Mateus 6:34 — ‘Ka nhos fika preokupadu dimás ku kuzas di kel otu dia’

‘Nunka ka nhos fika preokupadu dimás ku kuzas di kel otu dia, pamodi kel otu dia ta ten ses kuza pa preokupa ku el. Kada dia ta ten ses prubléma.’ — Mateus 6:34, Tradução do Novo Mundo.

Kuzê ki Mateus 6:34 ta siginifika

Jizus, ki fla kes palavra li, garanti kes algen ki staba ta obi-l ma es ka mesteba fika preokupadu dimás ô fadigadu ku prublémas ki podia kontise otu dia. Envês di kel-la es devia preokupa ku prublémas un dia di kada bês.

Jizus ka krê flaba ma nu ka debe pensa na kuzas di manhan ô faze planu pa futuru. (Provérbios 21:5) Envês di kel-la, el staba ta djuda-nu pa nu ka fika preokupadu dimás ô fadigadu ku kuzas ki pode kontise manhan. Si nu fika preokupadu dimás nu pode perde alegria i nu ka ta konsentra na kes kuza ki nu ten ki faze oji. Nos preokupason ka ta pode rezolve kes prubléma ki inda ka kontise. Kes kuza ki nu ta preokupa ku es, pode ka kontise ô kuzas ka ta ser txeu kasábi sima nu pensaba.

Kuzê ki kes versíklu ki ta fika antis i dipôs di Mateus 6:34 ta fla

Jizus fla kes palavra li na kel diskursu, ki é txeu konxedu, ki el faze na monti i nu ta atxa-s na Mateus kapítlus 5 ti 7. Na kel diskursu li, Jizus splika ma fika preokupadu dimás sen nisisidadi, ka ta midjora nos vida i nen ka ta pô-nu vive más txeu. (Mateus 6:27) Tanbê el fla ma óras ki nu ta poi Deus na primeru lugar na nos vida, nu ka meste fika preokupadu dimás ku manhan. Deus ta kuida di planta i di animal, nton el ta kuida di kes algen ki ta obi ku el. — Mateus 6:25, 26, 28-33.