LISON 59
Bu ta konsigi aguenta pirsigison
Sédu ô tardi, nos tudu ta pasa pa opozison, i ti nu pode sufri pirsigison. Má nu debe xinti medu?
1. Pamodi ki nu debe spéra pirsigison?
Bíblia ta fla klaru: ‘Tudu kes ki krê uza ses vida pa adora Deus, unidu ku Kristu Jizus, tanbê ta ser pirsigidu.’ (2 Timóteo 3:12) Jizus pirsigidu pamodi el ka ta fazeba párti di mundu di Satanás. Anos tanbê, nu ka ta faze párti di mundu. Pur isu, nu ka ta fika dimiradu óras ki govérnus i relijions ta pirsigi-nu. — João 15:18, 19.
2. Modi ki nu pode pripara pa pirsigison?
Gósi ki é ténpu pa nu bira nos kunfiansa na Jeová más fórti. Tra ténpu tudu dia pa bu faze orason pa el i pa bu lé se Palavra. Tanbê, sisti tudu runion. Faze kes kuza li, ta da-u kel forsa ki bu meste pa lida ku kalker tipu di pirsigison ku koraji, sikrê é bus família ki sta pirsigi-u. Apóstlu Polu ki pirsigidu txeu bês skrebe: ‘Jeová é kel ki ta djuda-m; N ka ta ten medu.’ — Hebreus 13:6.
Partisipa sénpri na pregason tanbê ta djuda-nu ten más koraji. Pregason ta djuda-nu kunfia na Jeová i vense kalker medu di ómi. (Provérbios 29:25) Si bu ganha koraji pa prega gósi, bu ta fika más priparadu pa kontinua ta prega mésmu si govérnus proíbi nos óbra. — 1 Tessalonicenses 2:2.
3. Kuzê ki nu ta ganha si nu aguenta firmi óras ki nu ta pirsigidu?
É klaru ki ninhun di nos ka gosta di ser pirsigidu. Má óras ki nu ta aguenta firmi, nos fé ta bira más fórti. Nu ta bira más amigu di Jeová pamodi nu ta xinti se ajuda óras ki nu ta atxa ma nu ka ta pode aguenta más. (Lé Tiago 1:2-4.) Jeová ta fika tristi óras ki el ta odja-nu ta sufri, má el ta fika kontenti óras ki el ta odja ma nu ka dizisti. Bíblia ta fla: ‘Si nhos aguenta sufrimentu pamodi nhos sta ta faze kel ki é dretu, Deus ta fika kontenti ku kel-li.’ (1 Pedro 2:20) Jeová ta ben da tudu kes algen ki kontinua lial pa el vida pa tudu ténpu, na un mundu undi ningen ka ta fika kóntra nos adorason pa el. — Mateus 24:13.
SABE MÁS
Prende pamodi ki nu ta konsigi kontinua lial pa Jeová mésmu óras ki pesoas ta pirsigi-nu, i modi ki el ta abensua-nu.
4. Bu ta konsigi aguenta opozison di família
Jizus sabia dretu ma alguns algen di nos família pode ka krê pa nu sirbi Jeová. Lé Mateus 10:34-36, i dipôs pâpia sobri kel pergunta li:
Kuzê ki pode kontise óras ki un algen na un família disidi sirbi Jeová?
Pa bu odja un izénplu di kel-li, odja VÍDIU, i dipôs pâpia sobri kel pergunta li:
Kuzê ki bu ta fazeba si un algen di bu família ô un amigu tenta pô-u para di sirbi Jeová?
Lé Salmo 27:10 i Marcos 10:29, 30. Dipôs di lé kada testu, pâpia sobri kel pergunta li:
Modi ki kel promésa li pode djuda-u si alguns algen di bu família ô amigus tenta pô-u para di sirbi Jeová?
5. Kontinua ta sirbi Jeová sikrê ku pirsigison
Nu meste ten koraji pa sirbi Jeová óras ki otus algen ta tenta inpidi-nu di faze kel-la. Odja VÍDIU, i dipôs pâpia sobri kel pergunta li:
Modi ki kes izénplu na vídiu ta da-u koraji?
Lé Atos 5:27-29 i Hebreus 10:24, 25. Dipôs di lé kada testu, pâpia sobri kel pergunta li:
Pamodi ki é inportanti kontinua ta adora Jeová mésmu óras ki govérnus ta proíbi nos trabadju di pregason ô nos runion?
6. Jeová ta djuda-u aguenta firmi
Na mundu interu, Tistimunhas di Jeová di idadi i kultura diferenti sta ta kontinua lial ta sirbi Jeová mésmu óras ki es ta pirsigidu. Pa odja kuzê ki ta djuda-s, odja VÍDIU. Dipôs pâpia sobri kel pergunta li:
Na vídiu, kuzê ki djuda kes Tistimunha di Jeová aguenta firmi?
Lé Romanos 8:35, 37-39 i Filipenses 4:13. Dipôs di lé kada testu, pâpia sobri kel pergunta li:
Modi ki kel testu li ta da-u sertéza ma bu pode aguenta kalker tipu di provason?
Lé Mateus 5:10-12, i dipôs pâpia sobri kel pergunta li:
Pamodi ki bu pode ser filís sikrê bu sta pirsigidu?
Milhons di Tistimunha di Jeová sta ta aguenta firmi, sikrê ku opozison. Abo tanbê, bu ta konsigi!
ALGUNS ALGEN TA FLA: “N ka ta konsigi aguentaba pirsigison.”
Ki testus di Bíblia pode djuda-s ten kel kunfiansa ki es meste?
REZUMU
Jeová ta da valor pa tudu sforsu ki nu ta faze pa sirbi-l, sikrê nu sta ta pirsigidu. Ku se ajuda, nu ta pode aguenta firmi!
Perguntas di rezumu
Pamodi ki nu debe spéra pirsigison?
Kuzê ki bu pode faze gósi pa bu sta priparadu pa óras ki pirsigison ben?
Kuzê ki pode djuda-u ten kunfiansa ma bu ta konsigi sirbi Jeová, ka ta nporta ki prublémas bu pasa pa el?
DJOBE MÁS
Odja un jóven ta splika modi ki Jeová djuda-l aguenta firmi kantu el podu na kadia pamodi el nega bai trópa.
Odja kuzê ki djuda un kazal mante lial pa Jeová pa txeu anu sikrê ku opozison.
Prende modi ki bu pode ten koraji óras ki bu sta pasa pa pirsigison.
“Pripara pa pirsigison désdi gósi” (Sentinéla, julhu di 2019)
Kuzê ki nu debe pensa sobri opozison na família? Kuzê ki nu pode faze pa nu mante pas i kontinua lial pa Jeová?
“Verdadi ta traze spada envês di pas” (Sentinéla, otubru di 2017)