Tinha un ómi ki ta adoraba Jeová, ki ta viveba na un téra ki txomaba Us. Se nómi éra Jó. El éra riku i el tinha un família grandi. El éra un bon ómi. El ta djudaba kes algen póbri, kes mudjer ki ses maridu móre i kes mininu ki ka tinha pai ku mai. Dja ki Jó ta fazeba kuzas dretu, kel-la ka krê fla ma el ka ta tinha prublémas.

Jó ka sabeba ma Satanás staba ku odju na el. Jeová fla Satanás: ‘Bu sta ku odju na nha sérvu Jó? Ka ten ningen na Téra sima el. El ta obi ku mi i el ta faze kuzas dretu.’ Satanás responde: ‘Klaru ki Jó ta obi ku bo. Bu proteje-l i bu abensua-l. Bu da-l txeu téra ku animal. Tra-l tudu kel ki el ten i bu ta odja si el ka ta para di adora-u’. Jeová fla: ‘Nton, bu pode sprimenta Jó. Má sô ka bu mexe ku se vida.’ Pamodi ki Jeová dexa Satanás sprimenta Jó? Pamodi el ta kunfiaba na Jó.

Satanás kumesa ta sprimenta Jó ku un monti disgrasa. Primeru, el manda un grupu di algen ki txomaba sabeus pa bai furta bakas, bois ku burus di Jó. Dipôs, ben un lumi ki kaba ku tudu ovelhas di Jó. Un otu grupu di algen ki txomaba kaldeus furta se kamelus. Kes algen ki ta kuidaba di se animal matadu. Dipôs, kontise un disgrasa más pior inda. Kantu fidjus di Jó staba na un fésta, kaza ronba riba di es i tudu es móre. Jó fika rei di tristi, má el ka dizisti di adora Jeová.

Satanás kreba pa Jó sofreba más inda. Pur isu, el poi Jó frida na korpu interu. Jó tinha txeu dór. El ka sabia pamodi ki tudu kes kuza staba ta kontise ku el. Má simé Jó kontínua ta adora Jeová. Deus odja tudu kuza i el fika rei di kontenti ku Jó.

Dipôs Satanás manda três ómi pa sprimenta Jó. Es fla-l: ‘Debe ser bu faze algun kuza mariadu i bu tenta sukundi-l. Deus sta ta kastiga-u.’ Jó fla: ‘N ka faze nada mariadu.’ Má dipôs el kumesa ta pensa ma é Jeová ki staba ta pô-l ta sufri. Nton, el fla ma Deus staba ta ser injustu ku el.

Un jóven ki txomaba Eliú staba kétu ta obi ses konbérsu. Dipôs el fla: ‘Tudu kuza ki nhos fla sta mariadu. Jeová é más di ki kel ki nu ta konsigi ntende. Nunka el ka ta faze kuzas mariadu. El ta odja tudu kuza i el ta djuda algen ku ses prubléma.’

Nton Jeová fla Jó: ‘Undi ki bu staba kantu N faze Séu ku Téra? Pamodi ki bu fla ma mi é injustu? Bu pâpia má bu ka sabe kuzê ki sta ta kontise.’ Jó seta ma el fadja i el fla: ‘N staba eradu. N obi ta fladu sobri bo, má gósi ki N sta ta konxe-u di verdadi. Ka ten nada ki bu ka ta pode faze. Diskulpa-m pa kuza ki N fla.’

Kantu Satanás kaba di sprimenta Jó, Jeová da Jó se saúdi otu bês. El da-l kuzas mutu más txeu ki kel ki el tinha. Jó vive txeu ténpu i filís. Jeová abênsua Jó pamodi el obi ku el, mésmu na situason difísil. Si bu ben pasa pa un situason difísil, bu ta kontínua ta adora Jeová sima Jó?

Na Ijitu família di Jakó ben fika ta txomadu di israelitas. Dipôs ki Jakó ku Juzé móre, un novu Faraó kumesa ta governa. El staba ku medu pa israelitas ka fika más fórti ki povu di Ijitu. Nton kel Faraó li faze israelitas di skravu. El pô-s ta faze tijolus aforsa i ta trabadja duru na kanpu di plantason. Kantu más kel povu di Ijitu ta poba israelitas ta faze trabadju forsadu, es ta fikaba más txeu inda. Faraó ka staba kontenti ku kel-la, pur isu el manda mata tudu fidjus matxu di israelitas ki nase. Bu ka ta atxa ma israelitas fika ku txeu medu?

Un mudjer israelita ki txomaba Jokibedi ten un rapazinhu bunitu. Pa es ka mata-l, el pô-l na un sestu i el sukundi-l na plantas ki tinha na Riu Nilu. Irman di kel mininu, ki txomaba Mirian fika ta sigi-l di pértu pa odja kuzê ki ta kontiseba.

Fidju-fémia di Faraó bai toma banhu na riu i el odja kel sestu. El atxa kel mininu déntu di sestu ta txora i el xinti péna di el. Mirian pergunta-l: ‘N pode bai txoma un mudjer pa toma kónta di mininu pa bo?’ Kantu fidju-fémia di Faraó fla sin, el traze se mai Jokibedi. Fidju-fémia di Faraó fla-l: ‘Toma mininu, kuida di el i N ta paga-u.’

Kantu mininu kria, Jokibedi leba-l pa fidju-fémia di Faraó ki da-l nómi di Muizes. El kria-l sima se própi fidju. Muizes kriadu sima un prínsipi i si el kreba el ta tinha tudu kuza. Má Muizes nunka ka skese di Jeová. El sabia ma el ka éra família di povu di Ijitu, má el éra un israelita. I el skodje sirbi Jeová.

Kantu Muizes tinha 40 anu, el disidi djuda se povu. Un dia el odja un ómi di Ijitu ta maltrata un israelita. Nton, Muizes da-l pankada i el móre. Muizes sukundi korpu di kel ómi na areia. Kantu Faraó diskubri, el tenta mata Muizes. Má Muizes fuji pa téra di Midian i Jeová kuida di el la.