Speransa — Ta djuda-nu mê ô el é sô iluzon?

DANIEL tinha sô 10 anu, má dja tinha un anu ki el staba ta luta ku kánser. Kes dotor perde speransa i se famílias i amigus tanbê. Má Daniel ka perde speransa. El ta kriditaba ma el ta biraba grandi i ma un dia el ta djudaba na piskiza pa atxa kura pa kánser. El tinha más speransa inda pamodi un dotor ki ta ntendeba dretu kel tipu di kánser, staba ta ben djuda-l na kel tratamentu. Má kantu kel dia txiga, kel dotor tevi ki dismarka kel vizita pamodi mau ténpu. Daniel fika dizanimadu. Pa primeru bês, el perde vontadi di vive i el móre poku dia dipôs.

Un profisional di saúdi ki studa sobri modi ki speransa ô falta di speransa ta afeta saúdi, konta stória di Daniel. Talvês dja bu kustuma obi stórias sima kel-li. Pur izénplu, un algen di idadi pode sta kuazi ta móre, má el tene gana pa un kuza inportanti, ki dja el dura ta spéra kontise. Pode ser vizita di un algen ki el ta ama ô un data inportanti na se vida. Óras ki kel dia txiga i el pasa, mórti ta ben lógu dipôs. Kuzê ki sta nvolvidu na kes kazu li? Speransa é un forsa ki ta djuda mê, sima alguns ta kridita?

Kada bês más dotor ki ta faze piskiza, ta fla ma un atitudi i sentimentus puzitivu ku speransa ta afeta vida ku saúdi di algen txeu. Má é ka tudu algen ki ta pensa si. Alguns piskizador ta fla ma kel-li ka sta di akordu ku siênsia. Es ta kridita ma óras ki nos korpu sta duenti, kel-li ka ten nada aver ku kel ki nu ta pensa ô nu ta xinti.

É klaru ki é ka di gósi ki alguns pesoa ta fla ma speransa é ka inportanti. Ten más di dôs mil anu ki Aristóteles, un filózofu gregu, perguntadu sobri kuzê ki é speransa i el responde ma speransa “é sonhu di un ómi kordadu.” Txeu ténpu dipôs, un pulítiku na Mérka, ki txoma Benjamin Franklin, fla na trósa: “Ken ki ta vive di speransa ta móre di fómi.”

Nton, kal ki é verdadi sobri speransa? Speransa é sô un dizeju ô un manera di atxa konsolu na kuzas ki é sô iluzon? Ô ten bons motivu pa nu kridita ma speransa é ka sô kel-li, má é un kuza ki nos tudu meste pa ten bon saúdi, ser filís, ki é ka sô iluzon, má ki ta djuda-nu mê?

Pamodi ki nu meste ten speransa?

KUZÊ ki ta kontiseba ku Daniel, kel mininu ki nu pâpia di el na kel otu artigu ki tinha kánser, si el kontinuaba ta ten un speransa fórti? El ta venseba se luta kóntra kánser? Inda el staba bibu? Ti kes algen ki ta kridita más txeu ma speransa é bon pa nos saúdi, ka ta respondeba sin pa kes pergunta li. Kel-li ta inxina-nu un kuza inportanti. Nu ka debe izajera na kel ki nu ta pensa sobri speransa. El é ka soluson ô kura pa tudu kuza.

Na un entrivista ki dotor Nathan Cherney da na kanal di notísias CBS News, el pâpia sobri prigu di izajera na manera ki algen ta nkara speransa óras ki el ta kuida di algen ki ten duénsa gravi. El fla ma “na alguns situason, maridu dja kustuma xatia ku se mudjer i el fla-l ma el ka sforsa pa ten un atitudi i pensamentu puzitivu.” Dotor Nathan fla tanbê: “Kel ideia li sobri speransa poi pesoas ta ten un iluzon, ma es ta konsigi kontrola pa kel tumor ka omenta kada bês más. Pur isu, óras ki kel duénsa ta piora é sima ki es ta fla ma es ki ka konsigi kontrola-l, i kel-li é ka dretu.”

Na verdadi, kes ki sta ta sufri pamodi un duénsa ki ka ten kura, es ta luta txeu, ti ki es ta fika sen forsa. I óras ki es ta kulpa ses kabésa, kel-li é un pézu txeu dimás pa es karega, i kel-li é últimu kuza ki kes algen ki ta ama-s ta krê pa kontise. Kel-li krê fla nton ma speransa ka ten ninhun valor?

Nau, el ten sin. Dotor Nathan ta kuida di kes algen ki tene duénsa gravi. Má obijetivu prinsipal di kes tratamentu ki el ta faze é ka kura kel duénsa ô poi kel duenti ta vive más txeu. Má é pô-l ta sufri más poku timenti el sta bibu. Kes dotor spesialista ki ta trabadja na kel ária li, ta kridita na valor di kes tratamentu ki ta poi kes algen ki sta duenti xinti más kontenti, ti mésmu kes ki sta más piór. Ten próvas klaru ma speransa pode faze kel-li i mutu más.

Valor ki speransa ten

Dotor Gifford-Jones, ki é un jornalista i médiku, fla ma “speransa é un tratamentu ki ta djuda.” El analiza rezultadus di txeu studu ki dja fazedu pa odja modi ki kes duenti ki sta kuazi ta móre i ki dadu forsa pa lida ku kel duénsa, djudadu. Es ta kridita ma kel tipu di ajuda li ta poi pesoas kontinua ku más speransa i ku un atitudi puzitivu. Un studu ki fazedu na 1989, mostra ma kes duenti ki resebe kel ajuda li vive pa más ténpu, nbóra kes piskiza ki fazedu ka dura li, ka ta mostra kel-li klaru. Má studu konfirma ma kes duenti ki resebe ajuda pa lida ku kel duénsa, es ta ten ménus depreson i es ta xinti ménus dór di ki kes ki ka ta resebe kel ajuda li.

Un otu studu ki fazedu analiza modi ki nos atitudi ta afeta manera ki nu ta lida ku kes duénsa ki ten aver ku korason. Un grupu di más di 1.300 ómi analizadu ku txeu kuidadu pa odja si es tinha un pontu di vista puzitivu ô negativu sobri vida. Dipôs ki es kunpanhadu duránti 10 anu, studu mostra ma 12 pursentu di kes ómi dizenvolve algun duénsa ki ten aver ku korason. Entri kes ómi, nunbru di kes ki tinha atitudi negativu éra kuazi dôs bês más txeu di ki kes ki tinha atitudi puzitivu. Laura Kubzansky, profesóra ki ta djuda na piskiza sobri saúdi i konportamentu na sosiadadi na skóla di saúdi pa públiku di Harvard, fla: “Maior párti di kes próva ki es ta uza pa fla ma ‘pensamentu puzitivu’ é bon pa saúdi ka ten bazi na siênsia. Má kel studu li, el é diferenti pamodi el mostra un di kes primeru próva di kunfiansa, ku bazi na piskiza di dotoris, ki ta apoia kel ideia ma ten un atitudi puzitivu ta djuda algen lida ku kes duénsa di korason.”

Alguns piskiza ta mostra ma kes ki ta atxa ma ses saúdi é fraku, ta dura más ténpu mê pa rekupera dipôs di un operason, di ki kes ki ta atxa ma es ten bon saúdi. Diskubridu ma kes ki ten atitudi puzitivu ta vive más txeu. Un studu analiza modi ki atitudi puzitivu ô negativu sobri bedjisa ta afeta kes algen di idadi. Dipôs ki es mostradu alguns mensaji ki ta da ideia ma algen di idadi ten más sabedoria i spiriénsa, es kumesa ta anda ku más forsa i dispozison. Na verdadi, es midjora di tal manera ki rezultadu ki es tevi konparadu ku 12 simana di izersísius!

Pamodi ki un atitudi puzitivu i speransa é bon pa saúdi? Talvês sientistas i dotoris inda ka ta ntende tudu sobri korpu i menti di algen pa es splika kel-li. Má simé, kes algen ki ta studa kes asuntu li txiga na alguns konkluzon ki ta da ki pensa. Pur izénplu, un dotor di neurolojia fla: “Nu ta xinti sábi óras ki nu sta kontenti i nu tene speransa. Óras ki nu ta xinti si, nos korpu ta sta midjór pamodi nu ka ta sta preokupadu. Nton kel-li é más un kuza ki algen pode faze pa tenta kontinua ku bon saúdi.”

Alguns dotor, pisikólogu ô sientistas pode fika spantadu ku kel ideia li, má kel-li é ka un kuza novu pa kes ki ta studa Bíblia. Dja ten uns três mil anu ki Deus da rei Salumon sabedoria pa skrebe kel-li: ‘Korason kontenti é un bon ramedi, má spritu dizanimadu ta kaba ku forsa di algen.’ (Provérbios 17:22) Repara ma testu ka ta fla ma un korason kontenti ta kura tudu duénsa. Sô el ta fla ma el ‘é un bon ramedi’.

Nton talvês nu pode pensa: Si speransa é sima un ramedi, nton tudu dotor debe pasa-l, ka simé? Má speransa ka ta djuda-nu ten sô un bon saúdi, el ta djuda-nu di monti otus manera.

Modi ki atitudi puzitivu ô negativu ta afeta bu vida

Kes algen ki ta piskiza, diskubri ma kes ki ten atitudi puzitivu ten vantaji na txeu ária di ses vida. Es ta ten bons rezultadu na skóla, na trabadju i ti na disportu. Pur izénplu, fazedu un piskiza ku atlétas di konpitison sô ku mudjeris. Kes algen ki ta trenaba es, da kes piskizador un informason konplétu di ses kapasidadi kómu atlétas. Dipôs es entrivista kes mudjer pa es analiza dretu modi ki ses kunfiansa staba. Rezultadu ki kes piskizador tevi sobri kunfiansa di kes atléta, ta djudaba es sabe midjór si kes atléta, duránti konpitison es ta tinha bon rezultadu ô nau. I kes informason li éra más izatu di ki kes ki trenador tinha. Pamodi ki kunfiansa i atitudi puzitivu ta afeta-nu di kel manera li?

Piskizadoris dja studa txeu sobri rezultadu di un atitudi negativu. Duránti anus 60, fazedu alguns spiriénsa sobri konportamentu di animal i es tevi rezultadu ki es ka staba ta spéra. Es diskubri ma óras ki un animal sta na un situason kasábi, ki el ka ta pode muda, ku ténpu, el ta prende vive ku kel situason i el ka ta tenta muda-l más, sikrê se situason muda dipôs. Tanbê es odja ma algen pode sufri di kel mésmu manera li. Pur izénplu, kes ki partisipa na un studu, es podu un barudju kasábi i es fladu ma es pode para kel barudju si es konsigi prende uza uns boton ki ta para kel barudju. Es konsigi para kel barudju.

Es manda un otu grupu faze mésmu kuza, má na ses kazu kalka kes boton ka para kel barudju. Sima ta da pa imajina, txeu algen di kel sugundu grupu fika dizanimadu. Na kel mésmu dia, es fazedu otus testi má es ka staba nen ku gana di faze kel ki es mandadu. Es fika ku sertéza ma sikrê es sforsa, es ka ta tinha ninhun rezultadu. Má mésmu na kel sugundu grupu li, kes algen ki tinha un atitudi puzitivu, es ka dizisti, nen es ka fika dizanimadu.

Dotor Martin Seligman, ki é un di kes algen ki djuda na faze kes spiriénsa li, disidi studa más dretu sobri atitudi puzitivu i negativu. El piskiza txeu sobri manera di pensa di kes algen ki ta kustuma xinti dizanimadu. I el txiga konkluzon ma atitudi negativu ta trapadja dia-dia di pesoas i el pode ti inpidi-s di faze kalker kuza. Dotor Martin fla ma un atitudi negativu i rezultadus ki el ta traze pode rezumidu di kel manera li: “Na kes 25 anu ki N studa, N fika konvensidu ma si nu ta kustuma ten un atitudi negativu, si nu ta atxa ma tudu kuza mariadu na nos vida é nos kulpa, ma kel-la ka ta muda i ma el ta afeta tudu kuza ki nu ta faze, nu ta kaba pa fadja más txeu di ki si nu tinha un atitudi puzitivu.”

Más un bês, kel-li pode parse nobidadi pa alguns algen gósi, má el é ka nobidadi pa kes ki ta studa Bíblia. Repara kuzê ki kel provérbiu li ta fla: ‘Si bu fika dizanimadu na dia di frónta, bu forsa ta fika poku.’ (Provérbios 24:10 ) Nton Bíblia ta dexa klaru ma fika dizanimadu i ten un atitudi negativu ta kaba ku nos forsa i kel-la ta inpidi-nu di aji. Má kuzê ki bu pode faze pa bu luta kóntra un atitudi negativu i ten más speransa i un atitudi más puzitivu na vida?

[Fotu]

Speransa pode djuda-nu txeu

Bu pode vense un atitudi negativu

MODI ki bu ta nkara difikuldadis ki bu ta pasa pa el? Txeu algen ki ta ntende di kel asuntu li, ta fla ma manera ki bu ta responde kel pergunta li, ta mostra si bu ten un atitudi negativu ô puzitivu. Nos tudu nu ta pasa pa difikuldadis na vida. Má alguns algen ta pasa pa difikuldadis más di ki otus. Nton pamodi ki alguns algen ta konsigi vense prublémas i es ta sta prontu pa más dizafiu timenti otus ta dizisti faxi dianti di kalker difikuldadi, ti kes más pikinoti?

Pur izénplu, imajina ma bu sta ta djobe trabadju. Bu ta bai pa un entrivista má es ka ta kontrata-u. Kuzê ki bu ta pensaba? Bu pode pensa ma prubléma sta na bo i ma bu situason nunka ka ta muda, i bu ta fla bu kabésa: ‘Ningen ka ta kontrataba un algen sima mi. Nunka N ka ta atxa trabadju.’ Ô inda más piór, bu pode dexa kel un situason li pô-u ta pensa ma tudu kuza na bu vida ta da mariadu, i bu ta fla bu kabésa: ‘N ka ta faze nada dretu. N ka ta sirbi pa nada.’ Na kes dôs kazu li, kel algen sta ta mostra un atitudi txeu negativu.

Modi ki bu pode luta kóntra un atitudi negativu

Kuzê ki bu pode faze? Primeru kuza ki é txeu inportanti, é presta atenson i rekonhese kes pensamentu negativu ki bu ta ten. Dipôs bu meste luta kóntra es. Tenta pensa na otus motivu pamodi ki un kuza mariadu kontise na bu vida. Pur izénplu, é verdadi mê ma bu ka kontratadu pamodi bu ka ta sirbi na ninhun otu trabadju? Ô é pamodi kel algen ki entrivista-u staba ta djobe un algen ki ten otus kapasidadi?

Si bu konsentra na kel ki é verdadi mê, bu ta odja ma alguns di kes pensamentu negativu é izajeradu. Pamodi bu ka setadu es un bês li, kel-li krê fla ma bu ka ta sirbi pa nada? Ô bu ta konsigi pensa na algun otu ária di bu vida, sima atividadis spritual, na manera ki bu ta trata bu família ô bus amigu, undi ki bu pode ten algun susésu? Prende odja kuza sénpri di manera puzitivu, ka sima un disgrasa. Afinal, bu ta konsigi sabe si nunka bu ka ta atxa un trabadju? Ten monti kuza ki bu pode faze pa bu ka pensa di un manera negativu.

Pensamentu puzitivu ta djuda-nu alkansa métas

Na kes últimu anu, piskizadoris da un splikason di kuzê ki é speransa, má ka mutu konplétu. Es ta fla ma speransa ta poi algen kridita ma el é kapás di alkansa se obijetivus. Sima kel otu artigu ta ben mostra, speransa na verdadi é más di ki kel-li, má kel splikason li ta sirbi di txeu manera. Si nu konsentra na speransa di kel manera li, el ta djuda-nu dizenvolve un pensamentu más puzitivu, ki ta pô-nu ta alkansa nos obijetivus.

Pa nu kridita ma nu ta konsigi alkansa nos métas na futuru, nu meste ten un lista di métas ki dja nu konsigi alkansa. Si bu ta atxa ma bu ka ten un lista di métas ki dja bu konsigi alkansa, talvês é bon bu pensa dretu na kes méta ki bu ta poi pa bu kabésa. Primeru, bu ten algun méta? É faxi bu dexa kuzas di dia-dia ka dexa-u para pa pensa na kuzê ki bu krê faze di verdadi ku bu vida, na kuzê ki é más inportanti pa bo. Sobri es prinsípiu di poi métas klaru, nu ta odja más un bês ma Bíblia, dja ten txeu ténpu, da-nu un bon lison: ‘Pa nhos konfirma kuzê ki é más inportanti’. — Filipenses 1:10.

Óras ki dja nu sabe kal ki é nos métas, ta fika más fásil skodje kes méta prinsipal na txeu ária di nos vida, sima na nos amizadi ku Deus, na nos família, na nos trabadju i na skóla. Má é inportanti nu ka poi txeu méta lógu na komésu. Tanbê é midjór nu skodje kes ki nu sabe ma nu ta pode alkansa sen txeu difikuldadi. Si un méta é difísil dimás, nu pode fika dizanimadu i dizisti. Pur isu normalmenti é midjór panha kes méta grandi pa nu alkansa na txeu ténpu i dividi-s na métas pikinoti pa nu alkansa na poku ténpu.

Ta fladu ma “si bu krê un kuza, bu ta konsigi.” I alvês ta parse ma kel-li é verdadi. Óras ki nu disidi kal ki é nos métas prinsipal, nu meste krê i sforsa pa alkansa-s. Nu pode fika más disididu na alkansa nos métas si nu pensa na pamodi ki es é inportanti i si nu pensa na rekonpénsas ki nu ta ten óras ki nu alkansa-s. É klaru ki difikuldadis ta parse, má nu debe pensa ma es é dizafius ki nu pode vense, envês di pensa ma es é prublémas ki ka ten soluson.

Má tanbê nu debe pensa na kuzê ki nu meste faze pa nu alkansa nos obijetivus. Profesor Charles Snyder, ki studa txeu sobri valor di speransa, ta fla ma talvês é bon pensa na maneras diferenti di alkansa un méta. Asi, si nu ka konsigi alkansa nos méta di kel primeru manera, nu ta tenta di kel sugundu manera, di kel tirseru manera, i nu ta ba ta tenta.

Profesor Charles fla tanbê ma é bon prende rekonhese óras ki txiga ténpu di troka un méta pa kel otu. Si nu ka sta konsigi alkansa un méta di ninhun manera, é ka bon fika ta pensa na el un bês bai pamodi kel-li ta dizanima-nu. Má si nu troka-l pa un méta ikilibradu, nu ta ten más un kuza pa da-nu speransa.

Bíblia ta pâpia di un izénplu ki ta djuda-nu ntende kel-li. Rei Davidi krê fazeba ténplu pa se Deus, Jeová. Má Deus fla Davidi ma éra se fidju Salumon ki ta tinha kel priviléjiu li. Envês di el insisti i fika xatiadu pamodi kuzas ka bai sima el ta gostaba, Davidi muda se métas. El konsentra na djunta kel ki se fidju ta mesteba pa faze kel konstruson li. — 1 Reis 8:17-19; 1 Crónicas 29:3-7.

Sikrê nu konsigi ten más speransa pamodi nu vense un atitudi negativu i nu pasa ta ten atitudi puzitivu i bons méta, talvês inda na alguns kuza nu pode meste más speransa. Pamodi? Pamodi txeu di kes kuza ki ta pô-nu sen speransa, nu ka ta pode kontrola-s di ninhun manera. Óras ki nu ta pensa na kes prubléma grandi dimás ki algen na Téra ta pasa pa el, sima pobréza, géra, injustisa, amiasa di duénsa, di mórti, modi ki nu pode kontinua ta ten speransa simé?

[Fotu]

Si bu ka kontratadu pa un trabadju ki bu ta gostaba di ten, bu ta pensa lógu ma nunka bu ka ta atxa trabadju?

[Fotu]

Rei Davidi mostra un manera di pensa ikilibradu i el muda se métas kantu el tinha ki faze kel-li

Undi ki bu pode atxa speransa di verdadi?

IMAJINA ma bu rilóji para i ta parse ma dja el straga. Óras ki bu sai pa djobe un algen pa konpo-u el, bu ta atxa un monti algen ta faze publisidadi i ta fla ma es ta pode konpo-u bu rilóji. Alguns kuza ki uns ta fla ti é kontráriu di kel ki otus ta fla. Bu ta fika sen sabe kal di es ki bu ta da bu rilóji pa konpo. Má, i si bu fika ta sabe ma kel algen intilijenti ki inventa kel rilóji é bu vizinhu? Alén di kel-li, bu ta fika ta sabe ma el krê djuda-u sen resebe nada. Ta fikaba más fásil disidi, ka simé?

Gósi konpara kel rilóji ku bu kapasidadi di ten speransa. Si bu sta perde speransa, sima ta kontise ku txeu algen na es ténpu difísil, na undi ki bu ta djobe ajuda? Txeu algen ta fla ma es ta konsigi rezolve kel prubléma li, má txeu di kes konsedju ki es ta da é konfuzu i es ka sta di akordu ku kunpanheru. Nton bu ka ta atxa ma nu debe djobe ajuda na kel ki faze-nu i ki da-nu kapasidadi di ten speransa? Bíblia ta fla ma ‘el ka sta lonji di kada un di nos’ i ma el tene gana di djuda-nu. — Atos 17:27; 1 Pedro 5:7.

Bíblia ta djuda-nu sabe midjór kuzê ki speransa krê fla

Kel ki Bíblia ta fla sobri speransa é mutu más konplétu di ki kel ki dotoris, sientistas i pisikólogus ta fla oji. Kes palavra na Bíblia ki traduzidu pa ‘speransa’ siginifika spéra ku gana pa un kuza kontise i kridita ma un kuza bon ta kontise. Ten dôs kuza inportanti ki ta faze párti di speransa. Primeru é krê pa un kuza bon kontise i sugundu é ten bazi pa kridita ma kel kuza bon ta kontise mê. Speransa ki Bíblia ta da é ka sô iluzon ma kuzas bon ta kontise. El ten bazi na próvas i na kuzas ki é verdadi.

Nton speransa é sima fé, ki ka debe ten bazi na iluzon, má na próvas. (Hebreus 11:1 ) Má Bíblia ta mostra ma fé i speransa ten un diferénsa. — 1 Coríntios 13:13.

Pur izénplu, óras ki bu ta pidi un amigu di kunfiansa pa faze-u un kuza, talvês bu ta ten speransa ma el ta djuda-u. Bu speransa ten bazi pamodi bu ten fé na bu amigu. Bu odja-l ta aji ku bondadi i ta faze kuzas dretu na pasadu. Bu fé ku bu speransa sta ligadu ku kunpanheru, es ta dipende di kunpanheru, má es é ka mésmu kuza. Modi ki bu pode ten speransa na Deus?

Kal ki é bazi pa ten speransa?

Deus é fonti di speransa di verdadi. Na ténpu ki Bíblia skrebedu, es ta txomaba Jeová di ‘speransa di Israel’. (Jeremias 14:8 ) Kalker speransa ki se povu pode kunfiaba na el, ta binha di Jeová. Nton Jeová éra speransa di Israel. Kel speransa ka éra sô un dizeju. Deus da-s un bazi suguru pa es ten speransa. Pa manera ki Jeová lida ku Israel duránti monti séklu, el mostra ma el ten fama di kunpri se promésas. Juzué, ki éra líder di Israel, fla povu: ‘Nhos sabe ma di tudu kes bon promésa ki Jeová, nhos Deus, faze nhos, ka ten nen un palavra na es ki fadja.’ — Josué 23:14.

Dja pasa milharis di anu, má Jeová ka muda. El kontinua kel mê. Na Bíblia nu ta atxa txeu promésa sábi di Deus, tanbê nu ta atxa skrebedu stória izatu di modi ki kada un di es kunpri. Kes profesia di Bíblia, es é di kunfiansa di tal manera, ki alguns di es skrebedu sima si dja es kunpriba na kel ténpu ki es skrebedu.

É pur isu ki nu pode fla ma Bíblia é un livru di speransa. Sima bu ta ba ta studa modi ki Deus lida ku pesoas, bu ta ten más motivu pa speransa ki bu ten na el fika kada bês más fórti. Apóstlu Polu skrebe: ‘Tudu kes kuza ki skrebedu antis, skrebedu pa nos instruson, asi, pa nu pode ten speransa através di nos kapasidadi di aguenta firmi i di konsolu ki nu ta resebe di Skrituras.’ — Romanos 15:4.

Kal ki é speransa ki Deus ta da-nu?

Na ki óra ki nu ta xinti más txeu ma nu meste di speransa? É ka óras ki nu sta kuazi ta móre? Ô algen ki nu ta ama móre? Má txeu algen ta xinti ma é na kes momentu li própi, ki speransa é un iluzon. Si nu pensa dretu, ka ten kuza ki ta dexa algen más dizusperadu di ki mórti. El ta pirsigi nos tudu. Nu ka ta pode inpidi-l di txiga na nos un dia, i ka ten nada ki nu pode faze pa tadja-l. Ta da pa ntende pamodi ki Bíblia ta fla ma mórti é ‘últimu inimigu’. — 1 Coríntios 15:26.

Nton, modi ki nu pode ten speransa na kel situason li? Kel versíklu di Bíblia ki ta fla ma mórti é últimu inimigu ta fla tanbê ma ‘ta ben kabadu’ ku kel inimigu li. Jeová Deus ten más puder ki mórti. Dja el da próva di kel-li monti bês. Di ki manera? Kantu el resusita alguns algen ki móre. Bíblia ta pâpia di 9 situason diferenti ki Deus uza se puder pa torna poi alguns algen ki móre vive otu bês.

Na un di kes resureison más konxedu, Jeová da se Fidju, Jizus, puder pa resusita Lázaru ki éra se amigu ki el kreba txeu, i ki dja tinha kuatu dia ki el moreba. Jizus ka faze kel-li sukundidu, má el faze-l dianti di monti algen. — João 11:38-48, 53; 12:9, 10.

Talvês bu pode sta ta pergunta: ‘Pamodi ki kes algen resusitadu? Di tudu manera, es ka bira bédju i es móre otu bês?’ Sin, é simé. Má pamodi kes stória li ki kontise mê, nu ka ta ten sô un dizeju pa kes algen ki nu krê txeu ben vive otu bês; nu ta ten motivu pa kridita ma kel-li ta ben kontise. Kel-li krê fla ma nu ta ten speransa di verdadi.

Jizus fla: ‘Ami é resureison i vida.’ (João 11:25 ) El é kel algen ki Jeová ta ben da puder pa ben resusita algen na mundu interu. Jizus fla: ‘Ta ben txiga kel óra ki tudu kes ki sta na sipultura mimorial ta ben obi se vós [ô vós di Kristu] i es ta sai’. (João 5:28, 29 ) Tudu kes algen ki sta ta durmi na sipultura pode ben vive otu bês na un paraízu na Téra.

Proféta Isaías pâpia di resureison di un manera ki ta toka nos korason. El fla: ‘Bus mortu ta ben vive. Nhas kadabra ta ben labanta. Nhos korda i nhos grita di alegria, nhos ki ta mora na téra! Pamodi se orbadju é sima orbadju di palmanhan, i Téra ta ben dexa kes inpotenti na mórti vive otu bês.’ — Isaías 26:19.

Kel-li ka ta konsola-nu? Mortus sta na kel situason más suguru ki nu pode imajina, sima un bebé ki sta protejedu na bariga di se mai. Na verdadi, kes ki sta diskansa na sipultura, sta guardadu na mimória perfetu i sen limiti di Deus Tudu-Poderozu. (Lucas 20:37, 38 ) Ka ta dura, es ta kordadu pa ben vive otu bês, es ta resebedu na un mundu filís i xeiu di amor. Es ta ben xinti sima na un família ki tene gana di resebe ses bebé! Nton, ten speransa ti mésmu pa kes algen ki dja móre.

Kuzê ki speransa pode faze pa bo

Polu ta inxina-nu txeu sobri valor di speransa. El fla ma speransa é un párti txeu inportanti di armadura spritual i ma speransa é sima un kapaseti. (1 Tessalonicenses 5:8 ) Kuzê ki el krê flaba ku kel-li? Na ténpu ki Bíblia skrebedu, trópas ta uzaba un kapaseti di féru na géra, i se baxu es ta poba un otu proteson di lan ô di péli. Pur isu, sikrê kel trópa dadu ku algun kuza na kabésa, kel kapaseti ta protejeba el di mórti. Nton, Polu krê flaba ma sima un kapaseti ta proteje kabésa di un algen, speransa ta proteje menti di algen, ô se kapasidadi di pensa. Si bu speransa ten bazi na vontadi di Deus, bu ta kontinua ta xinti pas déntu bo i bu ka ta fika dizusperadu óras ki bu pasa pa situasons difísil. Bu ka ta atxa ma nos tudu meste di un kapaseti sima kel-li?

Polu konpara speransa ki ten aver ku vontadi di Deus ku otu kuza. El skrebe: ‘Nu ten kel speransa li, sima un ánkura pa alma, ki é suguru i firmi’. (Hebreus 6:19 ) Barku inkadja ku Polu más di ki un bês, má el skapa ku vida. Pur isu el sabia dretu kal ki é valor di un ánkura. Óras ki ta kontiseba un tenpistadi, kes algen na barku ta botaba ánkura na mar. Si kel ánkura fikaba prézu na fundu di mar, barku ta tinha un xansi di skapa di kel tenpistadi, envês di mar leba-l i el fika ta da na rótxa, ti ki el fika tudu distruídu.

Di mésmu manera, si kes promésa di Deus é un speransa ‘suguru i firmi’ pa nos, kel speransa li pode djuda-nu aguenta firmi na es ténpu difísil ki nu sta ta vive na el, ki é sima un tenpistadi fórti. Jeová promete ma ka ta dura ta ben txiga kel ténpu ki algen ka ta ben sufri más pamodi géra, krimi, tristéza nen mórti. (Djobe kuadru na pájina 10.) Si nu pega riju na kel speransa li, nu ta konsigi mante lonji di prigu, pamodi kel-li ta djuda-nu vive di akordu ku prinsípius di Deus i ivita konportamentu mariadu i konfuzon ki sta na mundu di oji.

Jeová ta da-u kel speransa li tanbê. El krê pa bu sprimenta modi ki é kel vida ki el tene pa bo. El krê ‘pa tudu tipu di algen salva’. Modi? Primeru, kel algen meste ten ‘konhisimentu izatu di verdadi.’ (1 Timóteo 2:4 ) Kes algen ki skrebe kel revista li, ta insentiva-u pa bu ten es konhisimentu di verdadi di Palavra di Deus ki ta da-u vida. Através di kel konhisimentu li, Deus ta da-u un speransa ki é mutu más midjór ki kalker otu ki mundu pode da-u.

Si bu ten kel speransa li, nunka bu ka ta xinti bo sô, pamodi bu ta ten sertéza ma Deus pode da-u forsa ki bu meste pa bu alkansa kalker méta ki sta di akordu ku se vontadi. (2 Coríntios 4:7; Filipenses 4:13 ) É ka kel tipu di speransa li ki bu meste? Nton, si bu ta atxa ma bu meste speransa i bu sta ta djobe-l, ka bu dizisti. Bu ta konsigi atxa-l!

[Kuadru/Fotu]

Motivus pa ten speransa

Verdadis di Bíblia ki sta dibaxu pode djuda-nu bira nos speransa más fórti:

◼ Deus promete da-nu un futuru filís.

Se Palavra, Bíblia, ta fla ma Téra interu ta ben bira un paraízu. Kes algen ki ta ben mora na el ta ten alegria i pas. — Salmo 37:11, 29; Isaías 25:8; Apocalipse 21:3, 4.

◼ Deus ka pode konta mintira.

El ta ôdia mintira, ka ta nporta é di ki manera. Dja ki el é puru i linpu, é inposível el konta mintira. — Provérbios 6:16-19; Isaías 6:2, 3; Tito 1:2; Hebreus 6:18.

◼ Puder di Deus ka ten limiti.

Sô Jeová ki é Tudu-Poderozu. Ka ten nada na séu ku téra ki pode inpidi-l di kunpri se promésas. — Êxodo 15:11; Isaías 40:25, 26.

◼ Deus krê pa bu vive pa tudu ténpu.

 — João 3:16; 1 Timóteo 2:3, 4.

◼ Deus sénpri ta spéra pa nu da-l nos midjór.

El ka ta konsentra na nos érus i difetus, má na nos bons kualidadi i sforsu ki nu ta faze. (Salmo 103:12-14; 130:3; Hebreus 6:10 ) El ta spéra ma nu ta faze kuzas dretu i el ta fika kontenti óras ki nu faze kel-la. — Provérbios 27:11.

◼ Deus promete ma el ta djuda-u kunpri bus méta ki sta di akordu ku se vontadi.

Sérvus di Deus nunka ka meste xinti sen speransa. Deus ta da-nu txeu spritu santu, kel forsa más grandi ki izisti pa djuda-nu. — Filipenses 4:13.

◼ Speransa na Deus nunka é ka é atoa.

Nu pode kunfia na el, el é fiel, nunka el ka ta diziludi-nu. — Salmo 25:3.

[Fotu]

Speransa ta proteje menti sima kapaseti ta proteje kabésa

[Fotu]

Speransa ku bazi na próvas é sima un ánkura ki ta djuda algen aguenta firmi

[Donu di fotu]

Courtesy René Seindal/Su concessione del Museo Archeologico Regionale A. Salinas di Palermo