KUZAS STA BIRA KARU — KUZÊ KI NU PODE FAZE?

Ka bu perde speransa

Kuzas sta ta fika karu undi ki bu ta mora, má bu saláriu sta kontinua kel mê? Bu sta preokupadu si bu ta konsigi ten kes kuza ki bo ku bu família meste? Si sin, talvês bu sta preokupadu ku futuru. Sikrê ku tudu kes difikuldadi li, si bu ten speransa ma kuzas ta ben midjora kel-li ta djuda-u.

PAMODI KI KEL-LI É INPORTANTI?

Pesoas ki ten speransa ka ta sô spera ma kuzas bon ta ben kontise. Ten speransa ta djuda-s faze ses midjór pa midjora situason. Pur izénplu, studus ta mostra ma pesoas ki ten speransa...

ta aguenta situasons difísil midjór
ta konsigi faze mudansa óras ki meste
ta konsigi toma bons disizon, ki ta djuda-s ten un bon saúdi i un vida midjór

KUZÊ KI BU PODE FAZE?

Primeru, tenta intende modi ki Bíblia pode djuda-u gósi. Bíblia ten bons sujiston ki pode djuda-u óras ki kuzas fika karu. Kes sujiston li i otus kuza, pode djuda-u kontrola bu vida midjór i sta más priparadu pa lida ku difikuldadis ki pode kontise na futuru.

‘Kapasidadi di pensa ta guarda-u i disirnimentu ta proteje-u’.— Provérbios 2:11.

Sugundu, tenta intende kuzê ki Bíblia ta fla sobri futuru. Óras ki bu ta intende valor di sabedoria ki sta na Bíblia, bu ta xinti más motivadu na djobe ku kuidadu kuzê ki Bíblia ta fla sobri futuru. Bu ta prende ma Deus ka krê sô pa nu ten ‘un futuru i un speransa’ má tanbê el ta da-nu un bon razon pa nu kridita na kel speransa. (Jeremias 29:11) Kel razon li é Reinu di Deus.

KUZÊ KI É REINU DI DEUS I KUZÊ KI EL TA BEN FAZE?

Reinu di Deus é un govérnu ki ta ben governa téra interu. (Daniel 2:44; Mateus 6:10) El ta ben governa la di séu i el ta ben kaba ku tudu sufrimentu i pobréza. Tanbê, kel Reinu li ta ben da-nu pas i tudu kuza ki nu ta meste, sima kes testu ki sta dibaxu ta mostra.

‘Bu ta ben ser filís i bu ta ben ten un vida midjór.’ — Salmo 128:2.

‘[Kes ki ta ben vive dibaxu di Reinu di Deus] ka ta ben trabadja duru sen rezultadu’.— Isaías 65:23.

‘Ta ben ten kumida avontádi na téra’.— Salmo 72:16.

Milhons di algen ta kunfia na kes promésa li i es ten serteza ma Deus “ka pode konta mintira”. (Titu 1:2) Nton, nu ta insentiva-u pa bu studa Bíblia. Kel speransa ki sta na el pode djuda-u lida ku falta di dinheru i ten kunfiansa ma ta ben ten un futuru midjór.