Jeová ta da-nu serteza ma el ta ben bira téra un paraízu

1. Ki mensajen proféta Izaías fla pa kes israelita?

PROFÉTA Izaías fla ma Jeová é ‘Kel Deus di verdadi’. Kel palavra ki traduzidu pa “verdadi” krê fla “amén”. (Isa. 65:16, nóta di ródapé.) Palavra “amén” krê fla “N ta konkorda”. Óras ki Bíblia ta uza palavra “amén” pa pâpia di Jeová ô di Jizus, el sta ta da-nu garantia ma un kuza é verdadi. Pur isu, kel mensajen di Izaías pa kes israelita éra klaru: Kalker kuza ki Jeová fla ma ta kontise sénpri ta kontise. Jeová prova kel-li kantu el kunpri kada un di se promésas.

2. Pamodi ki nu pode kunfia na kes promésa di Jeová pa futuru i ki perguntas nu ta ben odja?

² Nu pode kunfia tanbê ma kes promésa ki Jeová faze pa futuru ta ben kunpri? Uns 800 anu dipôs di ténpu di Izaías, apóstlu Paulu splika pamodi ki nu pode ten serteza ma promésas di Deus sénpri ta kunpri. Paulu fla: “Deus ka pode konta mintira”. (Ebr. 6:18) Sima na un fonti ka ta sai agu dósi i agu salgadu omésmu ténpu, Jeová ki é Fonti di verdadi, ka pode konta mintira. Pur isu, nu pode kunfia na tudu kel ki Jeová ta fla i kel-li ta inklui tudu se promésas pa futuru. Na es studu, nu ta ben responde kes pergunta li: Kuzê ki Jeová promete ma el ta da-nu na futuru? I ki garantia Jeová da-nu ma se promésa ta ben kunpri?

KUZÊ KI JEOVÁ PROMETE?

3. (a) Ki promésa ten txeu valor pa sérvus di Deus? (Apokalipse 21:3, 4) (b) Modi ki alguns algen ta reaji óras ki nu ta mostra-s kel promésa li?

³ Kel promésa ki nu sta ben pâpia di el ten txeu valor pa sérvus di Deus na mundu interu. (Lé Apokalipse 21:3, 4.) Jeová promete un ténpu ki “ka ta ben ten más mórti, nen tristéza, nen txoru nen dór.” Txeu di nos ta lé kes versíklu li pa konsola pesoas na pregason i pa mostra-s modi ki vida ta ben ser na Paraízu. Modi ki alguns algen ta reaji óras ki nu ta mostra-s kel promésa li? Es pode fla: “Kel-li ta parse bon dimás pa ser verdadi.”

4. (a) Kantu Jeová faze se promésa, kuzê ki el sabia ma ta ben kontiseba? (b) I kuzê más ki Jeová faze?

⁴ Kantu Jeová uza se spritu santu pa poi apóstlu Juan ta skrebe sobri kel promésa di vida na Paraízu, el sabia ma na nos ténpu nu ta ben papiaba di kel speransa li ku otus algen óras ki nu ta prega kes notísia sábi. Jeová tanbê sabia ma ta sérba difísil pa txeu algen kridita ma kes mudansa li ta ben kontise na futuru. (Isa. 42:9; 60:2; 2 Kor. 4:3, 4) Nton, modi ki nu pode djuda otus ten serteza ma kes promésa ki sta na Apokalipse 21:3, 4 ta ben kunpri? I modi ki nu pode bira nos kunfiansa más forti na Jeová i na se promésa? Jeová da-nu bons motivu pa nu kridita na se promésa. Ki motivus el da-nu?

JEOVÁ DA-NU SERTEZA MA EL TA BEN KUNPRI SE PROMÉSA

5. Ki motivus nu ten pa nu kunfia na promésa di Deus di un Paraízu i na undi ki nu ta atxa-s?

⁵ Nu ta atxa bons motivu pa nu kunfia na promésa di Jeová di un Paraízu na kes versíklu li, ki ta fla: ‘Kel ki staba xintadu na tronu fla: “Odja! N sta faze tudu kuza novu.” Tanbê el fla: “Skrebe, pamodi kes palavra li é fiel i verdaderu.” I el fla-m: “Dja es kunpri! Ami é Alfa i Ómega, komésu i fin.”’ — Apo. 21:5, 6a.

6. Pamodi ki kes palavra ki sta na Apokalipse 21:5, 6 ta bira nos kunfiansa na promésa di Jeová más fórti?

⁶ Pamodi ki kes palavra li ta bira nos kunfiansa na promésa di Jeová más fórti? Nu pode konpara kuzê ki Jeová fla na kes versíklu li ku sina un dukumentu, ki ta da-nu serteza ma El ta ben kunpri se promésa.b Nu ta atxa kel promésa di Deus na Apokalipse 21:3, 4. Má na versíklus 5 i 6, é sima si Jeová da se sinatura pa garanti-nu ma se promésa ta ben kunpri sen fadja. Nu ben odja modi ki Jeová ta garanti-nu ma nu pode kunfia na el.

7. Kenha ki ta kumesa ta pâpia na versíklu 5 i pamodi ki kel-la é spesial?

⁷ Versíklu 5 ta kumesa di kel manera li: “Kel ki staba xintadu na tronu fla”. (Apo. 21:5a) Kes palavra li é spesial pamodi é un di kes três bês ki Jeová ta pâpia na livru di Apokalipse. Ka foi un anju ki ten txeu puder, nen Jizus ki da kel serteza li, má é própi Jeová! Kel-li ta prova ma nu pode ten tudu kunfiansa na kuzê ki el fla dipôs. Pamodi ki nu ta fla si? Pamodi Jeová ka pode “konta mintira”. (Titu 1:2) Nton, kes palavra ki nu ta lé na Apokalipse 21:5, 6 di serteza ta ben kunpri.

“ODJA! N STA FAZE TUDU KUZA NOVU”

8. Modi ki Jeová da-nu serteza ma el ta ben kunpri se promésa? (Isaías 46:10)

⁸ Dipôs, Jeová fla: “Odja!”. (Apo. 21:5) Palavra gregu ki traduzidu pa “odja!” ta uzadu txeu bês na livru di Apokalipse. Un livru ta fla ma kel palavra li ta uzadu “sima un manera pa fla leitor pa presta txeu atenson na kuzê ki sta ben dipôs”. Kuzê ki Deus fla dipôs? Deus fla: “N sta faze tudu kuza novu.” Jeová ta ben faze kes mudansa li na futuru. Má pamodi el ten tudu serteza ma el ta ben kunpri se promésa pa el é sima si kes mudansa li dja sta ta kontise. — Lé Isaías 46:10.

9. (a) Kuzê ki frazi “N sta faze tudu kuza novu” krê fla? (b) Kuzê ki ta ben kontise ku kel “séu” i kel “téra” ki ta izisti oji?

⁹ Na Apokalipse 21:5, Jeová fla: “N sta faze tudu kuza novu.” Kuzê ki kel-li krê fla? Na kel kapítlu li, Jeová sta ta pâpia di dôs kuza ki el ta ben faze. Primeru, Jeová ta ben distrui kel mundu mau li. Sugundu, el ta ben traze un mundu novu. Na Apokalipse 21:1, nu ta lé: “Kel séu ki tinha antis i kel téra ki tinha antis dizaparse”. “Kel séu ki tinha antis” krê fla kes govérnu ki Satanás i se dimónis ta kontrola. (Mat. 4:8, 9; 1 Juan 5:19) Na Bíblia, palavra “téra” pode uzadu pa pâpia di kes algen ki ta mora na téra. (Gén. 11:1; Sal. 96:1) Nton kel “téra ki tinha antis” krê fla kes algen mau ki ten oji. Jeová ka ta ben sô midjora “séu” i “téra” ki ten oji, má el ta ben distrui-s tudu. El ta ben troka kel séu ku kel téra ki ten oji pa “un séu novu i un téra novu”. Kel-li krê fla, un novu govérnu ki ta ben governa kes algen justu.

10. Kuzê ki Jeová ta ben bira novu?

¹⁰ Di ki otu manera Jeová ta ben faze “tudu kuza novu”? (Apo. 21:5) Jeová ta ben konpo téra i el ta ben kura pesoas pa es bira perfeitu. Sima profesia di Izaías dja flaba, Jeová ta ben bira téra interu na un lugar bunitu, sima jardin di Éden. I el ta ben kura-nu di tudu duénsa. Kes algen manku, ségus i surdus ta ben kuradu i ti mésmu kes ki móre ta ben dadu vida otu bês. — Isa. 25:8; 35:1-7.

“KES PALAVRA LI É FIEL I VERDADERU... DJA ES KUNPRI!”

11. Kuzê ki Jeová fla Juan pa faze i pamodi?

¹¹ Kuzê más ki Jeová fla-nu ki ta da-nu serteza ma nu pode kunfia na el? Jeová fla Juan: “Skrebe, pamodi kes palavra li é fiel i verdaderu.” (Apo. 21:5) Alén di pidi Juan pa “skrebe”, Jeová tanbê da-l motivu pa el faze kel-la. El fla: “Pamodi kes palavra li é fiel i verdaderu.” Kel-li krê fla ma palavra di Deus é di kunfiansa. Nos é gratu pamodi Juan obi ku kel órdi di “skrebe”. Pamodi kel-li, nu pode lé sobri kel promésa ki Deus da-nu di un Paraízu i midita na kel speransa sábi ki sta spera-nu.

12. Pamodi ki Jeová fla: “Dja es kunpri!”?

¹² Kuzê ki Deus fla dipôs? “Dja es kunpri!” (Apo. 21:6) Pamodi ki Jeová fla ma kes promésa dja kunpri? Pamodi nada ka pode inpidi-l di kunpri se vontadi. Dipôs, Jeová fla otu kuza ki ta da-nu serteza ma se promésa ta ben kunpri. Kuzê ki el fla?

“AMI É ALFA I ÓMEGA”

13. Pamodi ki Jeová uza kes palavra li: “Ami é Alfa i Ómega”?

¹³ Sima nu flaba antis, Jeová pâpia três bês na kes vizon ki Juan tevi. (Apo. 1:8; 21:5, 6; 22:13) Na kada un di kes três bês li, Jeová fla kes mésmu palavra: “Ami é Alfa i Ómega”. Alfa é kel primeru létra di alfabétu gregu i ómega é kel últimu létra. Kantu ki Jeová fla ma el “é Alfa i Ómega”, el sta djuda-nu intende ma óras ki el kumesa un kuza el ta tirmina-l.

14. (a) Da un izénplu ki ta mostra na ki ténpu ki Jeová fla “Alfa” i na ki ténpu ki el ta ben fla “Ómega”. (b) Ki serteza nu ta atxa na Génesis 2:1-3?

¹⁴ Dipôs ki Jeová kria Adon ku Eva, El fla-s kal ki éra se vontadi pa pesoas i pa téra. Bíblia ta fla: ‘Deus abensua-s i Deus fla-s: ‘Nhos ten fidjus i nhos bira txeu; nhos intxi Téra i nhos manda na el’. (Gén. 1:28) Kantu ki Jeová fla se vontadi pa primeru bês, é sima si el flaba:“Alfa”. Ta ben txiga un ténpu ki kes disendenti perfeitu i obidienti di Adon ku Eva, ta ben intxi téra i bira-l un paraízu. Óras ki kel-li kontise é sima si Jeová ta ben fla:“Ómega”. Dipôs ki el tirmina di faze ‘séu ku téra i tudu kuza ki ten na es’, Jeová fla un kuza ki ta mostra ma di serteza se vontadi ta ben kunpri. Nu ta atxa-l na Génesis 2:1-3. (Lé.) Jeová fla ma sétimu dia éra sagradu. Kuzê ki kel-li krê fla? Kel-li ta mostra ma vontadi di Jeová pa pesoas i pa téra pa ben kunpri tudu na fin di sétimu dia.

15. Pamodi ki Satanás talvês pensa ma el ta konsigi inpidiba Jeová di kunpri se vontadi?

¹⁵ Dipôs ki Adon ku Eva rabela, es bira pekador i es pasa pekadu i mórti pa ses disendenti. (Rom. 5:12) Pamodi kel-li, pode parseba ma éra inposível pa pesoas perfeitu i ki ta obiba ku Jeová intxiba téra. Ta parse sima si Satanás inpidi Jeová di fla “Ómega”. Satanás talvês pensa ma Jeová ka ta pode kunpriba se promésa. Talvês el pensa ma Deus ta distruíba Adon ku Eva i ma el ta fazeba otu kazal perfeitu pa kunpriba Se vontadi pa tudu algen. Má si Jeová fazeba kel-li, Satanás pode akuzaba el di ser mintirozu. Pamodi? Pamodi sima sta na Génesis 1:28, Jeová dja flaba Adon ku Eva ma ses disendenti ta intxiba téra.

16. Pamodi ki Satanás talvês pensa ma el pode flaba ma Jeová fadja?

¹⁶ Ki otus disizon Satanás talvês pensa ma Jeová ta tomaba? Talvês Satanás pensa ma Jeová ta dexaba Adon ku Eva tinha fidjus inperfeitu i ma nunka es ka ta sérba perfeitu. (Ecl. 7:20; Rom. 3:23) Si kel-li kontiseba, di serteza Satanás ta flaba ma Jeová fadja. Pamodi? Pamodi si Deus tomaba kel disizon li, el ka ta kunpriba se vontadi di bira téra interu na un paraízu ku kes disendenti di Adon ku Eva perfeitu i obidienti.

17. Kuzê ki Jeová faze kantu Satanás i Adon ku Eva rabela i kuzê ki ta ben kontise na fin? (Odja dizenhus.)

¹⁷ Satanás nunka ka ta imajinaba kuzê ki Jeová ta ba fazeba. Jeová tinha kel midjór soluson pa kunpriba se vontadi sikrê Satanás i Adon ku Eva dja rabelaba. (Sal. 92:5) Jeová dexa Adon ku Eva pa ten fidju i di kel manera li se palavra kunpri i El prova ma el ka é mintirozu. Tanbê Jeová mostra ma si el fla ma el ta faze algun kuza, nada ka ta pode para-l. Pa mostra ma di serteza se vontadi ta ben kunpri Jeová ranja un ‘disendenti’ ki ta ben salvaba kes fidjus obidienti di Adon ku Eva. (Gén. 3:15; 22:18) Kel disendenti ta ben daba se vida pa salvaba tudu algen. Satanás nunka ka ta speraba ma Jeová ta fazeba kel-li! Pamodi? Pamodi resgati ten bazi na amor di verdadi. (Mat. 20:28; Juan 3:16) Satanás ka ten kel kualidadi li pamodi el ta pensa sô na se kabésa. Nton, kuzê ki ta ben kontise pamodi resgati? Na fin di govérnu di mil anu di Kristu, kes disendenti perfeitu i obidienti di Adon ku Eva ta ben mora na téra, sima éra vontadi di Jeová désdi komésu. Na kel ténpu, é sima si Jeová ta ben fla: “Ómega”.

NU PODE BIRA NOS KUNFIANSA MÁS FÓRTI NA PROMÉSA DI JEOVÁ DI UN PARAÍZU

18. Ki três serteza Jeová ta da-nu? (Odja kuadru “Três motivu pa nu kunfia na promésa di Jeová.”)

¹⁸ Na kel studu li, nu odja alguns motivu ki ta da-nu serteza ma téra ta ben bira un paraízu. Nton, kuzê ki nu pode fla kes algen ki ten dúvida ma kel-li ta ben kontise? Primeru, é própi Jeová ki faze kel promésa li. Livru di Apokalipse ta fla: “Kel ki staba xintadu na tronu fla: ‘Odja! N sta faze tudu kuza novu.’” Jeová ten sabedoria, puder i dizeju di kunpri se promésa. Sugundu, Jeová sabe ma kuzê ki el fla di serteza ta ben kunpri. É pur isu ki el fla: “Kes palavra li é fiel i verdaderu... Dja es kunpri!” I tirseru, nada ka ta pode inpidi Jeová di tirmina di faze un kuza ki el kumesa. É pur isu ki el fla: “Ami é Alfa i Ómega”. Jeová ta ben prova ma Satanás é un mintirozu i ma el ka ta pode inpidi-l di kunpri se vontadi.

19. Óras ki un algen ta atxa difísil kridita na kel promésa di un Paraízu, kuzê ki bu pode faze?

¹⁹ Lenbra ma tudu bês ki bu pâpia ku algen na pregason sobri kel serteza ki Jeová da-nu ma se promésa ta ben kunpri, bo tanbê bu sta bira bu kunfiansa na se promésa más forti. Nton di prósimu bês ki bu lé kel promésa sábi di kel Paraízu ki sta pa ben, na Apokalipse 21:4 i un algen fla-u: “Kel-li é bon dimás pa ser verdadi.” Kuzê ki bu pode faze? Pamodi ki bu ka ta lé i bu ta splika kes versíklu 5 i 6? Mostra modi ki kel garantia ki Jeová ta da-nu, é sima se própi sinatura. — Isa. 65:16.