Modi ki pai pode kontinua amigu di ses fidju

“PAPÁ, modi ki bu sabe txeu kuza si?” Algun bês bu fidju dja faze-u kel pergunta li? Kel óra, talvês bu xinti orgulhu di ser pai. Má, i si el faze más di ki sô kel-la? Si el obi bus konsedju i el ten bons rezultadu, nu ka ten dúvida ma bu korason ta fikaba txeu kontenti.a — Provérbios 23:15, 24.

Má sima anu sta ba ta pasa, bu fidju sta kontinua ta dimira-u? Ô sima el sta ba ta kria, kel adimirason sta ta fika más poku? Modi ki bu pode kontinua amigu di bu fidju sima el sta ba ta bira más grandi? Primeru, nu ben odja alguns dizafiu ki kes ki é pai ta pasa pa el.

Três dizafiu ki más ta kontise

1. FALTA DI TÉNPU: Na txeu país, é pai ki ta trabadja más txeu pa sustenta família. Txeu bês, se trabadju ta iziji pa el fika fóra di kaza kuazi un dia interu. Na alguns lugar, pai ta pasa poku ténpu ku ses fidju. Pur izénplu, un piskiza ki fazedu na Fransa ka dura ta mostra ma normalmenti, un pai ta pasa ménus ki 12 minutu ku ses fidju.

PENSA NA KEL-LI: Kantu ténpu ki bu ta pasa ku bu fidju? Pamodi ki bu ka ta skrebe kantu ténpu ki bu ta pasa ku el pa dia duránti un simana ô dôs? Talvês bu pode fika spantadu ku rezultadu.

2. FALTA DI UN BON IZÉNPLU: Alguns ómi ka pasa txeu ténpu ku ses pai. Jean-Marie ki ta mora na Fransa fla: “N ta pasaba poku ténpu ku nha pai.” Modi ki kel-li afeta-l? El fla: “Kel-li traze-m prublémas ki nen N ka ta imajinaba. Pur izénplu, N ten difikuldadi na ten un bon konbérsu ku nhas fidju.” Má alguns ómi, nbóra es konxeba ses pai, es ka tinha un bon amizadi ku es. Filipi ki ten 43 anu, fla: “Nha pai tinha difikuldadi na mostra-m amor. Pur isu, oji N ten ki sforsa txeu pa N mostra nha fidju amor.”

PENSA NA KEL-LI: Bu ta atxa ma relason ki bu ten ku bu pai ta afeta manera ki bu ta trata bu fidju? Dja bu da kónta ma bu faze un kuza dretu ô mariadu sima bu pai ta fazeba? Ki kuzas?

3. IDEIAS MARIADU DI UNDI KI BU KRIA: Na alguns lugar ta atxadu ma kria fidjus é ka trabadju di pai. Luka ki kria na un país di Europa fla: “Na undi ki N kria ta pensadu ma kria fidjus é trabadju di mudjer.” Na otus lugar, kes ki é pai ta insentivadu pa ser duru na disiplina ses fidju. George, ki kriadu na un país di Áfrika fla: “Na nha kultura, pai ka ta brinka ku ses fidju pamodi es ta pensa ma kel-la ta poi fidjus ta perde ruspetu pa es. Pamodi kel-li, sénpri N tevi prubléma na faze un kuza sinplis sima sta djuntu ku nha fidju.”

PENSA NA KEL-LI: Na undi ki bu ta mora, kuzê ki es ta spéra di un pai? Es ta inxinadu ma kria fidjus é trabadju sô di mudjer? Es ta insentivadu na mostra ses fidju amor ô es ta pensa ma un ómi ka debe faze kes kuza li?

Si bo é pai i bu sta pasa pa un di kes dizafiu li, modi ki bu pode ten bons rezultadu? Odja alguns sujiston.

Kumesa timenti es sta pikinoti

Ta parse ma mininus ta nase ku dizeju di imita ses pai. Nton, pruveta kel dizeju ki es ten timenti inda es sta pikinoti. Modi ki bu pode faze kel-li? I modi ki bu pode ranja ténpu pa pasa ku el?

Sénpri ki da, dexa bu fidju djuda-u na kuzas ki bu ta faze na dia-dia. Pur izénplu, si bu sta faze trabadju na kaza, da-l un basora ô un pá pikinoti pa el ba ta djuda-u. Di sertéza, el ta fika kontenti di trabadja djuntu ku bo i imita bu izénplu! Pode leba más ténpu pa nhos faze kel trabadju, má kel-li ta poi nhos ta bira más amigu di kunpanheru i bu ta inxina-l ser un bon trabadjador. Dja ten txeu ténpu ki Bíblia ta insentiva pai pa inklui ses fidju na kes atividadi di dia-dia i pa pruveta kes oportunidadi li pa inxina-s i pa pâpia ku es. (Deuteronómio 6:6-9) Kel konsedju li ti inda ta sirbi.

Alén di trabadja djuntu ku bu fidju, ranja ténpu pa bu brinka ku el. Rezultadu di brinka djuntu é ka sô divirti. Piskizas ta mostra má óras ki pai ta brinka ku ses fidju pikinoti, kel-li ta djuda-s ser korajozu i ten gana di faze sénpri kuzas novu.

Ten un otu motivu ki ta mostra pamodi ki é inportanti pai brinka ku se fidju. Un piskizador, ki txoma Michel Fize, fla ma é más faxi un fidju fla se pai kuzê ki el sta ta xinti timenti es sta ta brinka djuntu. Pai tanbê pode pruveta kel oportunidadi li pa mostra amor pa se fidju na kuza ki el ta fla i el ta faze. Óras ki el ta faze kel-li, el ta inxina se fidju mostra amor tanbê. Un pai ki txoma André ki ta vive na Alimanha fla: “Kantu nha fidju éra pikinoti nu ta brinkaba txeu. N ta brasaba el i el prende faze mésmu kuza.”

Otu oportunidadi ki pai pode uza pa bira se amizadi ku se fidju más fórti é na óra di deta. Le-l sénpri un stória i obi-l ku atenson timenti el sta ta pâpia di kes kuza sábi i kes kuza tristi ki kontise ku el duránti kel dia. Si bu faze si, ta ser más fásil bu fidju kontinua ta pâpia ku bo sima el ta ba ta kria.

Nhos kontinua ta faze kuzas djuntu

Alguns jóven, nen ka ta liga kel sforsu ki pai ta faze pa pâpia ku es. Si sta parse ma bu fidju ka sta liga-u, ka bu pensa ma el ka krê pâpia nada ku bo. Talvês el pode abri ku bo si bu muda bu manera di pâpia ku el.

Jacques ki ta mora na Fransa, alvês ta xintiba txeu difikuldadi na papiaba ku se fidju Jérôme. Envês di obriga se fidju pa pâpia ku el, el ta faze un kuza diferenti. El ta djugaba bóla ku el. Jacques fla: “Dipôs di djuga ku el, nu ta xintaba na txon i nu ta diskansaba un kuzinha. Éra na kes óra la ki nha fidju ta abriba ku mi. N ta atxa, ma é kes momentu li ki nu ta pasaba djuntu ki pô-nu ta bira más amigu di kunpanheru.”

I si bu fidju ka gosta di disportu? André ta lenbra ma el ta pasaba bons momentu ta djobe pa stréla djuntu ku se fidju. El fla: “Nu ta xintaba di noti na varanda, nu ta kubriba pa nu ka xinti friu, nu ta tomaba un xá i nu ta fika ta djobe pa séu. Nu ta papiaba sobri kel ki kria strélas. Nu ta papiaba di kuzas ki ta preokupaba nos i ki ta dexaba nos kontenti. Nu ta papiaba kuazi sobri tudu kuza.” — Isaías 40:25, 26.

I si bo ku bu fidju nhos ka gosta di faze mésmu kuza? Talvês, bu pode dexa bus gostu di ladu i faze kuza ki bu fidju gosta. (Filipenses 2:4) Ian ki ta mora na Áfrika di Sul fla: “N gostaba más txeu di disportu di ki Vaughan. El gostaba más di avion i konputador. Nton N faze un sforsu pa N gosta di kes kuza li. N kumesa ta leba-l pa el ba odja kes spetáklu di avion i ta djuga jogu di avion ku el na konputador. N ta atxa ma pamodi nu pasa kes momentu sábi la djuntu, Vaughan xinti más avontádi pa pâpia ku mi.”

Djuda bu fidju ten más kunfiansa na se kabésa

“Papá, papá, odja!” Algun bês bu fidju dja fla-u si dipôs ki el prende un kuza novu? Si gósi el sta más grandi, ti inda el sta djobe bu opinion? Talvês nau. Má di sertéza, el ta ben meste-l pa el bira un algen dretu.

Odja izénplu ki Jeová da na manera ki el trata un di se fidju. Kantu Jizus staba pa ben kumesa un diziginason spesial li na Téra, Deus mostra se amor pa el kantu el fla: ‘Kel-li é nha Fidju, kel ki N ta ama txeu i ki ta da-m txeu alegria.’ (Mateus 3:17; 5:48) É verdadi ma bu meste disiplina i inxina bu fidju. (Efésios 6:4) Má tanbê, bu meste djobe kes kuza dretu ki bu fidju ta faze i fla i ilojia-l pa kel-la.

Alguns ómi ta atxa difísil ilojia ses fidju i mostra-s amor. Talvês pamodi ses pai ku ses mai ta konsentraba más na kes kuza negativu ki es ta fazeba di ki kes kuza dretu. Si kel-li kustuma kontise ku bo, bu meste kontinua ta faze sforsu pa bu djuda bu fidju ganha kunfiansa. Modi ki bu pode faze kel-li? Luka, ki dja nu papiaba di el antis, gosta di faze trabadju di kaza ku se fidju Manuel, ki ten 15 anu. Luka fla: “Alguns bês N ta pidi Manuel pa faze un trabadju i si el meste di ajuda pa el txoma-m. Txeu bês el ta konsigi faze el sô. Óras ki el ta konsigi faze un bon trabadju, el ta xinti sábi i el ta ganha más kunfiansa na se kabésa. Óras ki tudu kóre dretu N ta ilojia-l i óras ki kuzas ka sai sima el kria, N ta fla-l ma N sta kontenti ku sforsu ki el faze.”

Otu kuza ki bu pode faze pa djuda bu fidju ten más kunfiansa, é djuda-l ten métas inportanti na vida. Má i si bu sta atxa ma el sta dura pa el alkansa kes méta? Má i si kes méta nbóra é ka mariadu, é diferenti di kel ki bu ta skodjeba pa el? Na kel kazu li, talvês bu meste muda bu manera di pensa. Jacques, ki dja nu papiaba di el antis, fla: “N ta tenta djuda nha fidju poi kes méta ki el ta konsigi alkansa. Má, N ta djobe dretu ma ta ser kel ki el krê, ka kuzê ki ami N krê. N ta lenbra nha kabésa ma el meste alkansa ses méta na se ténpu.” Si bu ruspeta disizons di bu fidju, bu ilojia-l pa kes kuza dretu ki el ta faze i bu kontinua ta insentiva-l pa el ka dizisti sikrê el fadja, bu sta djuda-l alkansa ses méta.

É normal un óra ô otu bo ku bu fidju nhos ten prubléma. Má, si bu da bu midjór bu fidju ta kontinua ta ama-u pamodi tudu ajuda i apoiu ki bu da-l. Afinal, kenha ki ka ta krê sta djuntu di ken ki ta djuda-l ten bons rezultadu?

[Nóta di rodapé]