‘Kada un ta leba se própi karga’
‘Kada un di nos ta ben presta kónta di se kabésa pa Deus.’ — ROMANOS 14:12.
1. Ki disizon ki kes três ebreu toma ku koraji?
TRÊS jóven ebreu ki ta moraba na Babilónia tevi ki toma un disizon di vida ô mórti. Es ta nbaxaba dianti di kel státua grandi sima lei di país ta izijiba? Ô es ta negaba adora-l pa dipôs es botadu na un fornadja ku lumi? Sadraki, Mizaki i Abidinegu ka tevi ténpu pa pergunta algen kuzê ki es ta fazeba. Es sabia kuzê ki es ta fazeba. Sen medu es fla: ‘Ó rei, fika ta sabe ma nu ka ta sirbi bus deus nen nu ka ta adora kel imaji di oru ki bu faze.’ (Daniel 3:1-18) Kada un di kes três ebreu toma ses própi disizon.
2. Kenha ki poi Pilatus ta toma disizon sobri Jizus? Má kel-li libra di se responsabilidadi?
2 Uns 600 anu dipôs, un governador obi kes akuzason ki staba ta fazedu kóntra un ómi. Kantu el analiza kel kazu, el fika konvensidu ma kel ómi ki staba ta akuzadu éra inosenti. Má, kel monti di algen staba ta iziji pa kel ómi matadu. Kel governador ka krê mataba kel ómi, má el ka tinha koraji. Nton, el faze kel ki kel monti di algen kria pa el faze. Kantu el laba mô, el fla ‘Ami é inosenti di sangi di kel ómi li.’ Dipôs, el ntrega-l pa el pregadu na un staka. Envês di el disidi di el pa el kuzê ki el ta fazeba ku Jizus kristu, Pónsiu Pilátus dexa pa otus algen toma disizon pa el. Sikrê Pilátus laba se mô, inda el éra responsável pa kel ki kontise ku Jizus. — Mateus 27:11-26; Lucas 23:13-25.
3. Pamodi ki nu ka debe dexa pa otus algen toma disizons pa nos?
3 I bo? Óras ki bu meste toma disizons bu ta faze sima kes três ebreu ô bu ta dexa otus algen disidi pa bo? É ka fásil toma disizons. Pa toma bons disizon, un algen meste ser maduru. Pai ku mai meste toma bons disizon pa ses fidju pikinoti. É klaru ki toma disizons pode ser difísil óras ki situason é konplikadu i ten txeu kuza ki bu meste pensa na es primeru. Nbóra ansions ku ajudantis di kongregason pode djuda-nu leba nos ‘karga’, es ka pode toma disizons pa nos. Kel-li é ka ses responsabilidadi. (Gálatas 6:1, 2; nóta di rodapé.) Envês di kel-li, ‘kada un di nos ta ben presta kónta di se kabésa pa Deus.’ (Romanos 14:12) Bíblia ta fla: ‘Kada un ta leba se própi karga.’ (Gálatas 6:5) Nton, modi ki nu pode toma bons disizon na nos vida? Primeru nu meste rekonhese ma nu meste di ajuda i dipôs prende toma bons disizon.
Un kuza inportanti
4. Ki lison inportanti sobri toma disizons nu debe prende ku dizobidiensa di kel primeru kazal?
4 Poku ténpu dipôs ki Deus kria Adon ku Eva, es toma un disizon ki traze txeu prubléma. Es disidi kume fruta di kel arvi di konhisimentu di kel ki é dretu i di kel ki é mariadu. (Génesis 2:16, 17) Kuzê ki pô-s ta toma kel disizon li? Bíblia ta fla: ‘Mudjer odja ma arvi éra bon pa kume i sô di odja-l el xinti dizeju pa el, sin, ma el éra sábi di odja. Nton el panha kel fruta di kel arvi i el kumesa ta kume-l. Dipôs el da se maridu kel fruta tanbê, kantu el staba djuntu ku el, i el kumesa ta kume-l.’ (Génesis 3:6) Eva toma kel disizon la pamodi el pensa sô na se kabésa. Más tardi, Adon disidi faze mésmu kuza. I pamodi kel-li, pekadu ku mórti ‘spadja pa mundu interu’. (Romanos 5:12) Dizobidiensa di Adon ku Eva debe inxina-nu un lison inportanti sobri nos limitason. Si nu ka sigi kes orientason ki Deus ta da-nu nu ka ta toma bons disizon.
5. Ki orientason ki Jeová da-nu i kuzê ki nu meste faze pa el pode djuda-nu?
5 Nu ta fika kontenti di sabe ma Jeová Deus ta da-nu orientasons! Bíblia ta fla: ‘Si nhos disvia pa direita ô pa skérda, nhos obidu ta obi un palavra nhos tras, ta fla: “Kel-li ki é kaminhu. Nhos anda na el.”’ (Isaías 30:21) Jeová ta pâpia ku nos através di Bíblia, ki é se Palavra. Nu meste studa Bíblia i konxe-l dretu. Pa nu toma bons disizon, nu meste kume ‘kumida fórti [ki] é pa algen maduru’, pa [nu] pode ‘trena nos kapasidadi di pensa óras ki nu ta uza-l pa sabe kuzê ki é dretu i kuzê ki é mariadu.’ (Hebreus 5:14) Nu pode trena nos kapasidadi di pensa óras ki nu ta aplika kel ki nu ta prende na Palavra di Deus.
6. Kuzê ki nu meste faze pa nos konsénsia funsiona dretu?
6 Óras ki nu ta toma disizon, un kuza txeu inportanti é nos konsénsia. Konsénsia é kel kapasidadi ki nu ten ki ta djuda-nu sabe kuzê ki é dretu i kuzê ki é mariadu. El pode ‘kondena-nu ó ti mésmu diskulpa-nu.’ (Romanos 2:14, 15) Má pa nos konsénsia funsiona dretu el meste ser orientadu pa Palavra di Deus i nu meste aplika kuzê ki nu prende. Si un konsénsia ka sta trenadu, é faxi el ser influensiadu pa kustumu i tradisons. Lugar undi nu ta sta i kuzê ki otus algen ta pensa pode pô-nu ta toma maus disizon. Kuzê ki ta kontise si txeu bês nu ka ta obi ku nos konsénsia i nu ta viola kes leis di Deus? Ku ténpu, óras ki nu faze un kuza mariadu, nos konsénsia ka ta inkomoda-nu más. El ta bira sima un péli ki kemadu ‘ku féru kenti’, ki ka ta xinti nada más. (1 Timóteo 4:2) Má un konsénsia ki é trenadu pa Palavra di Deus sénpri ta djuda-nu toma bons disizon.
7. Ki kuza inportanti ta djuda-nu toma bons disizon?
7 Un kuza inportanti ki ta djuda-nu toma bons disizon, é konxe Bíblia dretu i aplika kuzê ki nu prende. Envês di toma disizons faxi i sen pensa, nu debe tra ténpu pa nu djobe prinsípius di Bíblia i sabe modi ki nu ta aplika kel ki nu prende. Mésmu óras ki nu ten ki toma un disizon faxi sima kontise ku Sadraki, Mizaki i Abidinegu, si nu konxe Palavra di Deus dretu i nos konsénsia sta trenadu pa el, nu ta toma bons disizon. Bira un algen maduru pode midjora nos kapasidadi di toma disizons. Nu ben odja dôs izénplu.
Ki tipu di amigus ki nu ta skodje?
8, 9. (a) Ki prinsípius ta mostra ma nu debe ivita maus koléga? (b) É sô kes algen ki ten konportamentu mariadu ki é maus koléga? Splika.
8 Apóstlu Polu fla: ‘Ka nhos ngana nhos kabésa. Maus koléga ta straga bons ábitu.’ (1 Coríntios 15:33) Jizus Kristu fla se disiplus: ‘Nhos ka ta faze párti di mundu’. (João 15:19) Óras ki nu prende kes prinsípiu li, nu ta ntende klaru ma nu ka debe faze amizadi ku kes ki ta faze konportamentu seksual mariadu, kes ki ta faze adultériu, kes ladron, kes ki ta bebe dimás i otus algen ki ta faze kuzas sima kes-li. (1 Coríntios 6:9, 10) Sima nu ta ba ta konxe kes prinsípiu di Bíblia midjór, nu ta ntende ma nu ka debe odja kes tipu di algen li tanbê na filmis, na prugramas di tilivizon, na internet ô lé livrus sobri es. Nu pode fla mésmu kuza sobri kes algen ki nu ta pâpia ku es na internet i ki ‘ta sukundi kel ki es é.’ — Salmo 26:4.
9 Má nu debe faze amizadi ku kes algen ki é dretu, má ki ka ten fé na kel Deus verdaderu? Bíblia ta fla-nu: ‘Mundu interu sta na puder di Malvadu.’ (1 João 5:19) Nu ta ntende ma maus koléga é ka sô kes algen ki ten konportamentu mariadu. Pur isu, nu ta mostra sabedoria óras ki nu ta faze amizadi sô ku kes algen ki é amigu di Jeová.
10. Kuzê ki ta djuda-nu toma bons disizon sobri kuzê ki nu ta faze ku pesoas di mundu?
10 Nen sénpri ka ta da pa ivita sta djuntu ku algen di mundu i nen é ka kel-la ki nu krê. (João 17:15) Óras ki nu sta na pregason, na skóla ô na trabadju, nu ten ki sta djuntu ku pesoas di mundu. Un irman ô un irmon ki é kazadu ku un algen ki é ka Tistimunha di Jeová, ten ki sta djuntu ku algen di mundu inda más di ki otus irmon. Si nu trena nos kapasidadi di pensa, nu ta konsigi ntende kal ki é diferénsa entri sta ku pesoas di mundu i ten un amizadi fórti ku es. (Tiago 4:4) Kel-li ta djuda-nu disidi si nu ta partisipa na atividadis fóra di óra di skóla ô di trabadju, sima djuga, badja, bai pa féstas ô kume djuntu ku es.
Ki trabadju ki nu ta skodje
11. Óras ki nu ta toma disizons sobri trabadju kuzê ki nu debe analiza primeru?
11 Aplika prinsípius di Bíblia na nos vida, ta djuda-nu toma bons disizon óras ki nu ta kunpri nos responsabilidadi di ‘kuida di família.’ (1 Timóteo 5:8) Primeru kuza ki nu sta ben pâpia di el é ki tipu di trabadju ki nu debe skodje. Skodje un trabadju ki ta apoia kuzas ki Bíblia ta kondena é mariadu. Tistimunhas di Jeová ka ta seta trabadjus ki ta nvolve idolatria, furta, uza sangi di manera mariadu ô otus kuza ki Bíblia ta kondena. Tanbê nu ka debe ngana ô konta mintira pa otus algen mésmu ki nos patron fla-nu pa nu faze kel-la. — Atos 15:29; Apocalipse 21:8.
12, 13. Kal ki é otus kuza inportanti ki nu debe analiza óras ki nu ta toma disizons sobri trabadju?
12 I si un trabadju ka ta bai kóntra ninhun prinsípiu di Bíblia? Sima nu ta ba ta konxe prinsípius di Bíblia kada bês más midjór, nu ta ganha más kapasidadi di pensa, nu ta konsigi sabe kal ki é otus kuza ki nu debe analiza. I si un trabadju ta bai kóntra prinsípius di Bíblia sima atende tilifóni na un lugar ki es ta djuga dinheru?. Tanbê é inportanti sabe kenha ki ta paga-u i na undi ki bu sta ba faze kel trabadju. Pur izénplu, imajina ma un irmon ta trabadja na konstruson. El devia setaba pinta un igreja dja ki kel igreja ta faze párti di adorason falsu? — 2 Coríntios 6:14-16.
13 I si bu patron seta un trabadju pa bu ba pinta un igreja? Na kel kazu li, nu tinha ki lebaba en kónta alguns kuza sima, kal ki é nos responsabilidadi i ti ki pontu nu ta sta nvolvidu na kel trabadju. Kuzê ki nu pode fla di un trabadju ki ka ta bai kóntra prinsípius di Bíblia sima un algen ki ta ntrega karta pa tudu lugar ti mésmu na kes lugar ki es ta faze kuza mariadu? Kel prinsípiu ki nu ta atxa na Mateus 5:45 pode djuda-nu. Kuzê ki nu debe leba en kónta é modi ki nos konsénsia ta fika óras ki nu faze kes tipu di trabadju li tudu dia. (Hebreus 13:18) Nton, pa nu toma bons disizon sobri trabadju, nu debe dizenvolve nos kapasidadi di pensa i trena nos konsénsia ki Deus da-nu.
‘Lenbra di el na tudu bus kaminhu’
14. Óras ki nu ta toma disizons, kuzê ki nu debe leba en kónta?
14 I kes disizon ki nu ta toma sobri idukason ô si nu ta seta ô nau un tratamentu di saúdi? Óras ki nu ta toma kalker disizon, nu debe djobe kes prinsípiu di Bíblia ki ta pâpia sobri kel asuntu i dipôs uza nos kapasidadi di pensa, asi pa nu pode aplika-s. Salumon, un rei di Israel antigu ki tinha txeu sabedoria fla: ‘Kunfia na Jeová di tudu bu korason, ka bu kunfia na bu própi ntendimentu. Lenbra di el na tudu bus kaminhu, i el ta bira-u bus kaminhu rétu.’ — Provérbios 3:5, 6.
15. Kuzê ki nu ta prende ku kes irmon di ténpu di apóstlus sobri toma disizons?
15 Txeu bês, disizon ki nu ta toma ta afeta otus algen i nu debe leba kel-li en kónta. Pur izénplu, kes primeru kriston, ka mesteba obi ku txeu di kes lei ki Deus daba israelitas sobri kumida. Es podia disidiba si es ta kumeba ô nau kes tipu di kumida ki lei ta flaba ma éra inpuru. Má apóstlu Polu skrebe sobri karni di un animal ki talvês pode staba ligadu ku adorason falsu: ‘Si kumida ta poi nha irmon ta tropesa, nunka más N ka ta kume karni, pa N ka poi nha irmon ta tropesa.’ (1 Coríntios 8:11-13) Kristons na ténpu di apóstlus, insentivadu pa mostra konsiderason pa konsénsia di otus algen asi pa es ka pô-s ta tropesa. Disizons ki nu ta toma ka debe ser ‘motivu di tropesu’. — 1 Coríntios 10:29, 32.
Djobe sabedoria di Deus
16. Modi ki orason dja djuda-nu toma disizons?
16 Un kuza ki pode djuda-nu toma bons disizon é orason. Disiplu Tiagu fla: ‘Si algen tene falta di sabedoria, el debe kontinua ta pidi Deus, pamodi el ta da tudu algen avontádi i sen kondena, i el ta dadu el.’ (Tiago 1:5) Nu pode ora pa Jeová ku kunfiansa pa el da-nu sabedoria ki nu meste pa djuda-nu toma bons disizon. Óras ki nu ta pâpia ku Deus verdaderu sobri nos preokupason i nu ta djobe se orientason, spritu santu pode djuda-nu ntende kes testu di Bíblia ki nu sta ta djobe i tanbê djuda-nu lenbra di kes ki talvês dja nu skese.
17. Modi ki otus algen pode djuda-nu toma disizons?
17 Otus algen pode djuda-nu toma disizons? Sin. Jeová da-nu algen maduru na kongregason. (Efésios 4:11, 12) Nu pode pidi-s ajuda prinsipalmenti óras ki nu meste toma un disizon inportanti. Kes irmon i irmans li ten txeu spiriénsa na vida i es ta ntende Bíblia dretu. Es pode djuda-nu analiza prinsípius di Bíblia ki ta pô-nu toma bons disizon i es ta djuda-nu ‘konfirma kuzê ki é más inportanti’. (Filipenses 1:9, 10) Má, nu debe lenbra ma nu ten ki toma kuidadu pa ka dexa otus algen toma disizon pa nos. Kel responsabilidadi li é di nos.
Rezultadu sénpri ta ser bon?
18. Kuzê ki nu pode fla sobri rezultadu di un bon disizon?
18 Kes disizon ki nu ta toma ku bazi na prinsípius di Bíblia sénpri ta ten bons rezultadu? Sin, sikrê na komésu pode parse ma ka sta kóre dretu. Sadraki, Mizaki ku Abidinegu sabia ma mórti podia ser rezultadu di ses disizon di ka adora imaji. (Daniel 3:16-19) Di mésmu manera, dipôs ki kes apóstlu fla kel Tribunal más altu di judeus ma es ta obiba ku Deus antis di es obi ku ómis, es sotadu antis di es libertadu. (Atos 5:27-29, 40) Lenbra tanbê ma sikrê nu toma bons disizon, algun kuza pode kóre mariadu pamodi ‘ténpu i kuzas ki algen ka sta spéra’ pode kontise. (Eclesiastes 9:11) Sikrê nu sufri pamodi nu toma bons disizon, nu pode ten sertéza ma Jeová ta djuda-nu aguenta firmi i el ta abensua-nu na fin. — 2 Coríntios 4:7.
19. Kuzê ki ta djuda-nu ten koraji pa nu toma nos própi disizon?
19 Óras ki nu ta toma disizon, nu debe djobe kes prinsípius di Bíblia i uza nos kapasidadi di pensa asi pa nu faze sima nu prende. Nu debe agradese pa ajuda ki Jeová sta ta da-nu através di spritu santu i di irmons maduru na kongregason! Através di kes orientason li i ajuda nu ta ten koraji pa nu toma nos própi disizon.
Kuzê ki bu prende?
• Ki kuza inportanti ta djuda-nu toma bons disizon?
• Modi ki bira un algen maduru ta afeta kes amizadi ki nu ta skodje?
• Kal ki é alguns kuza inportanti ki nu debe analiza óras ki nu ta toma disizon sobri trabadju?
• Ki ajuda ki nu ten ki ta pô-nu ta toma bons disizon?
[Dizenhu]
Dizobidiensa di Adon ku Eva ta inxina-nu un lison inportanti.
[Dizenhu]
Antis di nu toma un disizon inportanti, nu debe djobe prinsípius di Bíblia.