• Orason pode djuda-u bira más amigu di Deus
    Vive filís pa tudu ténpu! — Un livru pa studa Bíblia

    • Orason pode djuda-u bira más amigu di Deus

      Dja bu kustuma xinti ma bu meste di orientason na bu vida? Bu ten perguntas inportanti ki bu krê sabe respósta? Bu meste di konsolu ô nkorajamentu? Bu ta gostaba di ser más amigu di Jeová? Orason pode djuda-u na tudu kes kuza li. Má modi ki nu debe faze orason? Deus ta obi tudu orason? Modi ki bu pode ten sertéza ma el ta obi bus orason? Nu ben odja.

      1. Pa kenha ki nu debe ora i sobri kuzê ki nu pode ora?

      Jizus inxina ma nu debe faze orason sô pa nos Pai na Séu. Jizus faze orason pa Jeová. El fla: ‘Nton, nhos faze orason asi: “Nos Pai ki sta na Séu. . .”’ (Mateus 6:9) Óras ki nu ta faze orason pa Jeová, nu ta bira nos amizadi ku el más fórti.

      Nu pode faze orason sobri kalker asuntu. Má é klaru ki pa Deus responde nos orason, el ten ki sta di akordu ku se vontadi. ‘Ka ta nporta kuzê ki nu pidi di akordu ku vontadi [di Deus], el ta obi-nu.’ (1 João 5:14) Jizus da izénplu di kuzas ki nu pode fla na orason. (Lé Mateus 6:9-13.) Tanbê óras ki nu ta faze orason sobri kuzas ki ta preokupa-nu, nu ka debe skese di agradese Deus pa kuzas ki dja el faze pa nos i pidi-l pa el djuda otus.

      2. Modi ki nu debe faze orason?

      Bíblia ta insentiva-nu pa nu ‘konta [Deus] tudu kel ki sta na [nos] korason.’ (Salmo 62:8) Nton nos orason debe ser di korason. Nu pode faze orason ku vós altu ô déntu nos i na kalker puzison ki ta mostra ruspetu pa Jeová. Nu pode faze orason na kalker óra i na kalker lugar.

      3. Modi ki Deus ta responde nos orason?

      El ta responde di txeu manera. Jeová da-nu se Palavra, Bíblia, undi txeu bês nu ta konsigi atxa respósta pa nos perguntas. Lé Palavra di Deus pode ‘da sabedoria pa ken ki ka ten spiriénsa.’ (Salmo 19:7; lé Tiago 1:5.) El pode da-nu pas déntu nos óras ki nu sta pasa pa prublémas. I el pode poi se sérvus pa djuda-nu óras ki nu sta meste própi.

      SABE MÁS

      Odja modi ki bu pode faze orason di un manera ki ta agrada Deus, i modi ki orason pode djuda-u.

      4. Faze orason sima Deus ta krê

      Kuzê ki ta poi Deus ta obi ô ka ta obi nos orason? Odja VÍDIU.

      VÍDIU: Deus ta obi tudu orason? — sô un párti (2:42)

      Jeová krê pa nu faze orason pa el. Lé Salmo 65:2, i dipôs pâpia sobri kes pergunta li:

      • Bu ta atxa ma ‘Kel ki ta obi orason’ krê pa bu faze orason pa el? Pamodi?

      Si nu krê pa Deus obi nos orason, nu ten ki sforsa pa vive di akordu ku se leis. Lé Miqueias 3:4 i 1 Pedro 3:12, i dipôs pâpia sobri kel pergunta li:

      • Modi ki nu pode ten sertéza ma Jeová ta obi nos orason?

      Na un géra, tudu kes dôs ladu pode ti faze orason pa es ganha. Má bu ta atxa ma Deus ta responde kes tipu di orason la?

      5. Nu debe faze orason di korason

      Alguns algen inxinadu ma es debe ripiti kes mésmu kuza óras ki es ta faze orason. Má é si ki Deus krê pa nu faze orason pa el? Lé Mateus 6:7, i dipôs pâpia sobri kel pergunta li:

      • Modi ki bu pode ivita ‘ripiti kes mésmu kuza’ óras ki bu ta faze orason?

      Tudu dia bu pode pensa na un kuza spesial ki kontise na bu vida i agradese Jeová pa kel-la. Si bu faze kel-li tudu dia duránti un simana, bu ta odja ma bu ta konsigi faze orason pa Jeová sobri 7 kuza diferenti, sen ripiti.

      Un rapazinhu sta ta pâpia ku se pai ku se mai.

      Un bon pai krê pa se fidju pâpia ku el di korason. Di mésmu manera, Jeová krê pa nu faze orason pa el di korason.

      6. Orason é un prezenti di Deus

      Modi ki orason pode da-nu forsa na óra sábi i na óra kasábi? Odja VÍDIU.

      VÍDIU: Orason ta djuda-nu aguenta ténpus difísil (1:32)

      Bíblia ta promete ma orason pode djuda-nu xinti kel pas di verdadi déntu nos. Lé Filipenses 4:6, 7, i dipôs pâpia sobri kes pergunta li:

      • Nbóra é ka sénpri ki orason ta kaba ku nos prubléma, modi ki el ta djuda-nu?

      • Kal ki é alguns kuza ki bu ta gostaba di fla na orason?

      Bu sabia?

      Palavra “amén” krê fla “N ta konkorda”. Désdi ténpu ki Bíblia skrebedu, ta fladu “amén” na fin di orason. — 1 Crónicas 16:36.

      7. Tra ténpu pa faze orason

      Alvês nu pode fika okupadu dimás ki nu pode skese di faze orason. Ti ki pontu orason éra inportanti pa Jizus? Lé Mateus 14:23 i Marcos 1:35, i dipôs pâpia sobri kes pergunta li:

      • Kuzê ki Jizus faze pa ten ténpu pa faze orason?

      • Ki óra ki bu pode atxa ténpu pa faze orason?

      Dizenhus: Un mudjer sta ta faze orason duránti dia. 1. Di palmanhan. 2. Ku se fidjus. 3. Na trabadju. 4. Antis di kume.

      ALGUNS ALGEN TA FLA: “Orason é sô un kuza pa poi algen ta xinti dretu.”

      • Kuzê ki bu ta flaba?

      REZUMU

      Orason di korason ta djuda-nu ser más amigu di Deus, ta da-nu pas déntu nos i ta da-nu forsa ki nu meste pa nu agrada Jeová.

      Perguntas di rezumu

      • Pa kenha ki nu debe faze orason?

      • Modi ki nu debe faze orason?

      • Modi ki orason ta djuda-nu?

      Sprimenta faze kel-li

      DJOBE MÁS

      Sabe respósta pa perguntas ki más ta fazedu sobri orason.

      “Séti kuza ki bu meste sabe sobri orason” (Sentinéla, 1 di otubru di 2010)

      Prende pamodi ki bu debe faze orason i modi ki bu pode midjora bus orason.

      “Pamodi ki N debe faze orason?” (Artigu na jw.org)

      Odja pa kenha ki Bíblia ta fla ma nu debe faze orason.

      “N debe faze orason pa santu?” (Artigu na jw.org)

      Na kel múzika li, odja si ta nporta na undi i ki óra ki nu ta faze orason.

      Faze orason kalker óra (1:22)