Ansions ‘ta kolabora pa nu ten alegria’

1. Pamodi ki apóstlu Polu fika kontenti ku kes irmon na Korintu?

NA ANU 55 D.J., apóstlu Polu staba na sidadi di Trôadi, má el ka konsigi para di pensa na kes irmon na Korintu. Uns mês antis, el staba tristi pamodi el fika ta sabe ma kes irmon di la staba ta diskuti ku kunpanheru. Sima un pai preokupadu, Polu manda-s un karta pa koriji-s. (1 Cor. 1:11; 4:15) El manda Titu bai ti es, asi pa el flaba el modi ki kuzas staba na Korintu óras ki es nkontraba ku kunpanheru na Trôadi. Polu staba ta spéra Titu na Trôadi ku gana di sabe kuzê ki staba ta pasa ku irmons na Korintu. Má el fika txeu tristi pamodi Titu ka txiga. Kuzê ki Polu ta fazeba? El bai di barku ti Masedónia i el fika kontenti kantu es nkontra la. Titu fla Polu ma kes irmon na Korintu obi ku kes konsedju ki el da-s na kel karta, i ma es staba ku gana di odja-l. Kantu Polu obi kel notísia el fika ‘más kontenti inda.’ — 2 Cor. 2:12, 13; 7:5-9.

2. (a) Kuzê ki Polu skrebe kes irmon na Korintu sobri fé i alegria? (b) Ki perguntas nu sta ben responde?

² Poku ténpu dipôs, Polu manda otu karta pa Korintu. El fla-s: ‘É ka pamodi nos é dónu di nhos fé, má nu ta kolabora pa nhos ten alegria, dja ki é pamodi nhos fé ki nhos sta sakédu.’ (2 Cor. 1:24) Kuzê ki Polu krê flaba ku kel-li? Modi ki kes palavra li ta djuda kes ki ta sigi Jizus oji?

NOS FÉ KU NOS ALEGRIA

3. (a) Kuzê ki Polu krê flaba kantu el skrebe: ‘É pamodi nhos fé. . . ki nhos sta sakédu’? (b) Modi ki ansions di gósi ta sigi izénplu di Polu?

³ Polu pâpia di dôs kualidadi inportanti ki nu debe ten na nos adorason: fé ku alegria. Lenbra di kuzê ki el skrebe sobri fé: ‘É ka pamodi nos é dónu di nhos fé,. . . é pamodi nhos fé ki nhos sta sakédu.’ Ku kes palavra li, Polu rekonhese ma kes irmon na Korintu ka staba na verdadi pamodi el ô pamodi otu algen, má pamodi ses própi fé na Deus. Pur isu, el odja ma el ka mesteba kontrola fé di kes irmon i nen el ka kreba faze kel-la. El tinha kunfiansa ma es ta sigiba Jizus di manera fiel i ma es krê fazeba kel ki é dretu. (2 Cor. 2:3) Kes ansion di nos ténpu ta sigi izénplu di Polu pamodi es ta mostra ma es ta kunfia na fé ki irmons ten i na ses dizeju di sirbi Deus. (2 Tes. 3:4) Envês di poi régras duru na kongregason, ansions ta kunfia na prinsípius di Bíblia i na orientason ki organizason di Jeová ta da, pamodi ansions é ka dónu di fé di ses irmon. — 1 Ped. 5:2, 3.

4. (a) Kuzê ki Polu krê flaba kantu el skrebe: ‘Nu ta kolabora pa nhos ten alegria’? (b) Modi ki ansions di nos ténpu ta imita apóstlu Polu?

⁴ Polu fla tanbê: ‘Nu ta kolabora pa nhos ten alegria’. Kantu Polu fla kel-li, el sta ta papiaba di se kabésa i di se kunpanherus. Pamodi ki nu pode fla kel-li? Pamodi na kel mésmu karta ki Polu skrebe pa irmons na Korintu, el pâpia di dôs kunpanheru di sel. El skrebe: ‘Jizus Kristu, ki. . . mi ku Silvanu i Timótiu, nu prega na nhos meiu’. (2 Cor. 1:19) Alén di kel-li, tudu bês ki Polu uza palavra ‘kolaborador’ na se kartas el staba ta pâpia di bons amigu sima Apolu, Ákila, Priska, Timótiu, Titu i otus irmon. (Rom. 16:3, 21; 1 Cor. 3:6-9; 2 Cor. 8:23) Pur isu, kantu Polu fla: ‘Nu ta kolabora pa nhos ten alegria’, el staba ta fla kes irmon na Korintu ma el ku se kunpanherus krê fazeba tudu kel ki es podia pa djuda tudu algen na kongregason ten alegria. Kes ansion di nos ténpu krê faze mésmu kuza. Es krê faze tudu kel ki es pode pa djuda irmons ‘sirbi Jeová ku alegria.’ — Sal. 100:2; Fil. 1:25.

5. Ki perguntas nu ta ben responde, i na kuzê ki nu debe pensa?

⁵ Ka dura li, un grupu di irmons ku irmans zelozu di país diferenti responde kel pergunta li: “Kuzê ki un ansion faze ô fla ki djuda-u xinti más alegria?” Timenti nu ta analiza kuzê ki kes irmon fla, pensa na modi ki bu ta respondeba kel pergunta la. Tanbê nu ben odja modi ki nu pode djuda nos kongregason ten alegria.a

‘N TA MANDA MANTENHA PA PÉRSIDI, KI NU KRÊ TXEU’

6, 7. (a) Kal ki é un di kes manera ki ansions ta imita Jizus, Polu i otus sérvu di Deus? (b) Pamodi ki nos irmons ta fika más kontenti óras ki nu lenbra ses nómi?

⁶ Sima txeu irmon ku irmans fla, kuzê ki ta djuda-s xinti más kontenti é óras ki ansions mostra ma es ta preokupa ku es. Un di kes midjór manera di faze kel-li é imita izénplu di Davidi, Eliú i Jizus. (Lé 2 Samuel 9:6; Jó 33:1; Lucas 19:5.) Kada un di kes sérvu di Jeová li mostra ma es ta preokupaba ku otu algen di korason kantu ki es txoma-s pa ses nómi. Polu tanbê ta atxaba ma é inportanti lenbra i uza nómi di irmons. Na fin di un di se kartas el manda más di 25 irmon ku irmans mantenha i el uza ses nómi, un di es éra un irman ki txomaba Pérsidi. El fla: ‘N ta manda mantenha pa Pérsidi, ki nu krê txeu’. — Rom. 16:3-15.

⁷ Pa alguns ansion é difísil lenbra nómi di irmons. Má, óras ki es ta sforsa di verdadi pa faze kel-li, é sima ki es sta ta fla kel irmon ô kel irman: ‘Bo é inportanti pa mi.’ (Êxo. 33:17) Óras ki ansions ta lenbra di nómi di irmons i es ta txoma-s pa ses nómi pa da un komentáriu na studu di Sentinéla ô na otus runion, es ta djuda-s xinti más alegria. — Konpara ku João 10:3.

‘EL TA TRABADJA DURU NA SINHOR’

8. Di ki manera inportanti Polu sigi izénplu di Jeová ku Jizus?

⁸ Polu mostra ma el ta preokupaba ku otus algen, pamodi el ta daba es ilojiu di korason. Kel-li é otu manera inportanti pa nu djuda nos irmons ten más alegria. Na kel mésmu karta ki el fla irmons ma el krê kolaboraba pa es xinti alegria, el skrebe: ‘N ten txeu orgulhu di nhos.’ (2 Cor. 7:4) Kes ilojiu li di sertéza nkoraja kes irmon na Korintu. Polu da irmons di otus kongregason ilojiu sima kes-li. (Rom. 1:8; Fil. 1:3-5; 1 Tes. 1:8) Dipôs ki el límia nómi di Pérsidi na se karta pa kongregason na Roma, Polu inda fla: ‘El ta trabadja duru na Sinhor.’ (Rom. 16:12) Di sertéza kel ilojiu li da kel irman fiel txeu forsa! Kantu Polu ilôjia otus, el mostra ma el ta sigiba izénplu di Jeová ku Jizus. — Lé Marcos 1:9-11; João 1:47; Apo. 2:2, 13, 19.

9. Pamodi ki da i resebe ilojiu ta omenta alegria na kongregason?

⁹ Ansions di nos ténpu tanbê ta atxa ma é inportanti mostra irmons, através di kel ki es ta fla-s, ma es ta da-s txeu valor. (Pro. 3:27; 15:23) Tudu bês ki un ansion ta faze kel-li, é sima si el sta ta fla se irmons: ‘N gosta di kuzê ki bu faze. N ta preokupa ku bo.’ Irmons di sertéza meste obi ansions ta fla-s kel-li. Un irman di 50 i poku anu fla kel ki txeu algen ta xinti: “Kuazi N ka ta dadu un ilojiu na trabadju. Ka ten amor i pesoas ta sta sô ta konpiti ku kunpanheru. Pur isu, óras ki un ansion ta ilojia-m pamodi N faze algun kuza na kongregason, kel-li ta nkoraja-m txeu! N ta xinti ma nha Pai na Séu ta ama-m.” Un irmon ki ta kria dôs fidju el sô tanbê ta pensa si. Ka dura li un ansion da-l un ilojiu di korason. Modi ki el xinti? El fla: “Kes palavra di kel ansion da-m txeu forsa!” Nu ka ten dúvida ma óras ki un ansion ta ilôjia irmons di korason, el ta djuda-s xinti animadu i ku más alegria. I kel-li ta da-s más forsa pa es kontinua ta anda na kaminhu di vida ‘sen kansa.’ — Isa. 40:31.

‘NHOS PASTORA KONGREGASON DI DEUS’

10, 11. ((a) Modi ki ansions pode imita izénplu di Neemias? (b) Modi ki un ansion pode nkoraja irmons na un vizita di pastoreiu?

¹⁰ Di ki manera inportanti ansions ta mostra ma es ta preokupa ku ses irmons i es ta djuda-s xinti más alegria na kongregason? Óras ki es ta sforsa pa nkoraja kes ki meste. (Lé Atos 20:28.) Óras ki ansions ta faze kel-li, es ta imita kes pastor di kongregason di ténpu antigu. Pur izénplu, pensa na kuzê ki Neemias, ki éra un enkaregadu fiel, faze kantu el da kónta ma alguns di se irmons judeu staba dizanimadu na ses adorason. Bíblia ta fla ma el bai lógu i el nkoraja-s. (Nee. 4:14) Ansions di nos ténpu krê faze mésmu kuza. Es ta ‘bai lógu’ pa djuda irmons mante firmi na ses fé. Si situason ta da, es ta bai djobe irmons na ses kaza asi pa es nkoraja-s. Na kes vizita di pastoreiu, es ta krê ‘da irmons algun don spritual’. (Rom. 1:11) Kuzê ki ta djuda ansions faze kel-li?

¹¹ Antis di un ansion faze un vizita di pastoreiu, el meste tra ténpu pa el pensa na kel algen ki el sta bai djobe. Kal ki é kes prubléma ki el ta pasa pa el? Kuzê ki kel ansion pode fla-l pa nkoraja-l? Ki testu pode djuda-l ô ki personájen di Bíblia pasa pa un situason sima el? Si un ansion pripara dretu, kel-li ta djuda-l ka bai vizita kel irmon sô pa bai, má kel ansion ta djuda kel irmon xinti más animadu. Óras ki un ansion ta faze un vizita di pastoreiu, el ta dexa se irmons pâpia i el ta obi-s ku atenson. (Tia. 1:19) Un irman fla: “É sábi óras ki un ansion ta obi ku atenson kel ki nu ta fla.” — Lucas 8:18.

12. Kenha ki meste di nkorajamentu na kongregason i pamodi?

¹² Kenha ki ta tra pruvetu di vizitas di pastoreiu? Polu fla ansions pa es ‘presta atenson. . . na ribanhu interu’. Nton, tudu algen na kongregason meste nkorajamentu, ti kes publikador i pioneru ki ta faze ses sirvisu di manera fiel anu ta ben anu ta bai. Pamodi ki es meste pa pastoris na kongregason djuda-s? Pamodi alvês kes preson di es mundu mau ta dizanima kes irmon li, sikrê es ten un bon amizadi ku Jeová. Nu ben odja un kuza ki kontise na vida di Rei Davidi pa nu ntende pamodi ki alvês ti un sérvu fiel di Deus meste ajuda di otu kunpanheru di adorason.

‘ABIZAI DJUDA DAVIDI’

13. (a) Modi ki Isbi-Benobi pruveta di situason di Davidi? (b) Pamodi ki Abizai konsigi djuda Davidi?

¹³ Poku ténpu dipôs ki Davidi skodjedu pa ser rei, el nfrenta Gulias, ki éra di un rasa di jiganti, ki txomaba refains. Davidi mata kel jiganti ku koraji. (1 Sam. 17:4, 48-51; 1 Cró. 20:5, 8) Uns anu dipôs, na un géra kóntra kes filisteu, Davidi staba ta nfrenta un jiganti otu bês, se nómi éra Isbi-Benobi. I el tanbê éra un di kes refain. (2 Sam. 21:16) Má di kel bês la, kel jiganti staba kuazi ta mata Davidi. Pamodi? É ka pamodi Davidi perde se koraji, má é pamodi el staba sen forsa. Bíblia ta fla: ‘Davidi fika txeu kansadu.’ Kantu Isbi-Benobi da kónta ma Davidi staba kansadu, el pensa lógu na mata-l. Má kantu kel jiganti staba kuazi ta da Davidi ku lansa ‘kel óra, Abizai, fidju di Zeruia, djuda Davidi, el da kel filisteu ku lansa i el mata-l.’ (2 Sam. 21:15-17) Más un bokadinhu Davidi ka ta skapaba! Di sertéza Davidi fika txeu kontenti ku Abizai pamodi el staba atentu i el salva-l kel óra ki se vida staba na prigu! Kuzê ki nu pode prende ku kel-li?

14. (a) Modi ki nu pode vense kes difikuldadi uma grandi ki nu pode konpara ku Gulias? (b) Modi ki ansions pode djuda otus irmon rekupera ses forsa i alegria? Da un izénplu.

¹⁴ Na mundu interu, povu di Jeová sta ta sirbi Deus sikrê ku kes difikuldadi ki Satanás i kes ki sta di se ladu ta poi na ses kaminhu. Alguns irmon ta pasa pa difikuldadis ki é uma grandi, má es ten tudu kunfiansa na Jeová, pur isu es ta nfrenta kes difikuldadi ki é sima “Gulias” i es ta vense-s. Má alvês nu ta fika kansadu i dizanimadu pamodi nu ten ki sta tudu óra ta luta ku kes preson di kel mundu li. Óras ki nu ta fika dizanimadu, nu ta fika na prigu i nu ta kóre risku di kes preson vense-nu. Na kes momentu li, ajuda ki un ansion ta da-nu pode djuda-nu ganha alegria i forsa otu bês sima dja kontise ku txeu di nos. Un pionera ki ten 60 i poku anu fla: “Dja ten un ténpu, N ka staba ta xinti dretu. I N staba ta xinti kansadu na trabadju di pregason. Un ansion da kónta ma N staba sen forsa i el ben pâpia ku mi. El uza un stória di Bíblia ki da-m txeu koraji. N sigi kes konsedju ki el da-m i kel-la djuda-m txeu.” Kel irman fla tanbê: “Kel ansion mostra txeu amor pamodi el da kónta di nha situason i el djuda-m!” Di sertéza nu ta xinti kontenti pamodi ansions ta mostra amor i es ta preokupa ku nos i sima Abizai es sta prontu pa djuda-nu.

‘NHOS SABE DI KEL GRANDI AMOR KI N TEN PA NHOS’

15, 16. (a) Pamodi ki irmons ta amaba Polu txeu? (b) Pamodi ki nu ta ama nos ansions ki ta kuida di nos na kongregason?

¹⁵ Ser pastor ta iziji txeu sforsu. Alvês ansions ka ta durmi noti pamodi es ta sta preokupadu ku irmons, ta ora pa es ô nton es ta sta ta djuda ribanhu di Deus. (2 Cor. 11:27, 28) Má simé, kes ansion li ta kuida di ses responsabilidadi ku alegria sima Polu. Polu skrebe kes irmon na Korintu: ‘Ku txeu alegria, N ta gasta tudu i N ta ser gastadu ti ki N kaba pa djuda nhos.’ (2 Cor. 12:15) Nu ka ten dúvida ma apóstlu Polu ‘gasta tudu’ pa nkoraja se irmons pamodi el ta amaba es. (Lé 2 Coríntios 2:4; Fil. 2:17; 1 Tes. 2:8) É ka atoa ki irmons ta amaba el di korason! — Atos 20:31-38.

¹⁶ Anos tanbê ki ta sirbi Deus oji, nu ta ama nos ansions ki ta kuida di nos na kongregason i na nos orason nu ta agradese Jeová pamodi el da-nu es. Es ta pô-nu xinti más kontenti pamodi es ta preokupa ku kada un di nos. Kes vizita di pastoreiu ki es ta faze-nu ta da-nu koraji. Alén di kel-li, nu ta xinti gratidon pamodi es ta sta sénpri prontu pa djuda-nu óras ki nu ta xinti dizanimadu pamodi preson di kel mundu li. Kes ansion li ki ta preokupa ku nos di sertéza ‘ta kolabora pa nu ten alegria.’