LISON 28
Mostra ma bu ta da valor pa kuzê ki Jeová i Jizus faze pa bo
Modi ki bu ta xinti óras ki un amigu da-u un prezenti ki bu gosta txeu? Di sertéza bu ta fika kontenti i bu ta krê mostra-l ma bu ta da valor pa kel prezenti. Jeová i Jizus da-nu kel prezenti más grandi ki nu pode resebe. Ki prezenti é kel-li? I modi ki nu pode mostra ma nu ta da-l valor?
1. Kal ki é un manera di mostra ma nu ta da valor pa kuzê ki Deus ku Jizus faze pa nos?
Bíblia ta promete ma ‘tudu kenha ki mostra fé na Jizus’ pode vive pa tudu ténpu. (João 3:16) Kuzê ki siginifika mostra fé? É ka sô fla ma nu ta kridita na Jizus. Má, nu meste mostra fé na disizons ki nu ta toma i na kuzas ki nu ta faze. (Tiago 2:17) Óras ki nu ta mostra fé na kes kuza ki nu ta fla i ki nu ta faze, nos amizadi ku Jizus i ku se Pai, Jeová, ta bira más fórti. — Lé João 14:21.
2. Ki runion spesial ta djuda-nu mostra nos gratidon pa kuzê ki Jeová ku Jizus faze?
Na noti antis di Jizus móre, el fla se sigidoris un otu manera di es mostra gratidon pa se sakrifisiu. El mostra-s modi ki es ta fazeba un runion spesial ki Bíblia ta txoma di ‘Seia di Sinhor’, ki tanbê konxedu pa Komemorason di mórti di Jizus. (1 Coríntios 11:20) Jizus kreba pa se apóstlus, i tudu kes otu kristons verdaderu ki ta binha dipôs di es, pa lenbra ma el da se vida pa nos. Pur isu, el da kel órdi li: ‘Nhos kontinua ta faze kel-li pa nhos lenbra di mi.’ (Lucas 22:19) Óras ki bu ta sisti Komemorason, bu ta mostra bu gratidon pa kel grandi amor ki Jeová ku Jizus ten pa nos.
SABE MÁS
Odja otus manera ki bu pode mostra ma bu ta da valor pa kel grandi amor ki Jeová ku Jizus ten pa nos. Prende tanbê pamodi ki Komemorason di mórti di Jizus é inportanti.
3. Kuzê ki nu pode faze pa mostra nos gratidon?
Imajina ma bu sta ta foga i un algen salva-u. Bu ta baba bu kaminhu i bu ta skeseba di kuzê ki el faze pa bo? Ô bu ta djobeba maneras di mostra-l bu gratidon?
Nu debe Jeová nos vida. Lé 1 João 4:8-10, i dipôs pâpia sobri kes pergunta li:
Pamodi ki sakrifisiu di Jizus é un prezenti ki ka ten konparason?
Modi ki bu ta xinti ku kuzê ki Jeová i Jizus faze pa bo?
Modi ki nu ta mostra ma nu ta da valor pa kuzê ki Jeová ku Jizus faze pa nos? Lé 2 Coríntios 5:15 i 1 João 4:11; 5:3. Dipôs di lé kada testu, pâpia sobri kel pergunta li:
Sima dja bu lé, modi ki nu pode mostra nos gratidon?
4. Imita Jizus
Otu manera di mostra nos gratidon é óras ki nu ta imita Jizus. Lé 1 Pedro 2:21, i dipôs pâpia sobri kel pergunta li:
Modi ki bu pode sigi pasus di Jizus di manera fiel?
Jizus ta amaba Palavra di Deus, el ta pregaba notísias sábi i el ta djudaba otus algen
5. Sisti Komemorason di mórti di Jizus
Pa bu sabe kuzê ki kontise na kel primeru Seia di Sinhor, lé Lucas 22:14, 19, 20. Dipôs pâpia sobri kes pergunta li:
Kuzê ki kontise na Seia di Sinhor?
Kuzê ki kel pon i kel vinhu ta reprizenta? — Odja versíklus 19 i 20.
Jizus kreba pa se disiplus komemoraba se mórti tudu anu. Pur isu, Tistimunhas di Jeová ta djunta tudu anu pa lenbra mórti di Jizus sima el manda. Pa bu prende más sobri kel runion inportanti li, odja VÍDIU. Dipôs pâpia sobri kel pergunta li:
Kuzê ki ta kontise na Komemorason?
Na Komemorason, kel pon ta reprizenta korpu perfetu di Jizus ki el da pa nos i kel vinhu ta reprizenta se sangi
ALGUNS ALGEN TA FLA: “Pa bu salva, bu meste sô kridita na Jizus.”
Modi ki bu pode uza João 3:16 i Tiago 2:17 pa mostra ma nu meste faze más di ki sô kridita na Jizus?
REZUMU
Nu ta da valor pa kuzê ki Jizus faze pa nos óras ki nu ta mostra fé na el i sisti Komemorason di se mórti.
Perguntas di rezumu
Kuzê ki siginifika mostra fé na Jizus?
Modi ki bu pode mostra ma bu ta da valor pa kuzê ki Jeová ku Jizus faze pa bo?
Pamodi ki é inportanti sisti Komemorason di mórti di Jizus?
DJOBE MÁS
Kuzê ki mórti di Jizus ta pô-nu ta faze?
Prende más sobri fé i modi ki nu pode mostra fé.
“Mostra ma bu ten fé na promésas di Jeová” (Sentinéla, otubru di 2016)
Lé artigu “N ta xinti linpu i N ten un vida sábi”, pa bu odja modi ki vida di un mudjer muda kantu el prende kuzê ki sakrifisiu di Jizus ta siginifika.
“Bíblia ta muda vida di algen” (Sentinéla, 1 di agostu di 2011)
Odja pamodi ki é poku algen ki ta kume kel pon i bebe kel vinhu na Komemorason.