Kontinua ta bira bu amizadi ku Jeová más fórti

Duránti bu studu di Bíblia dja bu prende txeu kuza sobri Jeová. Kes kuza ki bu prende pô-u ta ama-l di tal manera ki talvês dja bu da bu vida pa el i bu batiza. Si inda bu ka faze kel-li, talvês bu sta pensa na faze-l já já. Má dipôs ki bu batiza, bu ta kontinua ta faze prugrésu. Bu pode kontinua ta bira bu amizadi ku Jeová más fórti pa tudu ténpu. Modi ki bu pode faze kel-li?

1. Pamodi ki bu debe kontinua ta bira bu amizadi ku Jeová más fórti?

Nu debe kontinua ta sforsa pa nu bira nos amizadi ku Jeová más fórti. Pamodi? ‘Asi pa nunka nu ka disvia’ di el. (Hebreus 2:1) Kuzê ki ta djuda-nu kontinua lial pa Jeová? Nu pode mante okupadu na trabadju di pregason i djobe otus manera di sirbi Jeová kada bês más midjór. (Lé Filipenses 3:16.) Sirbi Jeová é kel midjór manera di nu uza nos vida! — Salmo 84:10.

2. Kuzê más ki bu debe kontinua ta faze?

Nbóra bu studu di Bíblia sta kuazi ta kaba, bu meste kontinua ta sirbi Jeová. Bíblia ta fla ma nu meste ‘bisti di kel manera di ser novu’. (Efésios 4:23, 24) Sima bu ta ba ta studa Palavra di Deus i ta sisti runion, bu ta prende otus kuza sobri Jeová i se kualidadis. Tenta odja modi ki bu pode imita se manera di ser kada bês más txeu. Kontinua ta faze kalker mudansa ki bu meste pa poi Jeová kontenti.

3. Modi ki Jeová ta djuda-u faze prugrésu?

Bíblia ta fla: ‘Deus ta konpleta nhos trenamentu. El ta poi nhos fika firmi, el ta poi nhos fika fórti’. (1 Pedro 5:10) Nos tudu nu ta pasa pa tentason. Má Jeová ta da-nu kel ki nu meste pa nu ka faze kes kuza mariadu. (Salmo 139:23, 24) El ta promete da-u dizeju i forsa pa bu kontinua ta sirbi-l. — Lé Filipenses 2:13.

SABE MÁS

4. Kontinua ta pâpia i ta obi ku bu midjór Amigu

Faze orason i studa Bíblia dja djuda-u bira amigu di Jeová. Modi ki faze kes kuza li pode djuda-u bira más se amigu?

Lé Salmo 62:8, i dipôs pâpia sobri kel pergunta li:

• Pa bu bira bu amizadi ku Jeová más fórti, modi ki bu pode midjora bu manera di faze orason?

Lé Salmo 1:2 i nóta di rodapé, i dipôs pâpia sobri kel pergunta li:

• Pa bu bira bu amizadi ku Jeová más fórti, modi ki bu pode midjora bu leitura di Bíblia?

Kuzê ki bu pode faze pa bu studu di Bíblia djuda-u más txeu? Pa odja alguns ideia, odja VÍDIU, i dipôs pâpia sobri kes pergunta li:

VÍDIU: Midjora bu manera di faze studu pesoal (5:22)

• Kal ki é alguns sujiston ki sta na vídiu ki bu pode sigi?

• Ki asuntus bu ta gostaba di studa?

5. Djobe maneras di faze más pa Jeová

Óras ki bu ta djobe maneras di faze más na sirvisu pa Jeová, kel-li ta djuda-u kontinua ta faze prugrésu. Odja VÍDIU, i dipôs pâpia sobri kel pergunta li:

VÍDIU: Midjór vida ki ten (3:31)

• Na vídiu, kuzê ki Cameron ganha pamodi el faze más pa Jeová?

É ka tudu algen ki ta konsigi ba prega na otu país. Má nos tudu, nu pode sforsa pa faze más pa Jeová. Lé Provérbios 21:5, i dipôs odja alguns kuza ki bu ta gostaba di faze. . .

• na kongregason.

• na trabadju di pregason.

Modi ki kel prinsípiu ki sta na kel versíklu li pode djuda-u faze más pa Jeová?

Alguns kuza ki bu pode faze

• Midjora bus orason.

• Lé Bíblia interu.

• Tenta konxe tudu algen na bu kongregason.

• Kumesa un studu di Bíblia.

• Ser pioneru ajudanti ô pioneru fíksu.

• Si bo é un irmon, tenta ser un ajudanti di kongregason.

REZUMU

Kontinua ta bira bu amizadi ku Jeová más fórti i ta djobe maneras di faze más pa el. Asi, bu ta konsigi vive filís pa tudu ténpu!

Perguntas di rezumu

• Pamodi ki bu pode ten sertéza ma Jeová ta djuda-u sirbi-l ku lialdadi?

• Modi ki bu pode bira bu amizadi ku Jeová más fórti?

• Modi ki djobe maneras di faze más pa Jeová ta djuda-u faze prugrésu?

DJOBE MÁS

Kuzê ki ten más valor pa Jeová: Faze sô un kuza grandi pa prova ma nu ta adora-l ô ser lial pa el duránti tudu nos vida?

Ser fiel sima Abraon (9:20)

Ti un sérvu lial di Jeová pode perde alegria. Odja modi ki bu pode torna xinti alegria.

Studa i midita ta djuda-u torna ganha bu alegria (5:25)

Modi ki bu pode djobe maneras di faze más pa Jeová?

“Poi métas spritual pa bu da bu Kriador glória” (Sentinéla, 15 di julhu di 2004)

Pamodi ki é inportanti un kriston bira maduru, i modi ki bu pode konsigi kel-la?

“Nu sforsa pa bira un kriston maduru pamodi dia di Jeová sta kuazi ta txiga” (Sentinéla, 15 di maiu di 2009)