Pamodi ki pesoas ten falta di ruspetu pa ses kabésa?

PAMODI KI É INPORTANTI NU RUSPETA NOS KABÉSA?

Pesoas ki ta ruspeta ses kabésa ta konsigi lida ku prublémas di vida ku kunfiansa. Es ka ta dizisti faxi.

Piskizas ta mostra ma pesoas ki ten pensamentus negativu sobri es mê ten más xansi di ten ansiadadi, depreson i prublémas na kume. I ten más xansi di es bebe di más i di uza dróga.
Pesoas ki ta ruspeta ses kabésa ta ivita konpara ku otus algen. Kel-li ta djuda-s da dretu ku otus algen i ten bons amizadi. Má pesoas ki ten poku ruspetu pa ses kabésa ta kustuma kritika otus algen, i kel-li pode straga ses amizadi.
Mésmu óras ki es ta pasa pa prublémas, pesoas ki ten ruspetu pa ses kabésa ta kontinua fórti. Es ka ta dexa kes prubléma inpidi-s di kunpri ses obijetivu. Má pesoas ki ten poku ruspetu pa ses kabésa, txeu bês es ta odja un prubléma pikinoti más grandi di ki kel ki el é. I kel-li pode pô-s ta dizisti faxi.

MODI KI BU PODE MOSTRA MÁS RUSPETU PA BU KABÉSA?

Skodje amigus ki ta da-u koraji. Sta djuntu ku pesoas ki ta mostra ruspetu pa otus algen, ki ta preokupa ku bo di verdadi i ki ta da-u koraji.

‘Un amigu di verdadi ta ama tudu óra i el é un irmon ki nase pa ténpu di frónta.’ — Provérbios 17:17.

Djuda otus algen. Óras ki bu ta mostra bondadi i bu ta faze kuzas pa otus algen, ti mésmu pa kes algen ki ka ta konsigi faze nada pa bo, bu ta ten alegria di verdadi. Bu ta ser filís, sikrê otus algen ka repara kuzê ki bu faze.

“Nu ta ser más filís óras ki nu ta da di ki óras ki nu ta resebe.” — Atus 20:35.

Djuda bus fidju prende ruspeta ses kabésa. Un manera di faze kel-li é dexa-s rezolve ses prubléma ti undi ki ta da. Kel-li ta djuda mininus prende modi ki es pode lida i rezolve ses prubléma. Si es prende faze kel-li, es ta ten más ruspetu pa ses kabésa gósi i óras ki es kria.

‘Iduka mininu na kaminhu ki el debe anda; mésmu óras ki el bira bédju, el ka ta disvia di el.’ — Provérbios 22:6, nóta di rodapé.

Un Tistimunha di Jeová sta ta faze un mudjer studu di Bíblia na un lugar di toma kafé.

MODI KI TISTIMUNHAS DI JEOVÁ STA TA DJUDA PESOAS TEN RUSPETU PA SES KABÉSA?

Runions i studus di Bíblia ki Tistimunhas di Jeová sta ta faze ta djuda pesoas midjora ses vida, i asi es ta xinti más ruspetu pa ses kabésa.

RUNIONS KI NU TA FAZE TUDU SIMANA

Tudu simana, na nos runions, nu ta obi diskursus ku bazi na Bíblia ki txeu bês ta da-nu sujistons di modi ki nu pode dizenvolve ruspetu pa nos kabésa. Nos runions é di grasa i tudu algen pode sisti. Pur izénplu, na nos runions bu ta ba prende...

pamodi ki bo é inportanti pa Deus
modi ki bu pode atxa un obijetivu na vida
modi ki bu pode dizenvolve bons amizadi ki ta dura txeu

Bu ta ba atxa amigus di verdadi ki ta “mostra kel mésmu preokupason pa kunpanheru.” — 1 Koríntius 12:25, 26.

Pa sabe más sobri nos runions, bai na jw.org i djobe vídiu Kuzê ki ta kontise na un Salon di Reinu?

STUDU DI BÍBLIA KI NU TA FAZE

Nu ta oferese un studu di Bíblia di grasa na livru Vive filís pa tudu ténpu!. Kel livru li ta uza testus di Bíblia inportanti, rasusinu klaru, bons pergunta, vídius ki ta motiva algen i dizenhus bunitu. Studu di Bíblia ki nu ta faze ta djuda pesoas ten ruspetu pa ses kabésa i midjora ses vida.

Pa odja modi ki studa Bíblia ku Tistimunhas di Jeová pode djuda-u, bai na jw.org i djobe vídiu Pamodi ki nu debe studa Bíblia?.