LISON 48

Skodje bus amigu dretu

Formatu di livru na papel

Bons amigu sénpri ta djuda-nu. Es ta da-nu más alegria na kes óra sábi i es ta da-nu forsa na kes óra kasábi. Má Bíblia ta aviza-nu ma é ka tudu algen ki é un bon amigu. Pur isu, modi ki bu pode skodje bons amigu? Nu ben odja respósta pa alguns pergunta.

1. Modi ki amigus ki bu ta skodje ta influensia-u?

Nu ten tendénsia di bira sima kes algen ki nu ta pasa ténpu ku es. Kel-li pode ser bon ô mau, ka ta nporta si nu sta pasa ténpu djuntu ku es ô si é na internet. Bíblia ta fla: ‘Ken ki ta anda ku algen ki ten sabedoria, ta ganha sabedoria, má ken ki ta sta djuntu ku algen ki ka ten juís [kes ki ka ta ama Jeová], ta ten prublémas.’ (Provérbios 13:20) Kes amigu ki ta ama i adora Jeová pode djuda-u kontinua ku un amizadi fórti ku el i djuda-u toma bons disizon. Má, ten amigus ki ka ta ama Jeová, pode pô-nu ta afasta di el. É pur isu ki Bíblia ta insentiva-nu pa nu skodje nos amigus dretu! Óras ki nos amigus é kes ki ta ama Jeová, es ta djuda-nu i nu ta djuda-s tanbê. Nu ta konsigi ‘kontinua ta nkoraja i ta djuda kunpanheru’. — 1 Tessalonicenses 5:11.

2. Modi ki amigus ki bu ta skodje ta poi Jeová ta xinti?

Jeová ta skodje se amigus dretu. ‘El ten amizadi fórti ku kes algen ki é lial pa el.’ (Provérbios 3:32) Modi ki Jeová ta xintiba si nu skodje amigus ki ka ta ama-l? El ta fikaba uma tristi! (Lé Tiago 4:4.) Má, si nu ka ten maus koléga, i si nu bira más amigu di Jeová i amigus di kes algen ki ta ama-l, el ta fika kontenti i el ta skodje-nu pa nu ser se amigu. — Salmo 15:1-4.

SABE MÁS

Odja pamodi ki é inportanti nu skodje bons amigu, i modi ki bu pode ten amigus ki ta djuda-u di verdadi.

3. Toma kuidadu ku maus koléga

Tudu kes algen ki ka ta ama Jeová i ki ka ta sigi se leis é maus koléga. Odja VÍDIU, i dipôs pâpia sobri kel pergunta li:

VÍDIU: Modi ki nu pode ivita maus koléga (6:17)

Modi ki nu pode kumesa ta ten maus koléga sen nu da kónta?

Lé 1 Coríntios 15:33, i dipôs pâpia sobri kes pergunta li:

Ki tipu di algen pode ser un mau koléga pa bo? Pamodi?

Lé Salmo 119:63, i dipôs pâpia sobri kel pergunta li:

Kuzê ki bu debe djobe na un amigu?

Un tijéla xeiu di masan. Un masan podri sta ta djunta móska i sta kumesa ta straga kes otu masan. — Un masan podri pode straga tudu kes otu. Modi ki un mau koléga pode influensia-u?

4. Nos amigus ka meste ser sima nos

Bíblia ta pâpia di dôs ómi na Israel antigu ki txomaba Davidi ku Jonatan. Jonatan éra fidju di rei i el éra mutu más bédju ki Davidi. Má simé, es éra grandis amigu. Lé 1 Samuel 18:1, i dipôs pâpia sobri kel pergunta li:

Pamodi ki nos amigus ka meste ten mésmu idadi ô kes mésmu kuza ki nos?

Lé Romanos 1:11, 12, i dipôs pâpia sobri kel pergunta li:

Modi ki amigus ki ta ama Jeová ta nkoraja kunpanheru?

Na vídiu, odja modi ki un irmon atxa amigus na undi ki el ka staba ta spéra. Odja VÍDIU, i dipôs pâpia sobri kes pergunta li:

VÍDIU: Bu pode atxa amigus na undi ki bu ka sta speraba (5:06)

Na vídiu, pamodi ki mai ku pai di Akil staba preokupadu ku amizadi ki el tinha na skóla?
Pamodi ki el kumesa ta gosta di kes tipu di amizadi la?
Kuzê ki el faze pa el ka xinti el sô?