LISON 03
Bu pode kunfia na Bíblia?
Na Bíblia nu ta atxa txeu promésa i bons konsedju. Bu pode sta ku gana di sabe kuzê ki el ta inxina, má talvês bu ka tene sertéza si bu debe kunfia na kuzê ki el ta fla. Ta da pa kunfia na promésas i konsedjus di un livru antigu si? Ta da pa kridita na kuzê ki Bíblia ta fla sobri ten un vida sábi gósi i na futuru? Milhons di algen ta atxa ma sin. Nu ben odja ma bu pode kridita tanbê.
1. Kes stória ki nu ta atxa na Bíblia kontise mê?
Bíblia ta fla ma se skritoris ‘skrebe palavras di verdadi, di manera izatu.’ (Eclesiastes 12:10) El ta pâpia di kuzas ki kontise i di pesoas ki izistiba mê. (Lé Lúkas 1:3; 3:1, 2; BPK) Txeu storiador i arkiólogus konfirma ma kuzê ki Bíblia ta fla sobri datas, pesoas, lugaris i kuzas ki kontise é verdadi.
2. Pamodi ki nu pode fla ma Bíblia é di kunfiansa sikrê el é antigu?
Bíblia txeu bês pâpia di kuzas ki pesoas inda ka diskubriba na ténpu ki el skrebedu. Pur izénplu, el ta pâpia di alguns asuntu sobri siênsia. Na ténpu ki el skrebedu, txeu algen ka ta kriditaba na kuzê ki el ta flaba sobri kes asuntu li. Má oji siênsia ta konfirma ma kuzê ki Bíblia ta fla é izatu. El é ‘sénpri di kunfiansa, gósi i pa tudu ténpu’. — Salmo 111:8.
3. Pamodi ki nu pode kunfia na kuzê ki Bíblia ta fla sobri futuru?
Bíblia ten profesiasa ki ta pâpia di ‘kes kuza ki inda ka fazedu.’ (Isaías 46:10) Pur izénplu, ten txeu kuza ki Bíblia dja papiaba di es mutu antis di es kontise. Tanbê, el ta fla tintin pa tintin modi ki kuzas na mundu ta sérba oji. Na kel lison li, nu sta ben odja alguns profesia di Bíblia. Nu ta fika dimiradu di sabe modi ki es kunpri!
SABE MÁS
Odja modi ki siênsia oji ta konkorda ku Bíblia i piskiza alguns profesia ki ta dexa algen dimiradu.
4. Siênsia ta konkorda ku Bíblia
Na ténpu antigu, maioria di algen ta kriditaba ma Téra staba riba di algun kuza ki ta sustiba el. Odja VÍDIU.
Odja kuzê ki skrebedu na livru di Jó dja ten uns 3.500 anu. Lé Jó 26:7, i dipôs pâpia sobri kel pergunta li:
Pamodi ki nu ta fika dimiradu di sabe ma Bíblia dja flaba ma Téra sta ‘riba di nada’?
Sientistas sô ben ntende dretu siklu di agu dja ten uns 200 anu. Má repara ma Bíblia dja papiaba di kel-li dja ten uns 3.500 anu. Lé Jó 36:27, 28, i dipôs pâpia sobri kes pergunta li:
Kuzê ki ta dexa-u dimiradu sobri kel splikason sinplis di siklu di agu?
Kes testu di Bíblia ki bu lé pô-u ta kunfia más txeu na Bíblia?
5. Bíblia dja flaba sobri kuzas inportanti ki ta ben kontiseba
Lé Isaías 44:27–45:2, i dipôs pâpia sobri kel pergunta li:
Kuzê ki Bíblia dja flaba sobri Inpériu di Babilónia 200 anu antis di el kai?
Stória ta mostra ma Siru, ki éra rei di Pérsia, i se trópas ataka i toma sidadi di Babilónia na anu 539 A.J.b Dipôs ki es disvia agu di riu ki ta protejeba sidadi, es entra pa portons ki staba abértu. Asi es konsigi toma Babilónia sen luta. Oji, más di 2.500 anu dipôs, Babilónia fika sô ku parduerus. Repara kuzê ki Bíblia dja flaba.
Lé Isaías 13:19, 20, i dipôs pâpia sobri kel pergunta li:
Modi ki kel profesia li kunpri?
Oji na Iraki nu ta atxa parduerus di Babilónia
6. Bíblia dja flaba sobri kuzas ki sta kontise oji
Bíblia ta fla-nu ma nu sta ta vive ‘na ténpu di fin’. (2 Timóteo 3:1) Repara kuzê ki Bíblia dja flaba sobri ténpu di fin:
Lé Mateus 24:6, 7, i dipôs pâpia sobri kel pergunta li:
Kuzê ki Bíblia dja flaba ma ta kontiseba na ténpu di fin?
Lé 2 Timóteo 3:1-5, i dipôs pâpia sobri kes pergunta li:
Modi ki Bíblia dja flaba ma pesoas ta sérba na ténpu di fin?
Kal di kes kuza li bu sta ta odja ta kontise?
ALGUNS ALGEN TA FLA: “Bíblia é un livru di stórias inventadu.”
Kuzê ki más ta konvense-u ma nu pode kunfia na Bíblia?
REZUMU
Stória, siênsia i profesias ta mostra ma bu pode kunfia na Bíblia.
Perguntas di rezumu
Bíblia é un livru di stória inventadu?
Kal ki é alguns kuza ki siênsia ta konkorda ku Bíblia?
Bu ta kridita ma Bíblia pode fla kuzê ki ta ben kontise na futuru? Pamodi?
DJOBE MÁS
Na Bíblia nu ta atxa algun kuza sobri siênsia ki ka sta dretu?
Kuzê ki ta prova ma nu sta ‘na ténpu di fin’?
“6 profesia di Bíblia ki nu sta odja ta kunpri na nos ténpu” (Sentinéla, 1 di maiu di 2011)
Odja modi ki profesias di Bíblia sobri Inpériu di Grésia kunpri.
‘Palavras ki profétas fla’ ta poi nos fé ta bira más fórti (5:22)
Sabe modi ki profesias di Bíblia muda kuzê ki un ómi ta pensaba di Bíblia.
“N ka ta kriditaba ma Deus ta izistiba” (Sentinéla, nunbru 5 di 2017)
a Profesias ta inklui mensaji di Deus sobri kuzas ki ta kontise na futuru.
b A.J. siginifika “Antis di Jizus” i D.J. siginifika “Dipôs di Jizus”.