• Modi ki Bíblia pode djuda-u?
    Vive filís pa tudu ténpu! — Un livru pa studa Bíblia
    • Lison 01. Un Bíblia abértu.

      LISON 01

      Modi ki Bíblia pode djuda-u?

      Kuazi nos tudu ta faze perguntas sobri vida, sufrimentu, mórti i futuru. Tanbê, nu ta preokupa ku kuzas di dia-dia, sima ganha dinheru pa sustenta ô ten un família filís. Txeu algen diskubri ma Bíblia ka ta responde sô perguntas inportanti di vida, má tanbê el ta da konsedju ki ta djuda-s na ses dia-dia. Bu ta atxa ma Bíblia pode djuda algun algen ki bu konxe?

      1. Kal ki é alguns pergunta ki Bíblia ta responde?

      Bíblia ta responde kes pergunta inportanti li: Modi ki vida kumesa? Pamodi ki nu sta li? Pamodi ki algen ta sufri? Kuzê ki ta kontise óras ki un algen móre? Si tudu algen krê pas, pamodi ki ten txeu géra? Kuzê ki ta ben kontise ku Téra na futuru? Bíblia ta insentiva-nu pa nu djobe respóstas pa kes pergunta li, i milhons di algen dja fika kontenti ku respóstas ki Bíblia ta da.

      2. Modi ki Bíblia pode djuda-nu na nos dia-dia?

      Bíblia ta da-nu bons konsedju. Pur izénplu, el ta inxina famílias modi ki es pode ser filís di verdadi. El ta fla-nu modi ki nu pode lida ku prublémas i modi ki nu pode gosta di nos trabadju. Na kel livru li, bu ta ben prende kuzê ki Bíblia ta inxina sobri kes asuntu li i sobri otus asuntu. Bu pode ben konkorda ma ‘tudu ki sta na Skritura [tudu ki sta na Bíblia] ta sirbi’. — 2 Timóteo 3:16.

      Kel livru li ka ta toma lugar di Bíblia. Má, el ta nkoraja-u pa bu konxe Bíblia más dretu. Pur isu, nu ta insentiva-u pa bu lé kes testu di Bíblia ki sta na kes lison li i konpara-s ku kuzê ki bu sta prende.

      SABE MÁS

      Odja modi ki Bíblia ten stadu ta djuda pesoas, modi ki bu pode gosta di lé Bíblia i pamodi ki é bon bu ten ajuda pa bu pode ntende-l.

      3. Bíblia pode gia-nu

      Bíblia é sima un lus fórti. El ta djuda-nu toma bons disizon i el ta fla-nu kuzê ki sta ben kontise na futuru.

      Lé Salmo 119:105, i dipôs pâpia sobri kes pergunta li:

      • Kuzê ki skritor di kel Salmo li ta atxaba di Bíblia?

      • Kuzê ki bu ta atxa di Bíblia?

      Un ómi sta ta anda di noti pértu di un lagu na un kaminhu xeiu di pédra. El sta ku un lantérna na mô pa límia kaminhu.

      4. Bíblia pode responde nos perguntas

      Un mudjer odja ma Bíblia djuda-l atxa respósta pa kes pergunta ki dja el tinha txeu anu ta pensaba na el. Odja VÍDIU, i dipôs pâpia sobri kes pergunta li:

      VÍDIU: Nunka ka bu perde speransa! (1:48)

      • Na vídiu, ki tipu di perguntas ki kel mudjer tinha?

      • Modi ki studu di Bíblia djuda-l?

      Bíblia ta insentiva-nu pa nu faze perguntas. Lé Mateus 7:7, i dipôs pâpia sobri kel pergunta li:

      • Ki perguntas bu ten ki bu ta gostaba pa Bíblia responde?

      5. Bu pode gosta di lé Bíblia

      Txeu algen gosta di lé Bíblia, i kel-la sta ta djuda-s. Odja VÍDIU, i dipôs pâpia sobri kes pergunta li:

      VÍDIU: Leitura di Bíblia (2:05)

      • Na vídiu, kuzê ki kes jóven ta atxaba di leitura?

      • Kuzê ki es ta atxa gósi di leitura di Bíblia?

      Bíblia ta fla ma el pode da-nu instruson ki ta konsola-nu i ki ta da-nu speransa. Lé Romanos 15:4, i dipôs pâpia sobri kel pergunta li:

      • Bu ta gostaba di sabe más sobri kel promésa di konsolu i speransa ki Bíblia ta da?

      6. Otus algen pode djuda-nu ntende Bíblia

      Txeu algen, alén di es lé Bíblia es sô, es diskubri ma pâpia ku otus sobri Bíblia pode djuda-s. Lé Atos 8:26-31, i dipôs pâpia sobri kel pergunta li:

      Dizenhus: 1. Filipi kel pregador sta ta splika Skrituras pa kel ómi di Itiópia. 2. Un Tistimunha di Jeová sta ta pâpia di Bíblia ku un mai ku se dôs fidju.

      Kel ómi di Itiópia mesteba di ajuda pa ntende Skrituras. Txeu algen oji tanbê ta atxa ma pâpia di Bíblia ku otus algen ta djuda-s.

      ALGUNS ALGEN TA FLA: “Studa Bíblia é pérda di ténpu.”

      • Kuzê ki bu ta atxa? Pamodi?

      REZUMU

      Bíblia ta da-nu konsedju pa dia-dia, el ta responde perguntas inportanti i el ta da-nu konsolu i speransa.

      Perguntas di rezumu

      • Ki tipu di konsedju nu ta atxa na Bíblia?

      • Kal ki é alguns di kes pergunta ki Bíblia ta responde?

      • Kuzê ki bu ta gostaba di prende na Bíblia?

      Sprimenta faze kel-li

      DJOBE MÁS

      Odja modi ki kes konsedju di Bíblia pode djuda-nu.

      “Konsedjus di Bíblia ta sirbi pa kalker ténpu” (Sentinéla, nunbru 1 di 2018)

      Repara modi ki Bíblia djuda un ómi ki sta ta lutaba ku sentimentus kasábi désdi pikinoti.

      N kumesa un vida novu rei di sábi (2:53)

      Odja alguns konsedju di Bíblia ki ta djuda un família ser filís.

      “12 kuza ki ta djuda famílias ser filís” (Nhos korda!, nunbru 2 di 2018)

      Txeu algen ta atxa ma é Deus ki sta manda na mundu. Má bu ta atxa ma kel-li é verdadi? Odja kuzê ki Bíblia ta fla.

      Pamodi ki nu debe studa Bíblia? — Vídiu konplétu (3:14)

  • Bíblia é mensaji di Deus pa nos
    Vive filís pa tudu ténpu! — Un livru pa studa Bíblia

    • 1. Modi ki Deus pode ser Autor di Bíblia si é ómis ki skrebe-l?

      Uns 40 ómi skrebe Bíblia duránti uns 1.600 anu. Kel primeru livru skrebedu na anu 1513 A.J. i kel últimu livru skrebedu pa vólta di anu 98 D.J. Kes algen ki skrebe Bíblia éra txeu diferenti di kunpanheru. Pur izénplu, alguns éra pastor, piskador i rei. Má simé, tudu pártis di Bíblia sta di akordu ku kunpanheru. Modi ki kel-li é posível? Pamodi Deus é Autor di Bíblia. (Lé 1 Tessalonicenses 2:13.) Kes skritor ka skrebe ses própi ideia, má es ‘pâpia di párti di Deus sima es giadu pa spritu santu.’a (2 Pedro 1:21) Deus uza se spritu santu pa poi, ô pa motiva, kes ómi pa skrebe se pensamentus. — 2 Timóteo 3:16.