2 Timótiu 1:7 — “Deus ka da-nu un spritu di kobardia”

“Pamodi Deus ka da-nu un spritu di kobardia, má di puder, di amor i di bon juís.” — 2 Timótiu 1:7, Bíblia Traduson di Mundu Novu.

Kuzê ki 2 Timótiu 1:7 ta siginifika

Deus pode djuda un algen ten koraji di faze kel ki é dretu. Deus ka krê pa ses sérvu ser ‘kobardu’, ô ten kel tipu di medu ki ka ta dexa-s faze kes kuza ki ta agrada-l.

Odja três kualidadi ki ta ben di Deus ki sta na kel versiklu li ki ta djuda un algen vense medu ô kobardia.

“Puder”. Kristons sta ta konsigi sirbi Deus ku koraji sikrê es ten txeu inimigu i es ta pasa pa situasons prigozu. Medu ka ta pô-s ta para di sirbi Jeová. (2 Koríntius 11:23-27) Modi ki es ta konsigi faze kel-li? Apóstlu Paulu splika: “Pa tudu kuza N ten forsa grasas-a kel ki ta da-m puder.” (Filipensis 4:13) Deus pode da ses sérvu “puder alén di normal” pa vense kalker prubléma. — 2 Koríntius 4:7.

“Amor”. Kel amor fórti ki un kriston ten pa Deus ta djuda-l difende kuzê ki é dretu ku koraji. Di mésmu manera, amor ki un kriston ten pa otus algen ta motiva-l pa el poi nisisidadis di otus algen na frenti di kes di sel, mésmu óras ki el sta na prigu ô el sta ta lida ku opozison. — Juan 13:34; 15:13.

“Bon juís.” Na Bíblia, bon juís normalmenti ta uzadu pa pâpia di kel kapasidadi ki un kriston ten di toma bons disizon ku bazi na Bíblia. Un algen ki ten bon juís ta konsigi pensa di manera klaru i kontinua ikilibradu mésmu óras ki el sta ta pasa pa prublémas. El ta konsigi toma disizons ki sta di akordu ku manera di pensa di Deus i el sabe ma se amizadi ku Deus é más inportanti ki opinion di otus algen.

Kuzê ki kes versiklu antis i dipôs di 2 Timótiu 1:7 ta fla

É apóstlu Paulu ki skrebe livru di Sugunda Timótiu. Es livru é un karta ki el skrebe pa Timótiu ki éra se amigu i se kunpanheru di trabadju ki el kreba txeu. Na kel karta li, ku amor Paulu insentiva Timótiu pa el kontinua ta sforsa na pregason. (2 Timótiu 1:1, 2) Talvês Timótiu tinha un bokadinhu di vergónha i pode ser ki kel-li inpidi-l di faze tudu kel ki el ta podeba na kongregason. (1 Timótiu 4:12) Má Paulu lenbra Timótiu ma el tinha un don ki el resebe, kel-li krê fla un diziginason spesial na kongregason. Dja ki Timótiu éra un enkaregadu na kongregason, Paulu insentiva-l pa el ka ten medu di uza se autoridadi, óras ki el ta pregaba notísias sábi i óras ki el ta infrentaba prublémas pamodi se fé. — 2 Timótiu 1:6-8.

Enbóra Paulu skrebe kel karta li pa Timótiu, kel karta ta da tudu kes algen ki krê sirbi Deus oji serteza ma El ta da-s kel ajuda ki es meste pa es ten bon rezultadu, ka ta inporta ki prubléma ki es ta pasa pa el.