Es da kel midjór ki es tinha

Kantu Sugundu Géra na Mundu Interu kaba na 1945, txeu párti di Alimanha staba tudu distruídu. Skólas staba sen ningen i ospital staba na un stadu ki ka ta daba pa uza. I pa tudu párti staba bonba ki ka spludi. Tanbê ka tinha kumida pa tudu algen. Pur isu, présu di kumida subi txeu. Pur izénplu, kes algen ki ta bendeba kumida ilegal, staba ta bende meiu kilu di mantega na valor ki un algen ta ganhaba na 6 simana di trabadju!

Entri kes ki sufri pamodi géra, staba más di 2.000 Tistimunha di Jeová ki pasa txeu anu na kadia i na kanpus di konsentrason pamodi ses fé. Kantu es libertadu na anu 1945, es sai di kadia sô ku ropa di korpu. Otus irmon perde ses kuza di valor i ses propriadadi. I alguns di es pasaba tantu fómi ki es fika ta dismaia duránti runion.

Tistimunhas di Jeová di otus país djuda lógu

Tistimunhas di Jeová di otus párti di mundu aji faxi pa djuda ses irmons ki tinha falta di ropa i kumida. Irmons di sédi mundial, na Mérka, pidi filial di Suísa, na Berna, pa djuda kes irmon di Alimanha. Irmon Nathan Knorr, reprizentanti di sédi mundial, vizita Europa pa organiza i pa djuda pa kel trabadju fazedu más faxi.

Irmons di Suísa da txeu kumida, ropa i dinheru. Kes kuza ki dadu mandadu pa Berna primeru. Dipôs es siparadu i es podu na kaxa antis di mandadu pa Alimanha. Tistimunhas di Jeová di otus país, sima Suésia, Kanadá i Mérka tanbê djuda. Kel trabadju li ka djuda povu di Jeová sô na Alimanha, má tanbê na otus país di Europa i di Ázia, ki tanbê fika distruídu pamodi géra.

Kel ajuda da bons rezultadu

Sô na alguns mês filial di Suísa dja mandaba kafé, leti, asukra, serial, fruta séku, verduras, karni i pexi di lata. Tanbê dadu dinheru.

Tistimunhas di Jeová na Suísa tanbê manda sinku mil kilu di ropa, sima kazaku, ropas pa mudjer i fatus pa ómi. Sentinéla di 15 di janeru di 1946 na inglês, fla: “Kes irmon ka da kes piór kuza ki es tinha. Tudu kel ki es da éra di midjór kualidadi. Ta da pa odja ma es faze sakrifisiu pa djuda ses irmon di Alimanha.”

Tanbê Tistimunhas di Jeová di Suísa da kuazi mil par di sapatu. Tudu kes sapatu djobedu si staba na bon stadu antis di mandaba es. Kes irmon ki tra kes kuza ki dadu, na sidadi di Wiesbaden, na Alimanha, fika dimiradu ku kualidadi i txeu tipu di kuza ki dadu. Un irmon skrebe: “N ta atxa ma ka ten ninhun lója na Alimanha ki tene txeu sapatu ku ropa di bon kualidadi sima kes-li.”

Mandadu kontribuisons ti agostu di 1948. Pa tudu, Tistimunhas di Jeová di Suísa manda pa Alimanha 444 kaxa di kuzas ki dadu, ki ta pezaba 25 mil kilu. Sima dja fladu, é ka sô irmons di Suísa ki faze kontribuison. Má es éra un di kes grupu más pikinoti ki da ajuda. Na kel ténpu tinha sô 1.600 Tistimunha di Jeová na Suísa!

‘Nhos ama kunpanheru’

Jizus Kristu fla: ‘Através di kel-li tudu algen ta fika ta sabe ma nhos é nha disiplus: si nhos ten amor pa kunpanheru.’ (João 13:34, 35) Pamodi amor, povu di Jeová da kel midjór ki es tinha, ka sô kes kuza ki es ka staba ta uza más. (2 Coríntios 8:1-4) Un karta di sidadi di Zurik, fla ma “txeu irmons ki da dinheru staba ta pasa nisisidadi, má simé es krê djudaba.”

Povu di Jeová na Alimanha rekupera faxi di pirsigison i di kes stragu di géra. Un di kes kuza ki poi kel-li ta kontise é kes txeu ajuda ben organizadu ki es resebe di ses irmon na fé. Kes irmon li mostra kel amor di verdadi, ki ta poi interesis di otus na frenti di kes di nos.