LISON 51
Modi ki bu pode agrada Jeová na manera ki bu ta pâpia?
Kantu Jeová kria-nu, el da-nu un prezenti bunitu ki é kapasidadi di pâpia. Manera ki nu ta uza kel prezenti li é inportanti pa Jeová? É klaru ki sin! (Lé Tiago 1:26.) Nton, modi ki nu pode uza nos kapasidadi di pâpia di un manera ki ta agrada Jeová?
1. Modi ki nu pode uza dretu kel prezenti li ki Jeová da-nu?
Bíblia ta fla-nu pa nu ‘kontinua ta nkoraja i ta djuda kunpanheru’. (1 Tessalonicenses 5:11) Ten algun algen ki bu ta atxa ma meste di nkorajamentu? Kuzê ki bu pode faze pa djuda-l xinti midjór? Fla kel algen ma bu ta preokupa ku el. Talvês bu pode fla-l un kuza ki bu gosta na el. Ki testu di Bíblia bu ta uzaba pa nkoraja un algen ki bu konxe? Ten txeu testu di Bíblia ki bu pode uza. Tanbê, lenbra ma manera ki bu ta pâpia pode mexe ku otus. Pur isu, sforsa pa bu pâpia sénpri ku bondadi i brandura. — Provérbios 15:1.
2. Ki tipu di konbérsu nu debe ivita?
Bíblia ta fla: ‘Ka debe sai di nhos bóka ninhun palavra mariadu’. (Lé Efésios 4:29.) Kel-li krê fla ma nu ka debe uza maus palavra ô fla palavras duru pa mágua otus algen. Tanbê, nu ka debe pâpia mal di otus algen i nen kalunia-s. — Lé Provérbios 16:28.
3. Kuzê ki ta djuda-nu pâpia di un manera ki ta nkoraja otus?
Txeu bês kes kuza ki nu ta pâpia di el, ta mostra kuzê ki nu ten na korason i kuzê ki nu ta pensa. (Lucas 6:45) Nton, nu ten ki trena nos kabésa pa nu konsentra na kes kuza ki é justu, puru, ki debe amadu i ki merese lovor. (Filipenses 4:8) Pa nu konsigi konsentra na kes kuza li, nu meste skodje dretu nos amigus i kuzas ki nu ta divirti ku el. (Provérbios 13:20) Tanbê un kuza ki pode djuda-nu é pensa antis di nu pâpia. Pensa na modi ki otus algen ta ba xinti ku kuzas ki bu ta fla. Bíblia ta fla: ‘Palavras ki ta fladu sen pensa é sima finka algen un spada, má língua di kes algen sábiu é un kura.’ — Provérbios 12:18.
SABE MÁS
Prende modi ki bu pode pâpia di un manera ki ta agrada Jeová i ki ta nkoraja otus.
4. Toma kuidadu ku kuzas ki bu ta fla
Alvês, nos tudu nu ta fla kuzas ki dipôs nu ta rapende. (Tiago 3:2) Lé Gálatas 5:22, 23, i dipôs pâpia sobri kes pergunta li:
Kal di kes kualidadi li bu pode pidi na orason pa djuda-u kontrola manera ki bu ta pâpia? Modi ki kes kualidadi li pode djuda-u?
Lé 1 Coríntios 15:33, i dipôs pâpia sobri kel pergunta li:
Modi ki bus amigu i kuzas ki bu ta divirti ku el pode influensia manera ki bu ta pâpia?
Kuzê ki pode influensia bu manera di pâpia ku otus?
Lé Eclesiastes 3:1, 7, i dipôs pâpia sobri kel pergunta li:
Na ki situasons alvês é bon fika kaladu ô spéra otu óra midjór pa fla algun kuza?
5. Pâpia kuzas dretu sobri otus algen
Modi ki nu pode ivita fla kuzas ki ta mágua ô ki ka ta mostra bondadi? Odja VÍDIU, i dipôs pâpia sobri kes pergunta li:
Na vídiu, pamodi ki kel irmon krê mudaba manera ki el ta papiaba sobri otus?
Kuzê ki el faze pa el muda?
Lé Eclesiastes 7:16, i dipôs pâpia sobri kel pergunta li:
Kuzê ki nu debe lenbra di el óras ki nu ta xinti tentadu na pâpia mal di otus algen?
Lé Eclesiastes 7:21, 22, i dipôs pâpia sobri kel pergunta li:
Modi ki kes versíklu li pode djuda-u ka fika xatiadu óras ki un algen ta pâpia mal di bo?
6. Mostra bondadi óras ki bu ta pâpia ku bu família
Jeová krê pa nu pâpia ku nos família di un manera ki ta mostra amor i bondadi. Odja VÍDIU, i dipôs pâpia sobri kel pergunta li:
Kuzê ki ta djuda-u pâpia ku bu família ku bondadi?
Lé Efésios 4:31, 32, i dipôs pâpia sobri kel pergunta li:
Modi ki nu pode pâpia ku nos família di un manera ki ta pô-s ta xinti ma es ten valor?
Jeová fla kuzê ki el ta xintiba pa se Fidju, Jizus. Lé Mateus 17:5, i dipôs pâpia sobri kel pergunta li:
Modi ki bu pode imita Jeová na manera ki bu ta pâpia ku bu família?
Djobe oportunidadis di ilôjia otus
ALGUNS ALGEN TA FLA: “Ami N ta fla kel ki N ta pensa. Ken ki gosta, gosta. Ken ki ka gosta é se prubléma.”
Bu ta konkorda ku kel-li? Pamodi?
REZUMU
Kes kuza ki nu ta fla pode djuda ô mágua un algen. Pur isu, nu meste pensa dretu na kuzê ki nu ta fla, ki óra ki nu ta fla i modi ki nu ta fla.
Perguntas di rezumu
Modi ki bu kapasidadi di pâpia pode djuda otus?
Ki tipu di konbérsu bu krê ivita?
Kuzê ki pode djuda-nu pâpia sénpri ku bondadi i di un manera ki ta nkoraja otus?
DJOBE MÁS
Kuzê ki pode djuda-nu pâpia di un manera ki ta nkoraja otus?
Prende kuzê ki pode djuda-u ka da maus palavra.
Odja kuzê ki bu pode faze pa bu ka kai na armadilha di pâpia mal di otus algen.
Odja modi ki Jeová djuda un ómi ki staba ta sforsa pa el para di da maus palavra.
“N kumesa ta pensa na ki direson nha vida staba ta bai” (Sentinéla, 1 di agostu di 2013)