LISON 17

Ki tipu di algen Jizus é?

Formatu di livru na papel

Óras ki nu ta prende sobri kuzas ki Jizus fla i faze kantu el staba na Téra, nu ta odja kualidadis ki ta djuda-nu bira más amigu di el ku se Pai, Jeová. Kal ki é alguns di kes kualidadi? I modi ki nu pode imita Jizus na nos vida?

1. Di ki maneras Jizus é sima se Pai?

Jizus vive na Séu duránti bilhons di anu djuntu ku se Pai i el prende txeu kuza ku el. Pur isu, el ta pensa, el ta xinti i el ta faze kuzas sima el. (Lé João 5:19.) Na verdadi, Jizus ta imita se Pai di tal manera ki el fla: ‘Kenha ki odja-m dja odja Pai tanbê.’ (João 14:9) Sima bu ta ba ta prende sobri manera di ser di Jizus, bu ta konxe Jeová más dretu. Pur izénplu, manera ki Jizus trata pesoas, ta mostra kuzê ki Jeová ta xinti pa bo.

2. Modi ki Jizus mostra ma el ta ama Jeová?

Jizus fla: ‘Pa mundu sabe ma N ta ama nha Pai, N ta faze tudu sima nha Pai manda-m pa N faze.’ (João 14:31) Kantu el staba na Téra, Jizus mostra ma el ta amaba se Pai txeu pamodi el obi ku el, ti mésmu kantu éra difísil faze kel-la. Tanbê, Jizus gostaba di pâpia sobri se Pai i di djuda otus ten un amizadi fórti ku El. — João 14:23.

3. Modi ki Jizus mostra ma el ta ama pesoas?

Bíblia ta fla ma Jizus gostaba ‘más txeu di algen na Téra.’ (Provérbios 8:31, nóta di rodapé) El mostra kel amor li kantu el nkoraja i el djuda otus algen. Kantu el faze milagris el mostra se puder i tanbê se konpaxon. (Marcos 1:40-42) El ta trataba pesoas ku bondadi i el ka ta fazeba diferénsa. Se palavras da konsolu i speransa pa tudu kes algen sinseru ki ta obiba el. Jizus staba prontu pa sufri i pa móre pamodi el ta ama tudu algen. Má, kes algen ki el ta ama más txeu é kes ki ta sigi kes kuza ki el inxina. — Lé João 15:13, 14.

SABE MÁS

Prende más sobri manera di ser di Jizus. I odja tanbê modi ki bu pode mostra amor i ser un algen ki gosta di da sima el.

4. Jizus ta ama se Pai

Izénplu di Jizus ta inxina-nu modi ki nu pode mostra nos amor pa Deus. Lé Lucas 6:12 i João 15:10; 17:26. Dipôs di lé kada un di kes testu li, pâpia sobri kel pergunta li:

Modi ki nu pode imita Jizus i mostra ma nu ta ama Jeová?

Jizus ta ora. — Jizus ta amaba se Pai na Séu i el ta papiaba ku el txeu bês na orason

5. Jizus ta preokupa ku kes algen ki meste ajuda

Jizus ta preokupaba más ku otus algen di ki ku se kabésa. Mésmu kantu el staba kansadu, el uza se ténpu i forsa pa djuda otus algen. Lé Marcos 6:30-44, i dipôs pâpia sobri kes pergunta li:

Na kes versíklu li, kal ki é alguns manera ki Jizus mostra ma el ta preokupaba ku otus algen? — Odja versíklus 31, 34, 41 i 42.
Kuzê ki poi Jizus ta djuda pesoas? — Odja versíklu 34.
Dja ki Jizus ta imita kualidadis di Jeová, kuzê ki kel-li ta inxina-u sobri Jeová?
Modi ki nu pode mostra ma nu ta preokupa ku otus, sima Jizus?

Jizus faze un milagri kantu el uza sinku pon ku dôs pexi pa da un monti algen kumida. Dipôs se disiplus da kes ómi, mudjeris i mininus kes kumida.

6. Jizus gosta di da

Nbóra Jizus ka tinha txeu kuza, el éra un algen ki gostaba di da i el insentiva-nu pa nu faze mésmu kuza. Lé Atus 20:35, BPK, i dipôs pâpia sobri kel pergunta li:

Sima Jizus fla, modi ki nu pode ser filís?

Odja VÍDIU, i dipôs pâpia sobri kel pergunta li:

VÍDIU: “Da é más sábi di ki toma” — sô un párti (4:00)

Kal ki é alguns manera ki nu pode da, sikrê nu ka ten txeu kuza?

Bu sabia?

Bíblia ta inxina-nu ora pa Jeová na nómi di Jizus. (Lé João 16:23, 24.) Óras ki nu ta ora di kel manera li, nu ta mostra ma nu ta da valor pa kuzê ki Jizus faze pa djuda-nu bira amigu di Jeová.

ALGUNS ALGEN TA FLA: “Deus ka ta nporta ku nos sufrimentu.”