Tistimunhas di Jeová na Nova Zilándia éra un prigu pa sosiadadi?

Na dia 21 di otubru di 1940, govérnu di Nova Zilándia fla ma Tistimunhas di Jeová é un organizason rebéldi i prigozu. Kel-li traze txeu prubléma pa Tistimunhas di Jeová, má simé es ka dizanima. Pur izénplu, es kontinua ta adora Deus, sikrê es ta koreba risku di autoridadis pô-s na kadia.

Andy Clarke, maridu di un irman, ki txoma Mary, da kónta ma se mudjer kontinua ta sisti runion sikrê ku kes prigu ki tinha. El xinti medu di es poi se mudjer prézu pamodi el ta sistiba runion. Nton, el kumesa ta sisti runion djuntu ku Mary i el fla-l: “Si es prende-u, es ten ki prende-m tanbê!” Di la pa dianti, Andy kumesa ta sisti tudu runion djuntu ku se mudjer. Dipôs, el kaba pa batiza i el bira un Tistimunha di Jeová tanbê. Sima Mary, txeu Tistimunha di Jeová na Nova Zilándia staba disididu na mante fiel, sikrê ku pirsigison duránti Sugundu Géra na Mundu Interu.

Es kontinua fórti na kadia

Un dia, un pulísia para un irmon di 78 anu, ki txoma John Murray, timenti el staba ta pâpia sobri Bíblia di kaza en kaza. Tribunal kondena kel irmon di partisipa na atividadis di un organizason rebéldi. Txeu Tistimunha di Jeová lebadu pa tribunal tanbê. Alguns dadu multa i otus podu prézu ti três mês.

Tistimunhas di Jeová nega bai pa trópa pamodi ses konsénsia. (Isaías 2:4) Pamodi kel-li, duránti géra es pasa pa txeu difikuldadi kantu alguns di es txomadu pa trópa. Nton, uns 80 irmon podu prézu na uns kanpu. Má simé, es kontinua ta adora Jeová sikrê ku txeu friu ki tinha la i sikrê es maltratadu.

Irmons na kes kanpu kumesa ses atividadi spritual lógu. Es fika organizadu sima na un kongregason. Es ta fazeba tudu runion i es ta pregaba pa kes otu prézu. Na alguns kanpu, ti es dexadu faze asenbleia ku un guarda ta djobe-s. Alguns prézu prende verdadis di Bíblia na kes kanpu i es batiza la.

Bruce, ki é kel fidju más novu di Mary ku Andy, ki dja nu papiaba di es antis, podu prézu, má el nkara kel-la sima un oportunidadi di bira se amizadi ku Deus más fórti. El fla: “Pa mi, kel-la foi sima un skóla, pamodi N prende txeu ku kes irmon ki tinha más spiriénsa i N pruveta kel-la pa prende tudu kel ki N podia ku kes irmon.”

Na anu 1944, govérnu pensa na liberta alguns di kes ki staba prézu na kes kanpu. Má kes xéfi di trópas ka konkorda ku kel-li pamodi es tinha sertéza ma si es libertaba kes Tistimunha di Jeová, es ta kontinuaba ta pâpia ku otus algen sobri ses fé. Un rilatóriu fla: “Pode ti ser ki dexa kes tipu di algen li na kadia ta kontrola un bokadinhu kel zelu izajeradu ki es ten, má kel-li nunka ka ta muda-s.”

Es é ka un prigu pa ningen

Alguns algen fika ku kuriozidadi pamodi óbra di Tistimunhas di Jeová proibidu. Ku ténpu, txeu algen da kónta ma es é ka un prigu pa ningen. Es odja ma Tistimunhas di Jeová ka ta faze ningen mal i es é sigidoris di Jizus ki ta mante pas ku tudu algen. Pamodi kel-li, Tistimunhas di Jeová omenta di 320 algen na anu 1939 pa 536 algen na anu 1945.

Dipôs, alguns autoridadi rekonhese ma kel proibison kóntra Tistimunhas di Jeová éra injustu. Un juís obi un akuzason kóntra un irmon ki staba ta prega i el kaba ku kel kazu. El fla: “Pa kel ki N ta ntende di lei, N ta atxa ma txoma un algen kriminozu pamodi el distribui Bíblia é un kuza sen pé sen kabésa.”

Na fin di Sugundu Géra na Mundu Interu, kabadu ku kel proibison i Tistimunhas di Jeová staba más disididu di ki nunka na djuda otus algen prende sobri Reinu di Deus. Na anu 1945, tudu kongregason na Nova Zilándia resebe un karta di filial ki ta flaba: “Nhos pâpia ku jetu i nhos mostra bondadi ku tudu algen. Nhos ivita diskuson. Nhos lenbra ma kes algen ki nu ta pâpia ku es, ta kridita di korason na kel ki ses igreja ta inxina i es ta tenta vive di akordu ku kel-la. . . . Txeu di es é ‘ovelhas’ di Sinhor i nu meste djuda-s prende sobri Jeová i se Reinu.”

Na nos ténpu, Tistimunhas di Jeová na Nova Zilándia ta kontinua ta pâpia ku kes algen di la i ku turistas sobri mensaji di Bíblia. Un dia, kuatu Tistimunha di Jeová na Turangi pâpia ku 67 algen di 17 país diferenti sô na uns óra!

Ta fika klaru ma kes algen na Nova Zilándia ta rekonhese ma Tistimunhas di Jeová é algen di pas i es ta vive di akordu ku kes prinsípiu ki sta na Bíblia. Senténas di algen ta batiza tudu anu na Nova Zilándia. Na anu 2019, más di 14 mil Tistimunha di Jeová staba ta sirbi Jeová ku alegria na kes tiritóriu di Nova Zilándia.