Es ta uzaba un triánglu alilás
Maud ta mora na Fransa i el ta trabadja na un skóla ta djuda kes kriansa ki ten difisénsia. Ka dura li, alunus di un turma staba ta prende sobri kes kanpu di konsentrason nazista i kes kuza orível ki kontise la. Kes algen ki staba prézu na kes kanpu tinha ki bistiba un unifórmi ku un padás di panu di kor alilás kozedu na el. Kel kor i kel formatu di kel padás di panu ta mostraba pamodi ki kel algen staba prézu.
Sobri kes triánglu alilás ki alguns prézu ta uzaba, un profesor fla: “N ta atxa ma es ta uzaba el pamodi es éra omoseksual.” Dipôs di aula, Maud splika kel profesor ma kes nazista ta uzaba kes triánglu alilás pa mostra ma kes prézu éra Tistimunha di Jeová.a El oferese pa leba-l alguns informason sobri kel asuntu. Kel profesor seta i el fla Maud tanbê pa da kes otu alunu kes informason.
Na otu sala ki tanbê es staba ta pâpia sobri kel mésmu asuntu, un profesóra mostra un kuadru ku txeu sinblu ki kes prézu ta uzaba. Kel kuadru ta mostraba ma kel triánglu alilás éra pa identifikaba kes Tistimunha di Jeová. Dipôs di aula, Maud oferese kel profesóra alguns informason sobri kel asuntu. Kel profesóra seta i el pidi-l pa el ba pâpia ku ses alunu.
Maud ku kes publikason ki el uza.
Maud pripara un aprizentason di 15 minutu pa el ba pâpia na kel primeru turma. Má kantu el txiga la, kel profesóra fla-l: “Bu ten un ora pa pâpia.” Maud kumesa se aprizentason ku un vídiu ki ta papiaba sobri pirsigison di kes nazista kóntra Tistimunhas di Jeová. Na un párti di vídiu ta splikaba ma kes nazista sipara 800 kriansa di ses pai ku ses mai ki éra Tistimunha di Jeová. Dipôs, Maud para vídiu na kel párti i el lé stória di três di kes kriansa. Dipôs ki vídiu kaba, Maud lé un karta di dispidida di un jóven ki éra Tistimunha di Jeová. Kel karta skrebedu na anu 1940 pa Gerhard Steinacher ki éra un jovén di Áustria i el tinha sô 19 anu. El skrebe kel karta pa se pai ku se mai uns óra antis di el matadu pa kes nazista.b
Maud pâpia di kel mésmu asuntu na un otu sala di aula. Pamodi Maud tevi koraji di faze kel-li, gósi kes dôs profesor sénpri ta pâpia sobri Tistimunhas di Jeová óras ki es ta inxina sobri kes algen ki sufri na kes kanpu di konsentrason nazista.
a Duránti kel sugundu géra na mundu interu, Tistimunhas di Jeová na Alimanha, ki tanbê éra konxedu pa Bibelforscher (Studantis di Bíblia), podu prézu pamodi es nega apoia kes nazista.
b Gerhard Steinacher dadu péna di mórti pamodi el nega sirbi na trópa di Alimanha. Na se karta di dispidida el skrebe: “Ami é sô un mininu inda. N ta konsigi mante fiel sô ku kel forsa ki sinhor ta da-m i é sô kel-li ki N ta pidi.” Na kel otu dia el matadu. Na se koba sta skrebedu: “El móre pa onra Deus.”