Algun dia terorismu ta kaba?

Si dja bu kustuma pasa pa algun ataki di terorismu, talvês bu ta pergunta bu kabésa: ‘Deus ta preokupa ku nos? Pamodi ki kes kuza li ta kontise? Algun dia terorismua ta kaba? Modi ki N pode lida ku medu ki N ta xinti?’ Bíblia ta da bons respósta pa kes pergunta li.

Kuzê ki Deus ta atxa di terorismu?

Deus ta ôdia violénsia i terorismu. (Salmo 11:5; Provérbios 6:16, 17) I Jizus, ki é reprizentanti di Deus, txoma se disiplus atenson kantu es aji ku violénsia. (Mateus 26:50-52) Alguns algen ta fla ma es ta faze kes ataki di terorismu, na nómi di Deus, má Deus ka ta aprova kel tipu di kuza li. Na verdadi, nen el ka ta obi orason di kes algen ki ta faze kes kuza li. — Isaías 1:15.

Deus ta preokupa ku kes algen ki ta sufri, i kel-li ta inklui kes ki sufri pamodi un ataki di terorismu. (Salmo 31:7; 1 Pedro 5:7) Bíblia tanbê ta mostra ma ka ta dura Deus ta ben kaba ku tudu violénsia. — Isaías 60:18.

Pamodi ki terorismu ta izisti?

Bíblia ta splika pamodi ki terorismu ta izisti. El ta fla: ‘Ómi ta manda na ómi pa se disgrasa.’ (Eclesiastes 8:9) Dja dura ki pesoas ki ten puder ta uza terorismu pa poi otus algen ta sufri, i alvês kes ki sufri ta kaba pa vinga ku más terorismu. — Eclesiastes 7:7.

Terorismu ta ben kaba

Deus promete kaba ku medu i ku violénsia i traze pas pa Téra. (Isaías 32:18; Miqueias 4:3, 4) El ta ben:

Kaba ku kuzê ki ta traze terorismu. Deus ta ben troka kes govérnu di ómi pa se própi govérnu ki ta ben governa Téra interu. Deus skodje Jizus Kristu pa ser Governanti di kel govérnu li, i el ta ben trata tudu algen ku justisa i kaba ku sufrimentu i violénsia. (Salmo 72:2, 14) Óras ki kel-li kontise ningen ka ta ben uza terorismu pa ataka otus algen. Pesoas ‘ta ben ten txeu alegria ku txeu pas.’ — Salmo 37:10, 11.
Rezolve tudu prubléma ki terorismu ta traze. Deus ta ben kaba ku tudu prubléma ki terorismu ta traze, i kel-li ta inklui kes trauma ki talvês algen sufri ô pankada ki es panha. (Isaías 65:17; Apocalipse 21:3, 4) I ti kes algen ki móre, el ta promete ma el ta ben resusita-s pa es ben vive na pas na Téra. — João 5:28, 29.

Bíblia ta da-nu bons motivu pa nu kridita ma ka ta dura Deus ta ben kaba ku terorismu. Má talvês bu ta pergunta: ‘Pamodi ki inda el ka faze kel-li?’ Pa bu sabe respósta, odja vídiu Pamodi ki Deus ta dexa sufrimentu kontise?

a “Terorismu” normalmenti é uza ô amiasa uza violénsia kóntra otus algen na sosiadadi. Obijetivu é dexa-s ku medu, asi pa ten mudansas na pulítika, na relijion ô na sosiadadi. Má na alguns kazu, pesoas pode ka konkorda si un kuza ki kontise na un lugar é terorismu ô nau.

Modi ki Bíblia pode djuda-u?

Odja dôs kuza ki Bíblia ta fla ki pode djuda-u si bu sufri pamodi un ataki di terorismu.

Faze orason pa Deus. — Filipenses 4:6, 7.
Konsentra na mensaji di speransa ki Bíblia ta da. — Hebreus 6:19.

Odja kuzê más ki Bíblia ta fla ki pode djuda-u na artigu “Modi ki bu pode lida ku fadiga?”

Tistimunhas di Jeová ki sufri pamodi terorismu, tanbê resebe ajuda di otus Tistimunha di Jeová. Odja kes dôs izénplu li:

Natalya i se fidju di 9 anu, ki txoma Aslan, staba na un skóla na Beslan, na Rúsia, kantu alguns terorista armadu invadi kel skóla i es poi más di mil algen prézu la. Infilismenti, senténas di algen móre i maioria di es éra mininu. Natalya ku Aslan skapa má es fika ku trauma. Odja kuzê ki djuda-s lida ku kel-li.
Fidju matxu di Pablo ku Sophie móre kantu kes Tori Jémiu na Nova York atakadu. Odja kel vídiu li i repara kuzê ki djuda aes i otus algen ki sufri pamodi ataki di terorismu.