ten tanbê, ma ta ben ten resureison di algen justu i tanbê di algen injustu.

(Isaías 25:8 ) El ta ben kaba ku mórti pa tudu ténpu, i Jeová, kel Sinhor Más Grandi, ta ben linpa lágua di tudu róstu. El ta ben tra vergónha di se povu di Téra interu; pamodi é própi Jeová ki fla.

KAPÍTLU 8

KUZÊ KI É REINU DI DEUS?

(Mateus 6:9-13 ) “Nton, nhos faze orason asi: “‘Nos Pai ki sta na Séu, pa bu nómi ser santifikadu. ¹⁰ Faze bu Reinu ben. Pa bu vontadi fazedu na Séu, asi tanbê na Téra. ¹¹ Da-nu pon pa es dia di oji; ¹² i purdua-nu nos dívida, sima nu ta púrdua ken ki sta debe-nu. ¹³ I ka nhu leba-nu pa tentason, má libra-nu di Malvadu.’

(Apocalipse 14:1 ) Nton N odja Korderu sakédu na monti Sion, i djuntu ku el 144 mil, ki ten se nómi ku nómi di se Pai skrebedu na tésta.

(Apocalipse 14:4 ) Kes-li é kes ki ka kontamina ku mudjeris; na verdadi, es é vírjen. É es ki sta sigi Korderu pa undi ki el bai. Es foi kes primeru kunpradu na mundu pa Deus i pa Korderu,

(Apocalipse 12:7-10 ) Kumesa un géra na séu: Migel ku se anjus géra kóntra dragon, i dragon ku se anjus géra, ⁸ má es ka ganha géra, i nen ka tinha más lugar pa es na séu. ⁹ Nton, kel grandi dragon botadu pa baxu, kel primeru kóbra, ki ta txomadu di Diabu i Satanás, ki sta ta ngana Téra interu. El botadu pa baxu, pa Téra, i se anjus botadu pa baxu djuntu ku el. ¹⁰ N obi un vós altu na Séu ta fla: “Gósi, dja ten salvason, puder i Reinu di nos Deus, i autoridadi di se Kristu, pamodi botadu pa baxu, kel ki ta akuza nos irmons, kel ki ta akuza-s dia ku noti dianti di nos Deus!

(Salmo 37:10 ) I ka ta dura kes algen mau ta ben dexa di izisti; bu ta djobe pa lugar ki es staba, i es ka ta sta la.

KAPÍTLU 9

NU STA TA VIVE NA TÉNPU DI FIN?

(Hebreus 10:24, 25 ) I nu pensa na kunpanheru pa nu insentiva kunpanheru pa amor i pa bons óbra, ²⁵ ka nu dexa di sta na runion, sima alguns ta kustuma faze, má nu da kunpanheru koraji, inda más gósi ki nhos sta ta odja kel dia ta txiga.

KAPÍTLU 10

KUZÊ KI BÍBLIA TA FLA SOBRI ANJUS?

(Génesis 6:2 ) kes fidju di Deus verdaderu kumesa ta repara ma kes fidju-fémia di ómis éra bunitas. Nton es kumesa ta toma tudu kes ki es skodje pa ser ses mudjer.

(2 Coríntios 2:11 ) pa Satanás ka ngana-nu, pamodi nu sabe kal ki é se intensons.

(Deuteronómio 18:10, 11 ) I na bu meiu ka debe ten ningen ki ta kema se fidju matxu ô se fidju-fémia na lumi, ô ki ta faze dibinhason, ô ki ta faze majia, ô ki ta djobe agoru, ô un fitiseru, ¹¹ ô un algen ki ta prende otus algen ku nkantamentu, ô ki ta djobe kes algen ki ta invoka spritus, ô un algen ki ta dibinha, ô algen ki ta pâpia ku mortu.

(Provérbios 18:10 ) Nómi di Jeová é un tori fórti. Justu ta kóre pa déntu di el i el ta resebe proteson.

(Tiago 4:7, 8 ) Nton, nhos obi ku Deus; má nhos fika kóntra Diabu, i el ta fuji di nhos. ⁸ Nhos ser amigu di Deus i el ta ser nhos amigu. Nhos linpa nhos mô pekadoris i nhos purifika nhos korason, nhos ki ka sta krê toma disizon.

KAPÍTLU 11

PAMODI KI TEN TXEU SUFRIMENTU?

(2 Pedro 3:9, 10 ) Jeová é ka léntu ku se promésa, sima alguns algen ta pensa, má el ten paxénxa ku nhos, pamodi el ka krê pa ningen ser distruídu, má el krê pa tudu algen rapende. ¹⁰ Má, dia di Jeová ta ben sima ladron, i na kel dia séu ta pasa ku strondu, i kes párti ta disfaze tudu pamodi es ta sta rei di kenti, i téra ku kuzas ki ta fazedu na el ta diskubridu.

(1 Coríntios 10:13 ) Ka txiga na nhos ninhun tentason ki inda ómis ka pasa pa el. Má Deus é fiel, i el ka ta dexa nhos pasa pa tentason más di ki kel ki nhos pode aguenta, má, djuntu ku tentason, el ta da un manera di skapa, pa nhos pode aguenta.

KAPÍTLU 12

MODI KI BU PODE BIRA AMIGU DI DEUS?

(Salmo 55:22 ) Lansa bu karga na Jeová, i el ta apoia-u. Nunka el ka ta dexa pa algen justu kai.

(Salmo 15:1-5 ) Ó Jeová, ken ki pode ser konvidadu pa entra na bu ténda? Ken ki pode mora na bu monti santu? ² Kel ki ta anda sen kulpa, ki ta faze kel ki é dretu i ki ta pâpia verdadi na se korason. ³ El ka ta uza se língua pa faze kalúnia. El ka ta faze ninhun mal pa se prósimu i el ka ta difama se amigus. ⁴ El ka ta seta ningen ki é disprezadu, má el ta onra kes ki ten grandi ruspetu pa Jeová. El ka ta dexa di kunpri se promésa, sikrê el prujudika se kabésa. ⁵ El ka ta nprista se dinheru ku juru, i el ka ta seta subornu kóntra algen ki ka ten kulpa. Ken ki ta faze si, nunka ka ta kai.

KAPÍTLU 13

RUSPETA VIDA KI DEUS DA-U

(Salmo 36:9 ) Fonti di vida sta na bo; através di bu lus nu ta pode odja lus.

(1 João 3:15 ) Tudu kel ki ta ôdia se irmon é asasinu, i nhos sabe ma ninhun asasinu ka ta ten vida pa tudu ténpu na el.

(Êxodo 21:22, 23 ) “Si ómis sta ta briga ku kunpanheru i es fri un mudjer grávida, i kel mudjer ten fidju antis di ténpu, má ningen ka móre, kel ki é kulpadu ten ki paga présu ki maridu di kel mudjer pidi; el ten ki paga-l através di juízis. ²³ Má, si algen móre, ta dadu vida pa vida,

(Atos 15:28, 29 ) Pamodi parse dretu pa spritu santu i pa nos tanbê, pa ka poi riba nhos ninhun karga alén di kes kuza li ki nhos meste faze: ²⁹ pa nhos kontinua ta libra di kuzas ki sakrifikadu pa imajis, di sangi, di animal ki stranguladu i di konportamentu seksual mariadu. Si nhos fika lonji di kes kuza li, tudu ta kóre dretu. Mantenha pa nhos!”

KAPÍTLU 14

BU FAMÍLIA PODE SER FILÍS

(Efésios 5:25-29 ) Maridus, nhos kontinua ta ama nhos mudjer, sima Kristu tanbê ama kongregason i el da se vida pa el ²⁶ pa santifika kongregason i linpa-l ku banhu di agu através di palavra, ²⁷ asi pa el pode aprizenta-l pa se kabésa ku tudu se glória, sen mantxa nen ruga, nen kalker otu kuza sima kes-li, má santu i sen difetu. ²⁸ Di mésmu manera, maridu debe ama se mudjer sima el ta ama se própi korpu. Ómi ki ta ama se mudjer, el ta ama se kabésa, ²⁹ pamodi ninhun ómi nunka ka ôdia se própi korpu; má, el ta da-l kumida i el ta kuida di el, sima Kristu ta faze ku kongregason,

(Tito 2:4, 5 ) asi pa es pode konsedja kes mudjer más jóven pa ama ses maridu, pa ama ses fidju, ⁵ pa es ten bon juís, pa es ser séria, trabadjaderas na kaza, pa es faze bondadi, pa es obi ku ses maridu, asi pa ka papiadu mal di palavra di Deus.

KAPÍTLU 15

MODI KI DEUS KRÊ PA NU ADORA-L

(João 17:17 ) Santifika-s através di verdadi; bu palavra é verdadi.

(João 17:6 ) “N poi bu nómi ta bira konxedu pa kes ómi ki bu da-m na mundu. Es éra di bo, i bu da-m es, i es obi ku bu palavra.

(João 13:35 ) Através di kel-li tudu algen ta fika ta sabe ma nhos é nha disiplus: si nhos ten amor pa kunpanheru.”

(João 3:36 ) Ken ki mostra ma el ten fé na Fidju, ta ten vida pa tudu ténpu; ken ki ka obi ku Fidju ka ta odja vida, má raiba di Deus ta kontinua riba di el.

(João 18:36 ) Jizus responde: “Nha Reinu ka ta faze párti di es mundu. Si nha Reinu ta fazeba párti di es mundu, nhas ajudanti ta brigaba pa es ka ntregaba mi pa judeus. Má, sima sta klaru, nha Reinu é ka di li.”

(Mateus 24:14 ) I kes notísia sábi di Reinu ta ben ser pregadu na mundu interu, pa sirbi di tistimunhu pa tudu nasons, i dipôs fin ta ben.

KAPÍTLU 16

DISIDI ADORA DEUS SIMA EL TA KRÊ

(Êxodo 20:4, 5 ) “Ka bu faze ninhun imaji na fórma di státua pa bo, nen ninhun fórma di algun kuza ki ten di riba na séu, ô dibaxu na téra, ô na agu dibaxu di Téra. ⁵ Ka bu nbaxa ses dianti nen ka bu sirbi-s, pamodi ami, Jeová, bu Deus, ami é un Deus ki ta iziji pa adora-m sô mi i ki ta traze kastigu pamodi érus di pai sobri ses fidjus, sobri kel tirseru jerason i sobri kel kuartu jerason di kes ki ta odia-m,

(Isaías 52:11 ) Nhos râkua, nhos râkua, nhos sai di li, ka nhos toka na nada inpuru! Nhos sai di el i nhos mante puru, nhos ki ta karega kuzas di Jeová.

(Mateus 7:12 ) “Nton, tudu kuza ki nhos krê pa ómis faze nhos, nhos faze-s tanbê. Aliás é kel-li ki Lei i Profétas krê fla.

KAPÍTLU 17

DEUS TA OBI TUDU TIPU DI ORASON?

(Filipenses 4:6, 7 ) Ka nhos fika preokupadu dimás ku ninhun kuza, má na tudu kuza, nhos faze orason ku súplika, djuntu ku agradesimentu, pa nhos dexa Deus sabe kuzê ki nhos krê; ⁷ i pas di Deus, ki ningen ka ta konsigi ntende, ta guarda nhos korason i nhos pensamentu através di Kristu Jizus.

(Tiago 2:26 ) Sima korpu sen spritu sta mortu, asi tanbê fé sen óbras sta mortu.

(Mateus 6:9-13 ) “Nton, nhos faze orason asi: “‘Nos Pai ki sta na Séu, pa bu nómi ser santifikadu. ¹⁰ Faze bu Reinu ben. Pa bu vontadi fazedu na Séu, asi tanbê na Téra.¹¹ Da-nu pon pa es dia di oji; ¹² i purdua-nu nos dívida, sima nu ta púrdua ken ki sta debe-nu. ¹³ I ka nhu leba-nu pa tentason, má libra-nu di Malvadu.’

(Apocalipse 14:6 ) N odja otu anju ta bua na meiu di séu, el tinha notísias sábi ki ta dura pa tudu ténpu, pa fla pa kes algen ki ta mora na Téra, pa tudu nasons, tribus, línguas i povus.

(Filipenses 4:13 ) Pa tudu kuza N ten forsa pamodi kel ki ta da-m puder.

KAPÍTLU 18

N DEBE DA NHA VIDA PA DEUS I BATIZA?

(João 17:3 ) Vida pa tudu ténpu é kel-li: pa es konxe-u abo, úniku Deus verdaderu, i kel ki bu manda, Jizus Kristu.

(1 Pedro 4:2 ) pa el pode vive réstu di se ténpu na karni, ka pa faze dizeju di ómis más, má pa faze vontadi di Deus.

(Mateus 28:19 ) Pur isu, nhos bai i nhos faze disiplus di algen di tudu nasons, nhos batiza-s na nómi di Pai, di Fidju i di spritu santu,

KAPÍTLU 19

KONTÍNUA TA SER AMIGU DI JEOVÁ

(Mateus 22:37 ) El fla-l: “‘Ama Jeová, bu Deus, di tudu bu korason, di tudu bu alma i di tudu bu menti.’

(1 João 5:3 ) Pamodi amor di Deus ta siginifika kel-li: pa nu obi ku se mandamentus; i se mandamentus é ka pizadu,

(1 Tessalonicenses 5:17 ) Nhos faze orason sénpri.

(1 Coríntios 15:58 ) Pur isu nhas irmon ki N ta ama, nhos mante firmi, ka nhos muda. Nhos ten sénpri txeu pa faze na óbra di Sinhor, pamodi nhos sabe ma nhos trabadju duru pa Sinhor é ka atoa.

(Colossenses 3:13 ) Nhos kontinua ta suporta kunpanheru i ta púrdua kunpanheru di korason, si algen tene algun razon di kexa kóntra kel otu. Sima Jeová púrdua nhos di korason, nhos tanbê nhos faze mésmu kuza.