LISON 43

Kuzê ki kristons debe pensa sobri bebida alkólika?

Formatu di livru na papel

Na mundu interu, pesoas ta pensa di manera diferenti sobri bebida alkólika. Alguns algen gosta di bebe di vês en kuandu ku ses amigus. Otus ta prifiri ka bebe nada. Inda otus ta bebe ti ki es ta fika moku. Kuzê ki Bíblia ta fla sobri bebida alkólika?

1. É mariadu bebe bebida alkólika?

Bíblia ka ta kondena bebida alkólika. Aliás, el ta fla ma el é un di kes prezenti ki Deus da-nu. Bíblia ta fla ma ‘vinhu ta poi korason di ómi fika kontenti’. (Salmo 104:14, 15) Tanbê, Bíblia ta pâpia di alguns ómi ku mudjeris fiel ki bebe bebida alkólika. — 1 Timóteo 5:23.

2. Ki konsedju Bíblia ta da pa kes algen ki ta disidi bebe?

Jeová ta kondena bebe dimás i toma moku. (Gálatas 5:21) Se Palavra ta fla: ‘Ka bu fika na meiu di kes algen ki ta bebe vinhu txeu dimás’. (Provérbios 23:20) Nton, si nu disidi bebe, sikrê nos sô, nu ka debe faze-l di un manera ki nu ka ta konsigi pensa dretu más, kontrola kuzas ki nu ta fla i faze ô prujudika nos saúdi. Si nu ka ta konsigi kontrola kantu ki nu ta bebe, nton é midjór nu ka bebe.

3. Modi ki nu pode ruspeta disizon di otus algen sobri bebida?

Kada algen debe disidi si el ta bebe ô nau. Nu ka debe julga un algen si el disidi bebe na limiti, i nu ka debe faze un algen preson si el ka krê bebe. (Romanos 14:10) Nu ta disidi ka bebe si faze kel-li pode poi otus algen ta tropesa. (Lé Romanos 14:21.) Nu ka ta djobe ‘nos própi vantaji, má kel di otu algen.’ — Lé 1 Coríntios 10:23, 24.

SABE MÁS

Odja prinsípius di Bíblia ki pode djuda-u disidi si bu ta bebe i kantu bu ta bebe. Tanbê odja kuzê ki bu pode faze si bu ten prubléma ku bebida.

4. Disidi si bu ta bebe

Kuzê ki Jizus ta pensaba sobri bebida alkólika? Pa bu sabe respósta, odja kel primeru milagri ki el faze. Lé João 2:1-11, i dipôs pâpia sobri kes pergunta li:

Kuzê ki kel milagri li ta inxina-nu sobri kuzê ki Jizus ta pensa di bebida alkólika i di kes algen ki ta bebe?
Dja ki Jizus ka kondena bebida alkólika, kuzê ki un kriston debe pensa di un algen ki ta disidi bebe?

Nbóra un kriston ten direitu di disidi si el ta bebe bebida alkólika ô nau, ten óras ki pode ka ser bon pa el bebe. Lé Provérbios 22:3, i dipôs odja alguns kuza ki pode djuda-u disidi si bu ta bebe ô nau:

Bu sta bai konduzi ô trabadja ku algun mákina.
Bu sta grávida.
Un dotor fla-u pa bu ka bebe bebida alkólika.
Bu ka ta konsigi kontrola kantu bu ta bebe.
Na undi bu sta, lei ka ta permiti pa bu bebe bebida alkólika.
Bu sta djuntu ku un algen ki disidi ka bebe pamodi dja el tevi prubléma ku bebida.

Bu debe sirbi bebida alkólika na un fésta di kazamentu ô na un otu fésta? Pa bu odja kuzê ki pode djuda-u disidi, odja VÍDIU.

VÍDIU: N debe sirbi bebida na nha kazamentu? (2:41)

Lé Romanos 13:13 i 1 Coríntios 10:31, 32. Dipôs di lé kada testu di Bíblia, pâpia sobri kel pergunta li:

Modi ki kel prinsípiu li pode djuda-u toma un disizon ki ta poi Jeová kontenti ku bo?

Un irmon sta ta kume djuntu ku dôs irman na un restoranti. Kes irman sta ta bebe vinhu má kel irmon sta nega bebe. — Kada kriston ta disidi si el ta bebe bebida alkólika ô nau. Má mésmu si el ta bebe, na alguns situason el pode disidi ka faze kel-la.

5. Disidi kantu bu ta bebe

Si bu disidi ma bu ta bebe, lenbra di kel-li: Jeová ka ta kondena bebe bebida alkólika, má el ta kondena bebe dimás. Pamodi? Lé Oseias 4:11, 18, i dipôs pâpia sobri kel pergunta li:

Kuzê ki pode kontise óras ki un algen bebe dimás?

Modi ki nu pode ivita bebe dimás? Nu ten ki seta ma nu ten limiti. Lé Provérbios 11:2, i dipôs pâpia sobri kel pergunta li:

Pamodi ki é bon ideia poi limiti na kantu bu ta bebe?

6. Kuzê ki pode djuda un algen para di bebe dimás

Odja kuzê ki djuda un ómi para di bebe dimás. Odja VÍDIU, i dipôs pâpia sobri kes pergunta li:

VÍDIU: ‘N staba kansadu ku nha manera di vive’ (6:32)

Fótus: Párti di vídiu ‘N staba kansadu ku nha vida’. 1. Dimitri ta djobe pa un garafa di bebida. 2. Dimitri, se mudjer i ses fidju-fémia sta ta studa Bíblia djuntu.

Na vídiu, kuzê ki Dimitri ta fazeba óras ki el ta bebeba?
El konsigi para di bebe lógu?
Kuzê ki djuda-l vense se vísiu di bebe?

Lé 1 Coríntios 6:10, 11, i dipôs pâpia sobri kes pergunta li:

Pamodi ki bebe dimás é un kuza sériu?
Kuzê ki ta mostra ma un algen ki ta bebe dimás pode muda?

Lé Mateus 5:30, i dipôs pâpia sobri kel pergunta li:

Kantu Jizus faze kel ilustrason sobri korta mô, el krê flaba ma nu ten ki faze alguns sakrifisiu pa nu agrada Jeová. Kuzê ki bu pode faze si bu sta ta sforsa pa bu ka bebe dimás?a

Lé 1 Coríntios 15:33, i dipôs pâpia sobri kel pergunta li: