• Bu sta priparadu pa batiza?
    Vive filís pa tudu ténpu! — Un livru pa studa Bíblia
    • Lison 47. Un studanti di Bíblia sta pensa na batismu timenti el ta odja un ómi ta batiza na un asenbleia.

      LISON 47

      Bu sta priparadu pa batiza?

      Na bu studu di Bíblia dja bu prende txeu kuza sobri Jeová. Di sertéza dja bu faze alguns mudansa pa bu aplika kes kuza ki bu prende. Má simé, pode ten algun kuza ki ka sta dexa-u da bu vida pa Jeová i batiza. Na kel lison li, bu sta ben odja alguns kuza ki ka ta dexa txeu algen batiza i modi ki bu pode vense-s.

      1. Bu meste sabe tudu kuza sobri Bíblia antis di bu batiza?

      Pa bu batiza, bu meste ‘ten un konhisimentu izatu di verdadi.’ (1 Timóteo 2:4) Kel-li ka krê fla ma bu meste sabe respósta di tudu pergunta di Bíblia antis di bu batiza. Ti mésmu kes algen ki dja ten txeu anu batizadu, inda sta kontinua ta prende. (Colossenses 1:9, 10) Má, bu meste konxe kes verdadi prinsipal di Bíblia. Ansions na kongregason ta djuda-u sabe si bu tene kel konhisimentu ki bu meste pa bu batiza.

      2. Kal ki é alguns kuza ki bu meste faze antis di bu batiza?

      Antis di bu batiza, bu meste ‘rapende i muda bu vida’. (Lé Atos 3:19) Kel-li krê fla ma bu ta fika txeu tristi pamodi kes kuza mariadu ki bu fazeba i bu ta pidi Jeová pa purdua-u. Tanbê bu ta fika disididu na ka faze konportamentu mariadu i vive di un manera ki ta agrada Deus. Alén di kel-li, bu ta kumesa ta sisti runion i ta prega djuntu ku kongregason.

      3. Pamodi ki bu ka debe dexa medu inpidi-u di batiza?

      Alguns algen ten medu ma es ka ta konsigi faze kel ki es promete Jeová. É verdadi ki talvês bu pode ben faze algun kuza mariadu. Má, ti kes ómi i mudjer fiel ki Bíblia ta pâpia di es tanbê faze kuzas mariadu. Jeová ka ta spéra pa kes algen ki ta adora-l ser perfetu. (Lé Salmo 103:13, 14.) El ta fika kontenti óras ki bu ta faze bu midjór! El ta djuda-u. Na verdadi, Jeová ta da-nu sertéza ma nada ‘ka ta sipara-nu di se amor.’ — Lé Romanos 8:38, 39.

      SABE MÁS

      Sima bu ta ba ta konxe Jeová midjór i seta se ajuda, odja modi ki bu pode vense kalker kuza ki pode ka sta dexa-u batiza.

      Dizenhus: Un minina ta vense alguns prubléma pa el pode batiza. Kes séna ta ba ta ripiti na kel lison li.

      4. Kontinua ta konxe Jeová midjór

      Kel minina ta studa Bíblia ku un Tistimunha di Jeová.

      Bu meste sabe tudu kuza sobri Jeová pa bu pode batiza? Nau. Má bu meste konxe-l dretu pa bu pode ama-l i agrada-l. Odja VÍDIU pa bu sabe modi ki studantis di Bíblia na mundu interu sta ta faze kel-la. Dipôs pâpia sobri kel pergunta li:

      VÍDIU: Kaminhu pa batismu (3:56)

      • Na vídiu, kuzê ki djuda alguns algen pripara pa batiza?

      Lé Romanos 12:2, i dipôs pâpia sobri kes pergunta li:

      • Bu ten algun dúvida sobri kuzê ki Bíblia ta inxina ô si kes kuza ki Tistimunhas di Jeová ta inxina é verdadi?

      • Si bu ten, kuzê ki bu pode faze?

      5. Vense kes kuza ki pode ka sta dexa-u batiza

      Kel minina ta poi Bíblia na se bólsa timenti se mai sta ta sanha na el.

      Nos tudu nu pasa pa prublémas kantu nu disidi da nos vida pa Jeová i batiza. Pa odja un izénplu, odja VÍDIU, i dipôs pâpia sobri kes pergunta li:

      VÍDIU: Amor pa Jeová ta vense difikuldadis (5:22)

      • Na vídiu, ki prublémas Narangerel tevi ki vense pa el pode sirbi Jeová?

      • Modi ki se amor pa Jeová djuda-l vense kes prubléma?

      Lé Provérbios 29:25 i 2 Timóteo 1:7, i dipôs pâpia sobri kel pergunta li:

      • Kuzê ki ta da-nu koraji pa nu vense prublémas?

      6. Kunfia ma Jeová ta djuda-u

      Kel minina sta ta prega pa un mudjer di idadi. El sta na pregason djuntu ku kel algen ki ta studa Bíblia ku el.

      Jeová ta djuda-u pa bu pode agrada-l. Odja VÍDIU, i dipôs pâpia sobri kes pergunta li:

      VÍDIU: Jeová ta djuda-u (2:50)

      • Na vídiu, pamodi ki kel studanti di Bíblia staba ku medu di batiza?

      • Kuzê ki el prende ki djuda-l kunfia más txeu na Jeová?

      Lé Isaías 41:10, 13, i dipôs pâpia sobri kel pergunta li:

      • Pamodi ki bu pode ten sertéza ma bu ta konsigi kunpri kel promésa ki bu faze kantu bu da bu vida pa Jeová?

      7. Kontinua ta da txeu valor pa amor ki Jeová ten pa bo

      Kel minina sta ta ora el sô.

      Sima bu ta ba ta odja modi ki Jeová ta ama-u, bu ta xinti más gratidon i más vontadi di sirbi-l pa tudu ténpu. Lé Salmo 40:5, i dipôs pâpia sobri kel pergunta li:

      • Ki bensons di Jeová bu gosta más txeu?

      Proféta Jeremias ta amaba Jeová i se palavra, i el ta daba txeu valor pa priviléjiu di pâpia sobri nómi di Jeová. El fla: ‘Bu palavra bira alegria i kontentamentu na nha korason, pamodi N ta leba bu nómi, ó Jeová, Deus’. (Jeremias 15:16) Responde kes pergunta li:

      • Pamodi ki ser un Tistimunha di Jeová é un priviléjiu grandi?

      • Bu krê batiza i bira un Tistimunha di Jeová?

      • Ten algun kuza ki sta inpidi-u di faze kel-la?

      • Kuzê ki bu ta atxa ma bu meste faze pa bu pode batiza?

      Kel minina sta ta batiza.

      ALGUNS ALGEN TA FLA: “Batismu é un kuza sériu. Ka parse-m ma N ta konsigi vive sima N promete Deus.”

      • É si ki bu ta xinti tanbê?

      REZUMU

      Ku ajuda di Jeová bu pode vense kalker kuza ki pode ka sta dexa-u batiza.

      Perguntas di rezumu

      • Bu meste sabe tudu kuza sobri Bíblia pa bu pode batiza?

      • Ki mudansas talvês bu meste faze antis di bu batiza?

      • Pamodi ki bu ka debe dexa medu inpidi-u di batiza?

      Sprimenta faze kel-li

      DJOBE MÁS

      Odja kuzê ki debe pô-u ta batiza.

      “Bu sta prontu pa batiza?” (Sentinéla, marsu di 2020)

      Prende modi ki bu pode vense alguns prubléma ki pode inpidi-u di batiza.

      “Kuzê ki ta inpidi-m di batiza?” (Sentinéla, marsu di 2019)

      Odja kuzê ki djuda un ómi vense alguns prubléma difísil pa el pode batiza.

      ‘Pamodi ki inda bu ka batiza?’ (1:10)

      Na komésu, un ómi ki txoma Ata staba ku medu di batiza. Odja kuzê ki pô-l ta toma kel disizon inportanti li.

      N ta merese tudu kel-li? (7:21)