Kuzê ki Bíblia ta fla sobri da?

Respósta di Bíblia

Bíblia ta insentiva-nu pa nu da di livri vontadi i di korason. El ta fla ma si nu faze si, nu ta fika kontenti i kel algen ki resebe algun kuza ta fika kontenti tanbê. (Provérbios 11:25; Lucas 6:38) Jizus fla: ‘É más sábi da di ki toma.’ — Atos 20:35.

Na ki situasons ki Deus ta fika kontenti óras ki nu ta da?

Deus ta fika kontenti óras ki nu ta da di livri vontadi. Bíblia ta fla: ‘Kada un di nhos, nhos faze sima nhos disidi na korason, ka kóntra vontadi nen pa obrigason, pamodi Deus ta ama ken ki ta da ku alegria.’ — 2 Coríntios 9:7, nóta di rodapé.

Da di korason ta faze párti di ‘kel tipu di adorason’ ki Deus ta seta. (Tiago 1:27, nóta di rodapé) Si nu djuda di korason un algen ki sta meste, nu sta agrada Deus i el ta odja kel-li sima si é el ki nu sta pista algun kuza. (Provérbios 19:17) Bíblia ta inxina ma Deus ta rekonpensa-nu si nu faze si. — Lucas 14:12-14.

Na ki situasons ki Deus ka ta fika kontenti óras ki nu ta da?

Si nu da ku mau intenson. Pur izénplu:

Pa txoma atenson pa nos kabésa. — Mateus 6:2.
Pa nu pode ganha algun kuza. — Lucas 14:12-14.
Pa Deus da-nu salvason. — Salmo 49:6, 7.

Si kel ki nu da ta sirbi pa faze kuzas ki Deus ka gosta. Pur izénplu, ta sérba mariadu da un algen dinheru pa el bai djuga batóta ô pa el kunpra dróga ô bebida alkólika. (1 Coríntios 6:9, 10; 2 Coríntios 7:1) Tanbê, si un algen ki ka sta ta trabadja i ka ten nada ki ta inpidi-l, ka ta sérba dretu nu fika ta djuda-l. — 2 Tessalonicenses 3:10.

Si nu ta da otus algen ti dimás ki ta faze falta pa nos família. Bíblia ta inxina ma xéfis di família debe da ses família kel ki es ta meste. (1 Timóteo 5:8) É eradu un xéfi di família da otus algen ti dimás ti ki se própi família ta fika ku falta. Jizus kondena kes ki ta negaba djuda ses mai ku ses pai, ki dja staba algen grandi, pamodi es ta flaba ma tudu kel ki es tinha éra ‘un prizenti pa Deus’. — Marcos 7:9-13.

Testus di Bíblia ki ta pâpia sobri djuda otus ku kel ki nu ten

Provérbios 11:25: ‘Algen ki gosta di da ta ten más txeu, i ken ki ta konsola otus tanbê ta ser konsoladu.’

Kuzê ki kel-li krê fla: Si nu gosta di da, nu ta fika kontenti i kel algen ki resebe algun kuza ta fika kontenti tanbê.

Provérbios 19:17: ‘Ken ki ta djuda póbri sta ta pista Jeová, i El ta rekonpensa-l pa kel-li.’

Kuzê ki kel-li krê fla: Deus ta atxa ma el ten un dívida ku kes algen ki ta djuda kes ki meste i el ta promete ma el ta rekonpensa-s pamodi kel-la.

Mateus 6:2: ‘Óras ki nhos da un póbri algun kuza, ka nhos toka tronbéta nhos dianti, sima kes algen finjidu ta faze, pa ómis pode ngaba-s.’

Kuzê ki kel-li krê fla: Nu ka debe da sô pa txoma atenson pa nos kabésa.

Atos 20:35: ‘É más sábi da di ki toma.’

Kuzê ki kel-li krê fla: Da di korason ta da-nu alegria.

2 Coríntios 9:7: ‘Kada un di nhos, nhos faze sima nhos disidi na korason, ka kóntra vontadi nen pa obrigason, pamodi Deus ta ama ken ki ta da ku alegria.’

Kuzê ki kel-li krê fla: Deus ta fika kontenti óras ki nu ta da di livri vontadi.