Jizus prega mensaji di Reinu

Poku ténpu dipôs ki Jizus batiza, el kumesa ta prega: ‘Reinu di Deus sta kuazi ta txiga.’ Timenti el ta viajaba pa Galilea ku Judea se disiplus ta sigiba el. Kantu Jizus volta pa sidadi ki el nase, na Nazaré, el bai pa sinagóga, el abri rolu di Izaías i el kumesa ta lé altu: ‘Jeová da-m se spritu santu pa N pode prega notísias sábi.’ Kuzê ki kel-li krê flaba? Kel-li krê flaba ma mésmu ki pesoas ta krê odjaba Jizus ta faze milagris, razon prinsipal ki el resebe spritu santu é pa el prega notísias sábi. Nton el fla pa kes algen ki staba la: ‘Oji kel profesia li kunpri.’

Dipôs, Jizus bai pa Mar di Galilea, undi el nkontra ku kuatu piskador, ki más tardi bira se disiplus. El fla-s: ‘Nhos ben ku mi i N ta bira nhos piskadoris di ómis.’ Es éra Pedru, André, Tiagu ku Juan. Kel óra es dexa ses trabadju di péska i es sigi-l. Es prega sobri Reinu di Jeová na tudu Galilea. Es ta pregaba na sinagógas, na merkadus i na rua. Un monti di algen ta sigiba es pa undi ki es baba. Nobidadi sobri Jizus spadja pa tudu lugar, ti pa kes lugar más lonji, sima Síria.

Ku ténpu, Jizus da se disiplus puder pa kura duentis i pa tra dimónis. Alguns ta baba ku el, óras ki el ta pregaba di un sidadi pa kel otu i di un vila pa kel otu. Alguns mudjer di fé sima Maria Madalena, Juana, Suzana i otus, ta kuidaba di Jizus ku se disiplus.

Dipôs ki Jizus trena se disiplus, el manda-s ba prega. Sima es ta viajaba pa tudu Galilea, un monti di otus algen bira disiplus i es batizadu. Tinha txeu algen ki krê sérba se disiplus. Pur isu, Jizus konpara-s ku un lugar di plantason ki sta prontu pa faze kodjéta. El fla-s: ‘Nhos ora pa Jeová manda más trabadjadoris pa faze kodjéta.’ Dipôs Jizus skodje 70 di se disiplus i el manda-s dôs dôs pa prega pa tudu Judea. Es inxina tudu tipu di algen sobri Reinu. Kantu se disiplus volta, es staba ku gana di fla Jizus kuzê ki kontise. Ka tinha nada ki Diabu ta fazeba pa para ses trabadju di pregason.

Jizus garanti ma se disiplus ta kontinuaba ku es trabadju inportanti dipôs ki el voltaba pa Séu. El fla-s: ‘Nhos prega notísias sábi na Téra interu. Nhos inxina algen sobri Palavra di Deus i nhos batiza-s.’