Bons konsedju ki ta djuda-nu ten un família filís

Maridus, nhos ama nhos mudjer

‘Maridu debe ama se mudjer sima el ta ama se própi korpu. Ómi ki ta ama se mudjer, el ta ama se kabésa, pamodi ninhun ómi nunka ka ôdia se própi korpu; má, el ta da-l kumida i el ta kuida di el’. — EFÉSIOS 5:28, 29.

Maridu é xéfi di família. (Efésios 5:23) Má un bon maridu é ka duru i nen el ka ta iziji dimás di se família. El ta da se mudjer valor, el ta da-l kel ki el meste i el ta leba en kónta kuzê ki el ta pensa i kuzê ki el ta xinti. Tanbê el ta sforsa pa faze kuzas ki se mudjer gosta, envês di insisti na faze sô kel ki el krê. (Filipenses 2:4) El ta pâpia klaru ku se mudjer sobri kuzê ki el ta pensa i kuzê ki el ta xinti. Tanbê el ta obi-l óras ki el ta pâpia. El ka ta ‘sai di kabésa’ ku se mudjer, nen el ka ta sota-l ô fla-l kuzas ki ta ofende-l ô ki ta rabaxa-l. — Colossenses 3:19.

Mudjeris, nhos ruspeta nhos maridu

‘Mudjer debe ruspeta se maridu di korason.’ — EFÉSIOS 5:33.

Óras ki un mudjer ta ruspeta se maridu i el ta apoia disizons ki el ta toma, el ta djuda mante pas na família. Si se maridu fadja, el ka ta rabaxa-l, má el ta kontinua kalmu i ta mostra ruspetu. (1 Pedro 3:4) Óras ki el meste pâpia ku se maridu sobri un prubléma, el ta djobe kel midjór óra pa faze-l i el ta pâpia ku el ku ruspetu. — Eclesiastes 3:7.

Ser fiel pa kel algen ki bu kaza ku el

‘Ómi ta djunta ku se mudjer, i es ta bira un karni sô.’ — GÉNESIS 2:24.

Óras ki un ómi ku un mudjer ta kaza es ta kria un amizadi fórti. Pur isu, maridu ku mudjer debe sforsa txeu pa mante ses kazamentu fórti. Es ta faze kel-li óras ki es ta pâpia di korason i es ta mostra bondadi pa kunpanheru. Tanbê es debe kontinua fiel pa kunpanheru i ka faze séksu fóra di kazamentu. Ken ki ta trai se maridu ô se mudjer, sta faze un grandi maldadi. El ta kaba ku kunfiansa na se família i es pode ti sipara. — Hebreus 13:4.

Pai ku mai, nhos trena nhos fidjus

‘Iduka mininu na kaminhu ki el debe anda; mésmu óras ki el bira bédju, el ka ta disvia di el.’ — PROVÉRBIOS 22:6, nóta di rodapé.

Deus da pai ku mai responsabilidadi di trena ses fidjus. Kel-li ta inklui inxina-s modi ki es ta konporta i ser un bon izénplu pa es. (Deuteronómio 6:6, 7) Óras ki un fidju ta faze un kuza mariadu, un pai ô un mai ki ten sabedoria ka ta sai di kabésa ku el. Es ta sta ‘prontu pa obi, má es ka debe pâpia faxi i nen xatia faxi’. (Tiago 1:19) Si es disidi ma fidju meste disiplina, es ta da-l ku amor envês di faze-l ku raiba.

Fidjus, nhos obi ku nhos pai i ku nhos mai

‘Fidjus, nhos obi ku nhos pai i ku nhos mai. “Onra bu pai ku bu mai”’. — EFÉSIOS 6:1, 2.

Fidjus debe obi ku ses pai i ku ses mai i trata-s ku txeu ruspetu. Óras ki fidjus ta onra ses pai ku ses mai, es ta djuda ses família ten pas i alegria. Fidjus ki dja sta grandi ta onra ses pai ku ses mai óras ki es ta kuida di es. Kel-li pode inklui djuda-s kuida di ses kaza ô da-s kes kuza ki es meste. — 1 Timóteo 5:3, 4.